13
Iesu Tauna A Tau Vi‑muni‑waiwai Pai Dune Venei
1-2 Ka Iesu avaha anamanei vivane yana tuta tanopia eha ani‑hoina na‑iakwa, ka tuta‑nana avaha omo, e tauna tanopi na‑ni‑tawanei, e Amana wayahina na‑vane‑havine. Tuta tuta Iesu tauna a tau vi‑muni‑waiwai tanopia dune‑nuanuaiei, ka ya nuanua dune‑nuanuai‑nana viwavenei inꞌ‑anamanei.
Ka Itouvuha Toneina mana navia, ka Iesu tauna a tau vi‑muni‑waiwai ai yau 12 nui, taui ai heta avanana imai‑aniania vinanavi, ka Satana avaha Iudasa me Kariota, Simoni natuna, ana‑dibidibiei, e tauna Iesu vi‑nua‑hauhauei.
✡ 3 Ka Iesu avaha anamanei, Amana avaha dewa habuhabuna nimana bouni, ka Iesu ana heta ana pata na‑veimeyei. Kadu Iesu avaha anamanei tauna Yaubada wayahina vinꞌ‑omo, kadu tauna Yaubada wayahina mavimavina.
✡ 4 Wayahina, tauna am‑nana wayahina mini, a pai bwaꞌ boui, e pai nau‑vi‑ayaya epei, e vi‑haionei.
5 Ka ine, e daudau iwahi gaeba nihenina, epei, e omo, vi‑putu a tau vi‑muni‑waiwai aei nosinosia, kadu pai nau‑vi‑ayaya wayahina vi‑haiona wayahina aei nau‑vi‑ayayi.
6 Ka tauna omo Simoni Pita wayahina. Kate Pita vonei, ivona, “Kauvea, eha nau‑wawanim aeu enosia!”
7 Ka Iesu vona‑nau‑patei, ivona, “Ataina wamke eha yau dewa taina etꞌ‑anamane‑vidohe, kate munia enua‑haui.”
8 Kate Pita vonei, ivona, “Tuta ataina a itoava auyewa pai nau‑yehata wayahina, yauke eha anꞌ‑awaehem aeu enosia.”
Kate Iesu vona‑nau‑patei, ivona, “Aituhu yauke eha anosim, vona ahiahina, wamke eha aitam au tau vi‑muni‑waiwai.”
9 Wayahina, Simoni Pita vonei, ivona, “Kauvea, aituhu deina, eha aeu ana heta, kadu nimau, ununu, habuhabu enosiu!”
10 Ka Iesu vona‑nau‑patei, ivona, “Aituhu aviyaivia avaha itoa‑yehai, taui nau‑wawani aei ana heta inosia. Taui inini habuhabuna avaha hadahadanina. Ka itomi avaha hadahadanimi deina, kate aitamoata wayahimia eha.”✡ 11 Iesu ivona deina, iuna tauna avaha anamanei koiaka munia vi‑nua‑hauhauei. Wayahina, tauna ivona, “Itomi avaha hadahadanimi deina, kate aitamoata wayahimia eha.”
12 Ka Iesu avaha a tau vi‑muni‑waiwai ai yau 12 aei nosi‑yehai, akanai tauna a pai bwaꞌ weteni‑havinei, e mavina wayahia. E tauna vi‑tanaiei, ivona,
“Yau dewana wayahimi unua‑haui, o eha?
13 Uvi‑wahaniu ‘Tau Viwavenena’ kadu ‘Kauvea’ ka akanai, vonana vivane vona tunutunuhina.
14-16 Memeanina nuami vi‑tupatupa, kate avonemi, tau paisewa eha ai tau veimea ivane‑tawane. Kadu aitamoata deina, tau mataeda eha ai tau vi‑tune ivane‑tawane. Kadu aitamoata deina, itomi eha uvane‑tawaneu. Udueyei! Yauke vivane yami Kauvea kadu yami Tau Viwavenena, ka taua avaha aemi anosia. Dewana adewei yami pai dune ivaita wayahina. Wayahina, itomi aitamoata aitamoata nau‑wawanimi tuta tuta una‑ivaitemi. Yauke avaha dewa‑vidovidoha a pai dune ahiahina avenemi. Wayahina, itomi nau‑wawanimi kadu uvi‑tau paisewa aitamoata aitamoata wayahimia, yauke avi‑tau paisewa wayahimia aitamoata deina.
✡ 17 Ataina yauke avaha dewana aviwavenemi, udueyei, kadu unꞌ‑anamanei. Aituhu viwavene‑nana udewa‑nubunubui, akanai nau‑iaiava uvaniahei deina!
Iesu Iudasa Ya Vi‑nua‑hauhau Apa‑taputapuei
18 Yau vonana eha habuhabumi wayahimi. Iuna taui nonova avi‑nua‑dadanei anamane‑vidohei. Kate aitam dewa goyona omomo, ka Iginuma nihenina dewana wayahina ivona,
‘Onotona au palaua ania,
kate tauna au havia ivaitei.’
✡
Iginumana dewa goyo‑nana apa‑taputapuei deina, ka ataina vi‑nua‑hauhau tanoi na‑omo.
