Romu 15

1 Nu iyayapan yutumpama me iyayapan yutu onanwa gumbo iyaiyai ag waita muntanit di. Me gumbe numbo degadega den ata. 2 [a]Nu desirom desirom owanaiwa dega munta, mu oraiwa muma me divi nu yaug anota, mu sig dotan oya munan anota. 3 [b]Keriso me membo den wat degayane. Megara wait tenewa mina, “Diguragut dirueme igiyawa diguragut mumawa me eganap onne.” 4 [c]Wait tenewa undag me toewan nuntan oya tene. Baiboru oma ane uiwa nikiatanwa ge yusiwa wantanwa munivi. Me gumbe nu owanowan autan oya tene.

5 Ne imunap meib, God me unuwa nikiaigimtanwa ge yusiwa nuntanwa nuniviwa, me ape ye anoano meiba desiroma auya, ye da da Keriso Iesu amave aisiene mina. 6 Me ye nonewa desirom ape, noiwa desirom ape, Ayapan numa Iesu Keriso Mamawa God waiyatan oya.

7 [d]Keriso tam nunne God eyawa oya. Mame mina, ye gara tam aya. 8 [e]Ne veni. God natawa meuma toewan muntan oya, Keriso me kwapituitui igiyawa nauwawa aivi abnawa ane. Me agi me isimuranaiwa gumbo munnewa sira yaug anog kiniyatan oya. 9 [f]Sira me, God ano munnewa gumbe, Ju onan igiyawa gaibu God waiyatan oya. Meib tenewa mina,

“Meoya ne Ju onan igiyawa danave ne ge watdega gentna,

sira ivugwa gumbe bererin tog waiya gentna.”

10 [g]Sira mameib tene,

“Ju onan igiyawa, Ayapan igiyawa gaibu degadega aya.”

11 [h]Sira tenewa,

“Ju onan igiyawa undag, Ayapan watdega aya.

At undag igiyawa, bererin tog watdega waniya.”

12 [i]Sira Aisaya mame waivi,

“Jesi taiwa meuma matai dauwag yoipe.

Me apan me Ju onan igiyawa amara muntan oya wan yoipewa.

Ju onan igiyawa me gumbe owanowan avigimpe.”

13 Ne aib anoeni, Owanowan Goddeba me degadega undag ge yum undag anotumat gumbe ye yempe guniyap noidauwape, sira Guwawa Iyakaisiyapama yusiwa gumbe ye owanowan yempe guniyap noidauwape.

Poru Me Ju Onan Igiyawa Munan Nau Aivi Abnawa

14 Tatangwanen. Ne aib yusipamit anoeni. Ye guniyap oraiminavitwa noidauwane, ye guniyap anoano noidauwane, sira ye oma ane gara toewanewan ene. 15 Ne upeba yusipamit tena. Me ye yaug anoigimtanwa oya. 16 [j]Kuiyawa God gumbe ne ano oraiwa auna, Ju onan igiyawa munan Keriso nauwawa abnawa atan oya. God gae oraiwa gumbe, ne pirisi nauwawa eni. Me Ju onan igiyawa mu God puyo maeba me Guwawa Iyakaisiyapama gumbe iyakaisi anewa ape oya.

17 God nauwawa eni oya, ne Keriso gumbe degadega eni. 18 God ne anegivi. Me ne gunap Keriso ane Ju onan igiyawa mokona aya oya. Gae upeba watan me den anoeni. Keriso nau ane gae ge anoano atanwa gumbe. 19 Sira me nau ane, yautanwa ge irayauyau yusiwa gumbe sira Guwawa yusiwa gumbe. Meib ne Keriso gaiyawa oraiwa wateteyameni, Jerusarem apa onne Iririkam at undag. 20 [k]Mame mina, ne den sina iyayapan upeba wait nium barauya arawa egave. Kuiyawa ne imunap, ne gae oraiwa wateteyampna Keriso iviwa den yaug anoya arawa apa. 21 [l]Me mamaib tenewa mina.

“Me gumbe bira da den wane anoyawa yaupe,

sira den anoya igiyawa yaug anope.”

22 [m]Mameiba oya, ne tobod nedne, meoya oma den ane yenan onedna.

Poru Anoiviwa Romu Amdau Aitanwa

23 Gare mame, ne nau atanwa arawa me mapa at da sira onan di, sira watavit ampa ne ye yau yemtan oya anoeni. 24 Ne at Spein aneknawa me ne oneg guniyap uwatna. Kuiyawa ne imunap anonawa, guniyap waketna kum kusida, sira nonenmagawa degadega gumbe apenam watna, sira yaunekpe anetna, meve ne me apa anekna. 25 [n]Megara gare mame, ne Jerusarem angetan eni iyayapan iyakaisi gumbo nau atan oya. 26 [o]Kuiyawa at Masedonia ge at Akaia igiyawa degadega gumbe puyo agoniyaya, pukpuk wagawag igiyawa mu iyayapan iyakaisi igiyawa Jerusarem apa wakeyawa, mu yapowo wakeyawa munan. 27 [p]Mu degadega gumbe aya, sira mu iyayapan munan nau muma auya. Guwawa gumbe, Ju onan igiyawa mu iyayapan gumbo divi da auya, meoya mu tawara gumbe waita muntanit di. 28 Meoya namu ne me atna, magawa mame muntna, ivi yenan amdau onetna sira at Spein anekna. 29 [q]Ne mamaib anotumat eni, ne yenan amdau onetnawa, ne Keriso waribiyaeba noidauwanewa yenan aug onetna.

30 [r]Tatangwanen. Ne nonenmagawa gumbe, Ayapan numa Iesu Keriso gumbe sira Guwawa baiganeba gumbe nun veni. Ne nenanwa nun veni, garawapa ye gaibu nenan yusipamit God gumbe nun waigimiya. 31 Ne imunap, ne oma ane waita nekpe, anotumat onan igiyawa Judia apa gumbo. Sira ne imunap, ne nau neuma Jerusarem oya eniwa, me oya iyayapan iyakaisi mu bainda wag aupe. 32 Me onanapeve, God anoanowawa gumbe, degadega gumbe yenan ongetan anoeni. Sira guniyap nonenwa emtan anoeni. 33 Ne imunap Yum Goddeba me ye undag guniyap wakeigimpe. Amen.

<- Romu 14 Romu 16 ->