1 Kar mɨgɨrɨgɨar Ikiavɨra Itir God Israelia bagha anɨngizim. Ikiavɨra Itir God overiam ko, nguazimɨn ingarigha, gumazamizibar ingarigha, ikɨrɨmɨrir angamɨra itim me ganɨngi. A kamaghɨn mɨgei, 2 “Kɨ Jerusalem damightɨ a wain itir kavɨn mɨn otogham. Eghtɨ kantrin igharazir an boroghɨn ikia, a gasɨghasɨghasava amiba, me mati gumazir wainɨn kavɨn kam amegha onganiziba. Me mɨdorozim bagh Jerusalemɨn nguibar ekiamɨn mangɨva, me Judan nguibar dozir igharaziba bar da sara ekɨarugham. 3 Dughiar kam otogh gɨvaghtɨ, kɨ Jerusalem damightɨma a dagɨar bar osɨmtɨzimɨn mɨn otogham. Eghtɨ kantriba bar a ko mɨsoghsɨ uari akuvagh, me uari ikuvigham, mati gumazim dagɨar osɨmtɨzir kam fava mɨzazim isi. 4 Kɨ Ikiavɨra Itir God, kɨ dughiar kamɨn apanibar hoziabar amightɨ, da bar atiatigham, eghtɨ dagh isɨn apiazir gumaziba bar onganigham. Kɨ Judabagh eghuva, men apanibar hoziabar amightɨ dar damaziba bar okavigham. 5 Eghtɨ Judan gumazir dapaniba bizir kamɨn ganigh, uarira uariv kɨm suam, ‘God, a Ikiavɨra Itir Godɨn Gavgaviba Bar Itim, a gavgavim uan gumazamizir Jerusalemɨn itibagh anɨngi.’*Hibrun akam deragha akar kamɨn mɨngarim abɨghizir puvatɨ.

6 “Dughiar kamɨn kɨ Judan gumazir dapanibar amightɨ, me mati tuzim dafogha isi moghɨn, o mati witɨn azenir bar mɨsɨngizim dafogha isia mɨzariaba zui. Eghtɨ kantrin men boroghɨn itiba da bar gɨvagham. Eghtɨ Jerusalemɨn nguibar ekiamra, a itir danganimra ikɨvɨra ikiam.

7 “Kɨ Ikiavɨra Itir God, kɨ Judan mɨdorozir gumazibar amightɨ, me faraghɨvɨra apaniba abɨnigh ziar ekiam iniam. Eghtɨ Devit uan ovavir boriba ko, Jerusalemɨn gumazamiziba, men ziar ekiam, Judan gumazamizibar ziar ekiam gafighan kogham. 8 Dughiar kamɨn kɨ Ikiavɨra Itir God, kɨ Jerusalemɨn gumazamiziba geghuvam, mati gumazim oramɨn uabɨ modi. Kɨ gavgavim me danɨngtɨ, gumazir mɨdorozibar gavgavizir puvatɨziba, me Atrivim Devitɨn mɨn gavgavigham. Eghtɨ Devitɨn ovavir borir gɨn otivamiba, me, men gumazir dapanibar ikiam, eghtɨ me mati Ikiavɨra Itir Godɨn ensel o God uabɨ, egh me, me geghuvam. 9 Eghtɨ dughiar kamɨn, kantrin igharazir Jerusalem ko mɨsoghava amiba, kɨ bar dagh asɨghasɨgham.”

10 Jeremaia 31:9; Akar Mogomem 1:7Ezɨ Ikiavɨra Itir God ua ghaze, “Kɨ Devitɨn ovaviba ko, Jerusalemɨn nguibamɨn itir gumazamizir igharaziba, kɨ me damutɨ, me uan navir averiabar aven apangkuvir arazim ko, God ko mɨgeir arazimɨn gɨn mangam. Egh gumazir me afuzimɨn ruazim, me an ganigh a bagh bar puv aziam. Mati gumazim otarir ivariamra itima, an aremezɨ, an a bagha puvɨram azi moghɨn, me bar osemegh puvɨram aziam.†Hibrun akam deragha akar kamɨn mɨngarim abɨghizir puvatɨ. Ekiam faragha kamaghɨn mɨgɨa ghaze, Israelia Godra rua, egha a gɨn akam giragha kamaghɨn mɨgɨa ghaze, me gumazir igharazim bɨrazɨ, an areme. Fofozir gumazir maba kamaghɨn nɨghnɨgha ghaze, God uabɨ me bagh amadazir gumazim me a mɨsoghezɨ an areme. Fofozir gumazir maba kamaghɨn nɨghnɨsi, faragha mɨgɨrɨgɨar igharazim iti, ezɨ me gɨn mong akam pazav an osiri. Jon 19:37 ko Akar Mogomem 1:7 mɨgɨrɨgɨar otevir kamning, Kraisɨn otozir bizimɨn ababanim. 11 Dughiar kamɨn Jerusalemɨn nguibamɨn azirakar bar ekiam an aven otogham. Mati, me fomɨra Megidon danganir zarimɨn ikia, asem Hadatrimon bagha bar puvɨram azi moghɨn, men azirakam an mɨrara mangam.‡Fofozir gumazir avɨriba kamaghɨn nɨghnɨsi, Hadatrimon, an aser mamɨn ziam. Gumazamizir an ziam feba, me nɨghnɨzir gavgavim an ikia ghaze, an azenibar zurara dar dughiar vamɨran aremegham, eghtɨ me a bagh puvɨram aziam. Egha gɨn, me ghaze, a uam angamɨra iti. 12-14 Ikɨziba bar, me vaghvagh an aghuimazimɨn ikɨva aziam. Devitɨn ikɨzimɨn adarazi uari baghvɨra ikɨtɨ, Natanɨn ikɨzimɨn adarazi uari baghvɨra ikɨtɨ, Livain ikɨzimɨn adarazi uari baghvɨra ikɨtɨ, Simein adarazir ikɨzim uari baghvɨra ikɨtɨ, eghtɨ ikɨzir igharaziba bar moghɨram aziam. Ikɨziba bar vaghvagh uari akuvagham, eghtɨ men gumaziba uari baghvɨra ikɨva azitɨma, men amiziba uari baghvɨra ikɨva aziam.

<- Sekaraia 11Sekaraia 13 ->