✡ 19 Ataina dewa goyonana amai‑vonemi, ka apaiku dewana na‑omo. Ka munia, itomi yau vonana unuani, vivane yauke dewana apa‑taputapuei, ka vonana na‑ivaitemi uvitumahaneu ‘Taua Amaꞌ‑vavaha.’
✡ 20 Memeanina nuami vi‑tupatupa, kate avonemi, aituhu aviyaivia yau tau mataeda iawaehei, ivitumahanei, akanai taui kadu yauke taua iawaeheu. Kadu aituhu aviyaivia taua iawaeheu, akanai taui kadu tauna vi‑tuneu iawaehei.”
✡ Iesu Dewa Iomomo Apa‑taputapuei
(Mateu 26:20-25; Marika 14:17-21; Luke 22:21-23)
21 Ka avaha Iesu ivona deina, tauna nuana ivita, e ihae tunuhina, ivona, “Memeanina nuami vi‑tupatupa, kate avonemi, aitam wayahimia vi‑nua‑hauhaueu.”
22 Ka a tau vi‑muni‑waiwai aitamoata aitamoata ivi‑duedue wayahia, kate taui nuai vi‑tupatupa ananina. Ka eha itꞌ‑anamane‑vidoha koiaka wayahia tauna vonavona wayahina. 23 Pai am wayahina Iesu a tau vi‑muni‑waiwai aitam tauna numanumana wayahina ino‑vinavina, e Iesu tauna dune‑nuanuaiei ananina. 24 Ka Simoni Pita tau vi‑muni‑waiwai‑nana matana vonei, ivona, “Evi‑tanaiei vivane, ‘Koiaka wayahina evonavona?’.”
25 Wayahina tauna Iesu numanumana wayahina ino‑vinavina vi‑tanaiei, ivona, “Kauvea, koiaka?”
26 Akaka Iesu vona‑nau‑patei, ivona, “Gibugibuna taina buyavia asi‑utuvi, avenei, tauna aina.” E gibugibuna si‑utuvi, e tauna Iudasa venei, tauna Simoni me Kariota natuna. 27 Ka Iudasa avaha gibugibuna epei, Satana vo‑kwayavoni nihenina inu, e veimeyei. Wayahina, Iesu Iudasa vonei, ivona, “Avi dewa yam nuanua, akanai ataina evo‑kwayavoni edewei.”✡ 28 Kate tau am habuhabui eha Iesu ya vonana Iudasa wayahina anꞌ anamana itꞌ‑anamane. 29 Tupwai inuani, Iudasa kode dune‑vi‑avini. Wayahina, taui inuanua Iesu Iudasa vonei deina iuna Iesu ya nuanua tauna gugua toneina wayahina vi‑maiei, o kadi aitam am‑venena‑kavovo tau payapayaya venei deina. 30 Kate avaha Iudasa gibugibuna epei, tauna vo‑kwayavoni iopu ine.
Ka avaha ioyoma.
Veimea Vovouna
31 Ka avaha Iudasa ine, Iesu tauna a tau vi‑muni‑waiwai vonei, ivona,
“Tuta eha ani‑hoina na‑iakwa, e yauke, Tauna Vi‑tomotau, didigau avaniahei, udueyei. Ka kadu yau dewa wayahina Yaubada didigana avo‑vi‑natei, udueyei.
✡ 32 Ka avaha Yaubada didigana avo‑vi‑natei, akanai tauna didigau na‑vo‑vi‑natei, ka tuta eha ani‑hoina na‑iakwa wayahina tauna na‑dewei deina.
✡ 33 Natunatu, tuta eha ani‑hoina wayahina yauke nui kamamaei. Nonova me Iudea avonei, kadu ataina avonevonemi aitamoata deina, vivane avi papani aneine, itomi eha ami pata unꞌ‑omo. Apaina uneneneu, kate eha ami pata uvaniahau.
✡ 34 Ataina ami veimea vovouna taina avenevenemi, vivane nau‑wawanimi udewa‑vidovidohemi. Yauke avaha adewa‑vidovidohemi, kadu itomi nau‑wawanimi udewa‑vidovidohemi aitamoata deina.
✡ 35 Aituhu udewa‑vidovidohemi, akanai mani tomotau habuhabui yami dewana idudueyei, e inꞌ‑anamanemi itomi au tau vi‑muni‑waiwai.”
Iesu Pita Ya Vi‑ebua Apa‑taputapuei
(Mateu 26:31-35; Marika 14:27-31; Luke 22:31-34)
36 Ka Simoni Pita Iesu vi‑tanaiei, ivona, “Kauvea, ataina aveta eneine?”
Ka Iesu vona‑nau‑patei, ivona, “Viha a papani aneinei. Ataina wamke eha am pata evi‑munieu, kate munia evi‑munieu.”
37 Ka Pita kadu vi‑tanaiei, ivona, “Kauvea, ataina tuta aviani wayahina eha memeanina avi‑muniem? Iuna yauke yawaiu awaehei anꞌ‑aniga taum wayahim.”
38 Kate Iesu vona‑nau‑patei, ivona, “O Pita. Ataina enuanua yawaim eawaehei wayahiu, a? Memeanina nuam vi‑tupatupa, kate avonem wamke eha am pata. Apaiku, ioyoma taina nihenina, wamke evi‑ebueu tuta aitonu wayahina, ka munia, kamkam onotona yana tou!”
<- Ioni 12Ioni 14 ->
