22
1 Ka anelose‑nana Yawai A Daudau viwaveneu, daudau‑nana mahemaheina, wei deina, ka vi‑putu pai manuena ahihi‑vaine‑nana Yaubada kadu Lami
V ainua wayahia,
✡ 2 e meagai‑nana a etawana ananina niwanina taitaina opuopu. Ka daudau‑nana nepena, ka papani ainua wayahia, yawai anꞌ ai mimini. Ai‑nana uaua tuta ai yau 12 wayahia ponimana aitamoata aitamoata nihenina, uaua wahava aitamoata aitamoata nihenina. Ka ai‑nana yawaina munamuna tau maꞌ papani habuhabui wayahi, ka aituhu ivi‑kwanaha, akanai ai‑nana yawaina wayahina ividoha.
✡ 3 Ka eha aitam bwanata ta‑mamae meagai‑nana nihenina. Ka pai manuena ahihi‑vaine‑nana Yaubada kadu Lami
V ainua wayahia meagai‑nana nihenina mamaei, ka ya tau paisewa tauna iaivaitei.
4 Ka taui tauna tepana idudueyei, ka tauna ana wava tepaia mamaei.
✡ 5 Ka meagai‑nana nihenina ioyoma eha. Ka tau vi‑meagai‑nana eha nau‑wawani lampa
V itunu, ka eha nau‑wawani babau na‑vana, iuna Kauvea Yaubada vivane yai maheta, ka taui yai pai veimea ma‑vavaha.
✡ Iesu Ya Mavi‑havine
6 Ka anelose‑nana voneu, ivona,
“Vona taina vona‑vavaha ka vona tunutunuhina. Kauvea vivane tau apa‑taputapu nuai yai Yaubada, ka tauna avaha yanꞌ anelose vi‑tunei omo wayahima, e anelose‑nana dewaia tuta eha ani‑hoina na‑iakwa wayahina ivinꞌ‑omo itomi Kauvea ya tau paisewa viwavenemi, unꞌ‑anamanei.”
✡7 Ka Iesu ivona,
“Udueyei! Tuta eha ani‑hoina na‑iakwa wayahina, e amavina! Aituhu aviyaivia apa‑taputapu‑naia buki taina nihenina inua‑vi‑avini, akanai taui avaha nau‑iaiava ivaniahei.”
✡8 Yauke Ioni, ka dewaia tanoi habuhabui anononi, kadu adueyei. Ka avaha dewaia anononi kadu adueyei, akanai yauke anelose‑nana dewaia viwaveneu aena wayahina avi‑tupa‑gum, e yau nuanua tauna wayahina ana‑iwaodu. ✡ 9 Kate tauna vito‑potau, ka voneu, ivona,
“Eha wayahiua ena‑iwaodu! Wamke Yaubada ya tau paisewa aitam, ka vavaneim, vivane tau apa‑taputapu, taui kadu Yaubada ya tau paisewa. Ka kadu aituhu aviyaivia vonaia buki taina nihenina ivi‑ateteyei, akanai taui Yaubada ya tau paisewa. Ka yauke kadu itomi habuhabumi deina. Ika, yauke Yaubada ya tau paisewa aitam. Nau‑wawanika Yaubada wayahina kana‑iwaodu!”
10 Ka kadu voneu, ivona,
“Eha apa‑taputapu‑naia buki taina nihenina ehivehive, iuna apa‑taputapu‑naia tuta eha ani‑hoina na‑iakwa wayahina inꞌ‑omo.
11 Wayahina, aituhu aviyaivia dewa goyona idedewei, akanai tuta tepakaia wayahina idedewei aitamoata deina. Ka aituhu aviyaivia dewa gawagawami idedewei, akanai tuta tepakaia wayahina idedewei aitamoata deina. Ka kadu aituhu aviyaivia dewa tunutunuhina idedewei, akanai tuta tepakaia wayahina idedewei aitamoata deina. Ka aituhu aviyaivia ahihinata, akanai tuta tepakaia wayahina ahihinata imamaei aitamoata deina.”
✡12 Wayahina Iesu ivona,
“Udune‑vivinimi! Tuta eha ani‑hoina na‑iakwa wayahina amavi‑havine! Ka ami nau‑pata wayahiua aomanei, ka aitamoata aitamoata wayahimia anau‑patami yami dewaia aitamoata deinake.
✡ 13 Yauke Alepa ka Omega, ka dewa habuhabui ai Pai Vi‑putu kadu dewa habuhabui ai Pai Nau‑yehata, ka yauke Tau Vi‑putu kadu Tau Nau‑yehai.
✡ 14 Ka aituhu aviyaivia ai kwama inosia, ivo‑vi‑aiaia, akanai yauke Yawai Anꞌ Ai uana anꞌ‑awaehei inꞌ‑aniania, kadu anꞌ‑awaehei meagai‑nana anꞌ awa wayahia ina‑nu.
✡ 15 Meagai‑nana nini‑vanina vivane kedewa yai papani. Aituhu aviyaivia banauma o nei o pohavu idedewei, ka aituhu aviyaivia ikenekenene, ka aituhu aviyaivia inau‑vi‑aniga, ka aituhu aviyaivia yaubada vitupu yai itupwana wayahia iaiwaodu, ka aituhu aviyaivia idewa‑haiawa vitupu wayahi o aituhu aviyaivia ivitupu, akanai taui habuhabui nau‑wawani meagai‑nana nini‑vanina imamaei.
16 Yauke Iesu, ka yau anelose avaha avi‑tunei omo wayahimia, e tauna avaha hae‑nana itomi tau ekalesia haeyemi.
Yauke Davida Wanohina kadu Davida Nahana. Ka yauke kadu Ubwana mahemaheina ka vo‑vi‑namanamaniu.”
✡17 Ka Nuana Ahihinata kadu tau tavine vavinena ainua ivona, “Enꞌ‑omoi!” Ka aituhu aviyaivia vonaia inononi, taui kadue nau‑wawani ivona, “Enꞌ‑omoi!” Ka aituhu aviyaivia magai ayaya, akanai taui nau‑wawani inꞌ‑omo. Ka aituhu aviyaivia yai nuanua am‑venena awawaehina ivaniahei, vivane Yawai A Daudau ina‑nimi, akanai taui habuhabui nau‑wawani am‑venena awawaehina inꞌ‑epei. ✡
Pai Nau‑yehata
18 Yauke Ioni, ka yau vona panina taina wayahina taui habuhabui apa‑taputapu‑naia buki taina nihenina inononi anau‑vi‑avini. Aituhu aviyaivia yai vona apa‑taputapu‑naia wayahia ivi‑nuia, akanai apaina Yaubada veimeyei dewa‑yaiyai‑naia buki taina nihenina ivaniahei.
✡ 19 O aituhu aviyaivia vona tupwai apa‑taputapu ana buki taina wayahina iepa‑yavunei, apaina Yaubada taui ai vo‑pata nau‑iaiavaia kaiaiavei buki taina nihenina nꞌ‑epa‑tawanei. Ika, taui ai vo‑pata yawai anꞌ ai uana wayahina itutu‑haini, kadu Yaubada taui vito‑potei meagai‑nana ahihinata wayahina, eha ai pata ina‑nu.
20 Iesu dewaia tanoi a tau hae, ka tauna ivona,
“Ika! Tuta eha ani‑hoina na‑iakwa wayahina amavi‑havine.”
Ana pata deina. Kauvea Iesu, enꞌ‑omoi.
✡21 Yauke Ioni yau nuanua Yaubada ya tomotau am‑venena awawaehina ivaniahei Kauvea Iesu wayahina.
Ana pata deina.
