LIIPA ORA SIRIM 12

1 Kanu-kene mulú-koleana suku ulu aima auli tondulu te ung-pulu pirim ulu te wendu urum. Akili i-sipa mele: Ambu te molupa, enale múlu mele pakupa, kaliimbale yunga kimbele-ni kambiliipa, pengína ambu nuim kuininga wanie-kraon te kombukantupu rurepu akuna angiliipili pakupa mulurum. 2 Yunga oluna kangambula monjupa kene, membandu mindili aima auli-tepa nomba perepa kene ke nimba mulurum.

3 Kanu-kene mulú-koleana sukundu ulu aima auli tondulu ung-pulu pirim ulu te alsupa wendu urumko: Wambiye-drekon aima auli kunduli te molupa, yunga pengí angere yupuku-guli angiliipa, kung-kao gu mele engkaki pambusele-pipi wendu omba, yunga pengímanga yi nuim kingeliinga wanie-kraon angere yupuku-guli pakupa mulurum. 4 Kombukantupuma oe yupuku tepa topa, wambiye-drekon kanili yunga áliele-ni kombukantupu oe te mulúna ola topa mana mania mundurum. Kangambula membá tirim ambaliinga kumbi-kerina angiliipa kangambula kanili ambale-ni membá kene nombandu nokupa angiliirim.

5 Ambale-ni kang te mirim. Kang kanili ma-kolea yambu-talapema pali lakupa tondulu mundupa nokupa molumba. Mirim kene tep-repi teku liiku kanglku Pulu Yili-ni kolea pali nokupa mulurum poluna meku puring. 6 Ambale kolea waka lilina sukundu lkisipa takara topa pupa, kolea te Pulu Yili-ni ui tepa mimi tinjirim kolea akuna purum. Akuna Pulu Yili-ni “Yu ena wan tausen tu andret kelepa sikisti mulupili nokunjangi.” nirim.

12:7-9 Seten Kene Angkella Nuim Auli Maikel Kene Ele Tiringli Temanele (12:1-18 pali)

7 Kanu-kene mulú-koleana sukundu ele auli te wendu urum. Mulú-koleana angkella auli Maikel kene yunga mulú-koleana we-angkellama kene wambiye-drekonale mulurumna ele uring. Drekonale kene yunga angkellama kene kanuku kene ele tiringeliinga-pe 8 Maikele-nga talapele-ni enini toku munduring akiliinga penga drekonale kene yunga angkellama kene mulú-koleana suku mulungí kolea te naa lirim. 9 Drekon auli tondulu akili yu kórunga-ui mulurum wambiyele; yu “⸤kurumanga nuim⸥ depollale” niku; yu “Seten” nilimele yili; yu mana-yambuma pali kundi topa ‘Lu liiku kupulanum tenga-lupa pangi.’ nilimú yili. Kanili toku mana mania munduring, yu kene yu lumbili anduring angkellama kene toku mana mania munduring.

10 Kanu-kene mulú-koleana sukundu ung tondulu te wendu urum piliirindu. Ung akili nangale topa kene nimba mele:

“Oliunga anginipilima

taki-taki sumbulsuli kepe tanguli kepe

Pulu Yili-nga kumbi-kerina kot tenjilimú yili

ekupu mana mania toku mundúngeliinga

Pulu Yili yunga tondulu pelemále-ni

‘Seten-ni oliu naa ambulupa tepa kis-sipa

mindili nolkemela koleana naa memba pupili.’ nimba,

oliu tepa liipa,

yu aima sika yi nuim kingele molupa

yu mélema pali nokupa molupa,

yu Pulu Yili-ni “Enini nokupa konjumba yi te

liipu mundumbu.” nimba

makó turum yi-nuim Kraisele-nga namba,

mélema nokumba namba pelemále-ni

Kraisele yu-ni mélema pali nokupa konjumba enale

ekupu kamu wendu um.

11 Kung-Sipsip Walále-ni

memi onde linjirimele kene

Pulu Yili-nga ungele niku siringele kene

ulu akusele-ni oliunga anginipilima

tondulu munduku ele-túli toku munduring.

Enini ‘mana molupu konjamili.’ niku naa piliiku,

‘Ele-túma-ni toku kunjúngi lem kapulako.’

niku piliiringeliinga aku-sipa

tondulale pirim kene aku tiring.

12 Akiliinga, nu mulú-koleale kene

akuna molemele yambuma kene eni numanu sangi.

Akiliinga-pe nu male kene nu numú-kusale kene

⸤kurumanga nuim⸥ depollale else muluringlina

mania purumeliinga

else-kene buni auli te wendu um.

‘Pulu Yili-ni yu kamu topa mundumba enale

nondupa wendu ombá.’ nimba piliipa

yu lakupa arerembi kolupa molemú.”

nirim.

13 Wambiye-drekonale yu toku mana mania munduring kene kanupa kene penga kang mirim ambale andupa pulu sirim. 14 Akiliinga-pe ‘Yu wambiyele-ni naa tupili.’ nimba kolea sulu waka lirim tenga yu punie yupuku kaliimbu angere tale-guli mulupili nukungí kolea te Pulu Yili-ni tepa mimi tirimele ‘yu akuna buru nimba yu takara topa pupili.’ nimba ambu kanili kera dowa pu auli tale sirim. 15 Yu takara topa purum kene kanupaliinga wambiyele-ni ‘Yu no-ni topa memba pupili.’ nimba yunga kerina miku turum kene ambale purum kupulanum-na no auli-tepa topa pulu sirim. 16 Akiliinga-pe male-ni ambale liipa tapunjupa ma auli-tepa kengiya lepa wambiye-drekonale-ni miku turum nole pali akuna omba mania purum. 17 Kanu-kene wambiyele-ni aku tirim kanupa kene ambale-kene lakupa arerembi kolupaliinga ambaliinga kangambula wema kene ele temba purum. Ambaliinga kangambula kanuma Pulu Yili-ni “Teai.” nilimú ung-manima piliiku liiku teng panjiku teku, Yesos-nga ungma niku siku molemele yambuma. 18 Wambiye-drekonale numú-kusa kéluna angiliirim.

<- LIIPA ORA SIRIM 11 LIIPA ORA SIRIM 13 ->