11
Atrivir kuraba mati temer kuraba
1 O Lebanonɨn gumazamiziba, avim ian temer sidabar isigham,
kamaghɨn amizɨ, ia tuavim apɨran markɨ,
ia uan tiar akaba kuigh.
2 Sidan temeba iregha gɨfa, temer kaba ziar ekiaba iti,
da ikuvigha gɨfa.
Kamaghɨn amizɨ, painɨn temeba ia azi.
Me ruarir arɨzimɨn temeba okegha gɨfa,
kamaghɨn amizɨ, ia Basanɨn itir okɨn temeba ia azi.
3 Atrivibar gavgaviba ko, men ziar ekiaba gɨfa,
kamaghɨn amizɨ, men naviba bar osemezɨ, me azi.
Ia oragh, atriviba pamtemɨn arava azi.
Me mati laionba Jordanɨn Faner mɨriamɨn moga itir ruarir ekiam, me an temer ekiaba okava,
a gasɨghasɨghizɨma da aroi.
God, uan gumazamizibar garir gumazir dapanir guar pumuningɨn mɨgei
4 Egha Ikiavɨra Itir God, nan God kamaghɨn na mɨgei,
“Nɨ sipsipbagh eghuvir gumazimɨn mɨn damu.
Sipsipɨn kaba dar ghuaviba dav sogh dar amasa.
5 Sipsipɨn kabar ghuaviba dav sogha ghaze,
‘E ti arazir kuram gamir puvatɨ.’
Me sipsipbav sogha, dar tuziba dagɨaba bagha da amagava, dagɨaba isa ghaze,
‘E dagɨar gumazibar otivigha gɨfa.
Kamaghɨn amizɨ e Ikiavɨra Itir Godɨn ziam fam.’
Ezɨ sipsipbagh eghuvir gumaziba me uaghan, sipsipbar apangkuvir puvatɨ.”
6 Ikiavɨra Itir God kamaghɨn mɨgei,
“Kɨ nguazimɨn gumazamizibar apangkuvighan kogham.
Kɨ uabɨ vaghvagh me isɨ men atriviba ko, men adarazir agharibar arɨgham.
Eghtɨ me pazavɨra me damuam, mati sipsipɨn ghuaviba uari pazavɨra me gami.
Atriviba ko, men adarazi pazavɨra me damutɨ, kɨ men akuraghan kogham.”
7 Ezɨ kɨ gumazir bizibagh iveza da amadiba bagha, sipsipbagh eghuvir gumazimɨn mɨn oto.
Kar sipsipɨn me mɨsuegh damasava amiba.
Ezɨ kɨ sipsipbagh eghuvir gumaziba suizir aghorir pumuning ini.
Aghorir mam, kɨ ziam Apangkuvim a gatɨgha,
igharazim, kɨ Navir Vamɨra a gatɨ.
Kɨ aghorir kamningɨn suiragha,
sipsipɨn okoruar kamɨn gari.*Hibrun akam deragha akar kamɨn mɨngarim abɨghizir puvatɨ.
8 Egha kɨ, sipsipbagh eghuvir gumazir 3plan atara men aghua.
Ezɨ me uaghan na gifongezir puvatɨ.
Ezɨ iakɨnir vamɨran aven kɨ me batoke.
9 Egha kɨ kamaghɨn sipsipɨn okoruar kam mɨgei,
“Kɨ ua ia geghuvir gumazimɨn ikian kogham,
eghtɨ me aremeghsɨ tina ginabaghtɨ, an aremegh.
Eghtɨ me tina gasɨghasɨghasa nɨghnɨsi, me a gasɨghasɨgh.
Eghtɨ te mɨseveaghɨrɨgha iti, me uari uan inivafɨzibar amɨ!”
10 Kɨ gumazamizir kaba koma amizir Akar Dɨkɨrɨzir Gavgavim aghorasava amua,
aghorir kɨ ziam Apangkuvim a gatɨzim,
kɨ a inigha anepɨri.
11 Kamaghɨn amizɨma, Akar Dɨkɨrɨzir Gavgavir kam dughiar kamra gɨfa.
Ezɨ bizir kɨ amizibar aven, gumazir bizibagh iveza da amadiba nan ganigha fo,
kar Ikiavɨra Itir God me mɨgei.
12 Matyu 26:15Matyu 27:9-10Ezɨ kɨ kamaghɨn me mɨgei,
“Ia nan ivezim na danɨngɨsɨ, ia na danɨng. Puvatɨghtɨ markɨ, ia uari.”
Ezɨ me 30plan silvan dagɨaba isa na ganɨngi.
13 Gumaziba ghaze, kɨ ingangarir gumazir kuram.
Egha me ivezir bar muziarim na ganɨngi.
Ezɨ Ikiavɨra Itir God kamaghɨn na mɨgɨa ghaze,
“Nɨ dagɨaba isɨva Godɨn Dɨpenimɨn dagɨaba arɨzir danganim datɨgh.”
Ezɨ kɨ 30pla silvan dagɨaba inigha Godɨn Dɨpenimɨn dagɨaba arɨzir danganimɨn da atɨ.
14 Egha kɨ gɨn, aghorir namba 2 apɨri, aghorir kam kɨ ziam Navir Vamɨra a garɨsi.
Ezɨ arazir kam kamaghɨn men akagha ghaze,
Judaba ko Israelia, uari abigha ikɨzir pumuningɨn oto.
15 Ikiavɨra Itir God ua kamaghɨn na mɨgei,
“Nɨ ua sipsipbagh eghuvir gumazimɨn ikɨ,
egh dughiar kamɨn nɨ sipsipbagh eghuvir gumazir kuramɨn mɨn damu.
16 Guizbangɨra, kɨ uan gumazamizibar ganasa gumazir mam atɨ,
me mati sipsipɨn okoruar mam.
Ezɨ gumazir kam sipsipbar tongɨn dar ikuvizibar akurvazir puvatɨ,
egha a uaghan sipsipɨn ovengeziba tong da buria dar deir puvatɨ.
A uaghan dar duaba nozir puvatɨ, egha deravɨra itiba, a dagheba dagh anɨdir puvatɨ.
Bar puvatɨ.
A mɨkarziba sara itiba, a uabɨ dar tuziba apava
dar duiaba ko, puziba sara bar da asigha da ame.
17 O sipsipbagh eghuvir gumazir bar kurar pura sipsipba kavkɨrim,
an apaniba izɨ an agharim ko damazir agharir guvimɨn itim mɨsogh
an gavgaviba bar da agɨvagham.
Eghtɨ an agharim an amɨraghtɨma,