JON YUPUKU-SIPALE
JON-ni Wale YUPUKU-SIPA Pepá Topa Sirim Bukele
Jon-ni Pepá Topa Sirim Ilinga Ung-Pulu Mare
Ung-pulu mare buk-gomú 1185 molemú, akili kanui.
Jon-ni yi mare “Krais-nga ungma anduku mani sangi pai.” nimba liipa mundurum yima kolea Esia propinj kolea tenga Krais-nga yambu-talapeliinga yi te-ni “Ya naa wai. Anju pai.” nimba topa makururum. Yi kaniliinga bili Diyotepas. Yambu mare-ni Jon-ni liipa mundurum-na uring yimandu “Wasie piamili wai.” niring kene Diyotepas-ni yambu kanumandu “Krais-nga yambu-talapena ulsu pai.” nimba topa makururumko. Jon-ni pepá ili yi Gayas mulurumna topa sipa kene nimba mele: “Yi mare “Koleamanga anduku mani sangi.” nimbu liipu munduliu yima “Wasie piamili wai. Eninga ungma piliamili.” niku tellále aima teku konjullu.” nimba pepále topa, “Diyotepas-ni tepa kis-silimáliinga yu ombu kanupu kene yu tondulu mundupu mani simbu.” nimba pepále turumko.
Ya ung-pulele pora nikem.

1-15 pali ‘ ‘Sika’ Nimbu Tondulu Mundupu Piliilimulu Mele Mindi Piliipu Liipu Molamili.’ Niku Kanuku Kongnjuku Molku, Temani-Kaiéliinga Ele-Tuma-ni Nilimele Ungma Naa Piliiku Liiku Bulu Sangi Ung Te

1 Jon-ni Pepále Tombandu Pulu Monjupa Turum Ungele

1 Na (Krais-nga yambumanga) tápu-yi andale-ni

nanga angin kaiéle, sika aima numanu monjuliu yi Gayas nu

pepá ili topu siker.

2-4 Yi Gayas Sumbi-Sipa Mulurum Mele Piliipa Kene Jon Numanu Sirim Temanele

2 Nanga angin kaiéle, na-ni ‘nunga minéle pepa konjulimú aku-sipa nu-ni kongunuma tinindu buni te wendu naa upili teku konjukunu, nu kuru te naa tupili molku konjani.’ nimbu piliiker. 3 ⸤Oliunga⸥ anginipili yi mare oku nandu temani toku kene niku mele: “Nu ung-sikama aima ambolku konjukunu, nu-ni ung-sikama aima piliiku liikunu teku mollu.” niring piliipu kene na aima numanu sirindu. 4 Nanga kangambulama-ni ung-sikama piliiku liiku teku molemele mele piliipu kene numanu siliu mele aima olandupa.

5-8 Yi Gayas-ni Tepa Kunjurum Temanele

5 Nanga angin kaiéle, ⸤oliunga⸥ anginipili nunga koleana olemelema sika aima poning leku olemelaliinga-pe nu-ni enini aima liiku tapunjukunu nokukunu molláliinga aima teku konjullu. 6 Nu-ni enini numanu monjukunu nokollu mele enini Krais-nga talapena-yambuma niku siring. Nu-ni ‘Pulu Yili-nga kongunale teker.’ niku piliikunu ‘Kupulanum-na langi nolsiliiku pangi.’ nikunu liiku tapunjunu lem kapula. 7 ‘We ulsu molemele yambuma-ni naa liiku tapunjangi.’ niku yi kanuma enini ‘Yambuma Yesos-nga bili lakuku piliangi.’ niku ⸤eninga pulu-koleama munduku kelku⸥ andolemele. 8 Akiliinga, oliu-ni yi aku-sipama liipu tapunjupu langi sipu ‘Lkumanga peangi.’ nimulú kene kapula. ‘Enini ung-sikaliinga kongun telemeláliinga liipu tapunjamili.’ nimbu aku teamili.

9-11 Yi Diyotepas-ni Tepa Kis-Sirim Temanele

9 Krais-nga yambu-talapele pepá te topu sirindeliinga-pe Diyotepas-ni yu ‘eninga yi-auliele molumbu.’ nimba piliipa molemú yili-ni oliunga ungma naa piliipa liilimú. 10 Akiliinga, na eni molemelena úndu lem yu-ni oliunga ung-bulkundu ninjilimú mele nimbu para simbu. Akili mindi mólu. Yu-ni yi-anginipili poning mare olemele kene ‘Okomeleye?’ nimba ki naa liipa “Wasie molamili.” naa nimba, yambu poning olemelema “Wasie pe-pamili wai.” nilimele kene yu-ni “Naa meku pai. Mólu!” nimba, Krais-nga yambu-talape molemele lkuna makurupa pena-pena telemú.

11-12 Yi Demitrias-ni Ulu Kaíma Tirim Temanele

11 Nanga angin kaiéle, ulu-kísima kanukunu manda lekunu naa tui. Ulu-kaíma mindi kanukunu manda lekunu lombulku teani. Yambu te ulu-kaíma telemú yambale Pulu Yili-nga yambale molemú. Yambu te ulu-kísima telemú yambale-ni ‘Pulu Yili-kene tapú-topu molambili.’ ui naa nimba yu molemú mele tondulu mundupa naa piliirim.

12 Yambuma-ni pali yi Demitrias ‘yu yi kaiéle’ nilimele. Yu-ni tepa konjulimú mele ung-sikale-ni liipa ora silimúko. Na ⸤Jon⸥-ni kepe ung-sikama mindi niliu yili moliu akili ⸤Gayas⸥ nu piliillu, na-ni ‘⸤Demitrias⸥ yu molupa konjulimú.’ niliuko.

13-15 Pepá Topa Pora Sipa Kene Ung Laye-Talse Turum Ungma

13-14 Na ung pulele pepá topu silkaliinga-pe ‘olsu aima kamu numanu auli-tepu sipu molambili akiliinga nu molluna ombu mongale-ni kanupu nu-kene ung nimbu sipu molambu.’ nimbu piliipu kene pepá naa topu mundupu kelker.

15 Nu numanu waengu nipili mului.

Nunga yambu pulu lelemúma-ni “Nu mului.” niku mundukumele.

Nu-ni oliunga yambu pulu lelemú nu-kene molemelema lupa-lupa bi leku “Oliu-ni “Eni molai.” nimbu mundukumulu.” ni.

⸤Aku manda niker.⸥