7
Gumazir igiamɨn onger akam
1 O kɨ ifongezir amizim, nɨ bar amizir igharazibagh afira,
egha mati atrivimɨn guivim.
Nɨ dagarir asuaba aghuizɨ,
nɨn dagarimning bar aghungi.
Nɨn oghɨriamningɨn ganganimning, bar dera,
mati nedazir mamning, fofozir gumazim dagɨar aghuimɨn aning aghore.
2 Nɨn overapanim,
mati itarir mam, me wainɨn dɨpam ko pauran isɨngtɨzim verezɨ, an a gizɨfa.
Nɨn navim bar dera,
mati witɨn pozir mam, me akɨmarir aghuaribar an kuruke.
3 Nɨn otemning bar dera,
mati asɨzir dian atiar aghuarir pumuning.
4 Nɨn fɨragharim bar dera,
mati tauan ruarir ghurghurim.
Nɨn damazimning bar dera,
mati dɨpar akarer muziarir Hesbonɨn nguibar ekiamɨn tiar akamɨn boroghɨn itimning.
Nɨn atinim bar dera,
mati Lebanon geghuvir gumazibar tauan ruarim.
Me an ikiava, Damaskusɨn nguibar ekiam geghufi.
5 Nɨn dapanim nɨn namnam gisɨn ikia bar dera,
mati atrivimɨn dapanir asuam,
egha mati Karmelɨn Mɨghsɨar orazim.
Nɨn dapanir arɨzir gɨrakɨrangɨn guraghav itim, pigha ruaragha bar deragha taghtasi,
mati atrivimɨn inir aghuim.
Egh nɨn dapanarɨzir kam,
atrivim damutɨ, a nɨ gakuegh, nɨn kalabuziar gumazimɨn mɨn otogham.
6 O nan amizir kɨ ifongezim, nɨ amizir bar dirim.
Kɨ bar nɨ gifonge,
ezɨ nɨn biziba bar na gamima,
kɨ bar akonge.
7 Nɨn ruarim bar dera,
mati iruem voroghɨra tughav iti.
Ezɨ nɨn otemning,
mati iruer foroziamning.
8 Kɨ ghaze, kɨ iruer kamɨn mavanang,
egh an dagheba iniam.
Kɨ nɨn otemningɨn gari,
aning mati wainɨn orozaghar ovɨzir avɨriba itimning.
Ezɨ nɨn akamɨn otivir mughuriam,
mati ter ovɨzir mughuriar aghuim itim.
9 Nɨ nan torima bar dera,
mati wainɨn bar aghuim, nan amizimɨn akatorimɨn amɨraghavɨra emɨri.
Nɨ nan tora,
mati ga uaning inigha akua wainɨn isɨngtɨzim api.
Amizir igiamɨn onger akam
10 Nan roroar gumazir kɨ bar ifongezim,
kɨ an amuim,
ezɨ a bar na gifonge.
11 O nan roroar gumazir kɨ bar ifongezim,
nɨ na ko izɨ.
Ga dɨmagarimɨn ruarimɨn mangɨ,
egh nguibar dozibar ikɨ dakuam.
12 Egh mɨzaraghara dɨkavigh mangɨ
wainɨn ikarɨzir azenibar ganam.
Dar atiba ko akɨmariba ti oneghama?
Egh uaghan pomigranetɨn ovɨzir aghuiba ber temebar ganam,
dar akɨmariba ti onez, o puvatɨ?
Ga wainɨn azenir kamɨn ikɨ,
egh kɨ uabɨ isɨ nɨ danɨng kamaghɨn nɨn akagham,
kɨ bar nɨ gifonge.
13 O nan roroar gumazir kɨ bar ifongezim,
kɨ temer ovɨzir aghuiba ini,
ter ovɨzir kaba e dav gɨa ghaze, amiziba an ovɨziba isa akavsiar arazim gamua da apima,
dar mughuriam gumazim damutɨ, an amuim ko daku, egh boriba batam,
kɨ da isa tiar akamɨn boroghɨn da atɨ,
eghtɨ nɨ dar amam.
Kɨ fomɨra maba ini,
egha maba kɨ datɨrɨghɨra da ini.
Kɨ uan ifongiam isa nɨ baghavɨra anetɨ.