1 Ba kona maranai Taupauma Herod i dagui bigeruwana biyisi mutusi i patupatumisi. 2 Ana abiabiyisi i wonisi John tuwana James seri yai si kasibunui. 3 Maranai Herod i kinani kata Jew biyisi si nuwagaire wai, yebo Peter si patumi. Nikona wai Baisaubona Poragina[a] maranai. 4 Peter si patumi murinai ku patuma yovena si terei. Ba namai abiabiyisi duguna bata, ba asi bata patuma yovena si potapotai. Basuna Herod ana waina Baisaubona Poragina kamna[b] murinai wai, pipiya ereonowasi naosiyai, debai iti buibuiyei. 5 Kata patuma yovenai i mamana ba bigeruwana biyisi nuwanuwasi tupanai, Peter karavina si rupari God kurina.

6 Kona pomnai ba mara ita tom Herod iti buibuiyei wai, Peter abiabiyisi ruwamo basusi yai i dudauwa chain maragasisi ruwamo yarona si kauta, ba abiabiyisi ruwamo yebo matam keta si msi potai. 7 Marakesana Bada ana aneya i rerematara wai yasegana patuma yovena i ruyasegana. Ba Peter gabagabana i kasiputuputuwi irusikwani ba i wona, “Yagiyagina, ke bomsiri!” Ba chain Peter yaroyaronai si peku. 8 Damanina ba aneya kurina i wona, “Kam gara ba kae sumasuma ke kote.” Ba Peter i wosei. “Kam tarasowo ke kotei ba ke kibiku.”

9 Ba Peter patuma yovenai i kibi i kasibau, ba kega i kuiri kata awaika aneya i wosewose wai bisuwona i tuputupuwa, kona i nosi bage ita bomeumeu. 10 Aba potapota gawarisi ruwamo si sumarisi ba si botu, patuma yovena matamketana i kasibau ku meyaga kaikapona wai nuwanai kairavisi i tamo tatara, ba si riubonei. Ba ketai si yewo si nenae wai aneya i sumarei.

11 Damanina ba Peter nota iyauni kata awaika kurina i tupuwa wai i wona, “Karaku mosi a kuiri kata nikona wai bisuwona! Bada ana aneya i porai Herod yaronai iyawasiku ba Jew babadisi asi waina awaika kuriku sita wosei wai kega itupuwa.”

12 Maranai kuirina i yauni kata God i baisi wai i nae, John Mark sinana Mary ana ku yove. Memena pipiya pesarisi si notuwa ba God kurina si raupari. 13 Peter matara matam ketanai i raukesakesara ba aba saibisaibira kana waba Rhoda i botu ita botavei. 14 Ba Peter gamona inonori ba i kuira taveyei wai matam keta kega i botaveyei, ba i nuwagaire saki wai, i vera i veramaga ba i wona, “Peter wai matarai e bimsiri!”

15 Saba kosi kega si geruwe ba si wona, “Memena yakai ke boneganega!” Saba kona i kaotupetupena kata bisuwona. Damanina si kaobeyei si wona, “Memena yakatai ana aneya!”

16 Maranai kosi sibi sisiya wai, Peter kona karaku wata i raukesakesara mana. Ba si nae matam keta si botaveyei, kata si kinani wai si sikwana ba si nota kabakabai. 17 Peter yaronai i sisiya kata siti raboraobo, ba i wonisi mekabage Bada patuma yovenai i naovei i kasibau. Ba yebo i wona, “Nikona James ba bigeruwana biyisi mutusi ko wonisi,” ba i sumarisi i nae ta ku kupura.

18 Mara i tom wai, patuma yovenai abiabiyisi si bonegenegesi, kairavina kosi kega si kuiri kata Peter mekemena i nae. 19 Herod abiabiyisi i kaotuneyisi Peter sita nuveni, ba kega si panani wai, abiabiyisi kesakesasike i kasekasemainisi, ba i kaotuneyisi kata kosi siti kasibunuwanisi.

Nikona murinai Herod, Judea i kasibau taveyei ba i nae Caesarea meyaginai i mana mara yogina.

20 Herod i yagisi saki Tyre ba Sidon biyisi kurisi. Kata pipiya si kesanisi ba si botu Taupauma Herod kurina. Ba taupauma ana saibisaibirina Blastus si kwairi, kata iti basisi taupauma ita kinani nuwanuba kairavina, basuna kosi kasi kam wai, taupauma ana kupurai si yuyauna.

21 Ba kaona si binei siti kesanisi, wai Herod kana tarasowo monimonikisi i kote ba, taupauma asi aba makimakirai i makira ba ana sisiya i terei pipiya kurisi. 22 Ba maranai Herod ibi sisiya sinonori wai, pipiya si parapara, “Niko kega pipiya mom e bi sisiya ba god e bisisiya!” 23 Mara kesana Bada ana aneya Herod i ravi i peku, basuna kona kega God ibo kuwayei, ba muri yai motamota sinina kamona si yowai wai i rabobo.

24 Bagunai nikosi wose si tuputupuwa, saba God wonana i rakata ba kupura i bibonuvi wai pipiya pesarisi Iesu si geruwei.

25 Barnabas ba Saul asi saibira si kakabi wai, Jerusalem yai John Mark si urabai, yabata si veramaga.

<- Acts 11Acts 13 ->