Akɨnafarir namba 3
73
(Onger Akaba 73--89)
Gumazir arazir kurabagh amiba, God mɨzazim me gasam
Asap ighiar kam osiri.
1 God bar guizbangɨra Israelian dera.
Egha an damazimɨn zuezir gumazamiziba, a bar men dera.
2 Kɨ guizbangɨra arazir kuramɨn irasa bar gefi.
Nan suemning mati apɨghsighizɨ,
kɨ uan nɨghnɨzir gavgavim ataghɨraghasava ami.
3 Onger Akaba 37:1; Jeremaia 12:1Gumazir maba uari fa dagɨar avɨriba isi.
Kamaghɨn amizɨ, kɨ gumazir kurar kabar bizibar gara,
nan navim da bagha dɨkafi.
4 Men mɨkarziba mɨzaziba puvatɨzɨ me dera.
Me gavgavigha mɨkarziba deraghvɨra ikia naviba fiki.
5 Me gumazir igharaziba osɨmtɨziba ateri moghɨn, me osɨmtɨziba aterir puvatɨ.
Gumazir igharaziba aterir osɨmtɨzir kaba
bar me bativir puvatɨ.
6 Kamaghɨn amizɨ, me uari fer arazir kam mati, me deragha uan mɨkarzibar kurti.
Me pura gumazir igharazibav sogha me gasɨghasɨsi.
Ezɨ arazir kam me avara, mati me korotiaba isa uan mɨkarziba ave.
7 Men nɨghnɨziba ko navibar aven,
arazir kurar avɨrir me damuasa ifongeziba otivaghiri.
8 Me dɨbovir akabar gumazir igharazibav gɨa uari fa,
arazir kurabar me damuasa nɨghnɨzibagh ami.
9 Me mɨzer otuaribar Godɨn uan Nguibamɨn itimɨn mɨgei.
Me uarira uan ziaba fe,
gumazamiziba men gɨn mangasa me arazir kam bagha bar gavgafi.
10 Me kamaghɨn damutɨ,
Godɨn gumazamiziba men akabagh ifuegh,
nɨghnɨzir gavgavim dar ikiam.
11 Gumazir kurar kaba ghaze, “E amir biziba God dagh foghan kogham.
Godɨn Bar Pɨn Itim,
en arazir e amiba, a tam bativsɨ damuva avegham.”
12 Gumazir kurar kabar arazim kamakɨn, men dabirabim derazɨ, me bizir avɨriba ikia,
egha ua inivɨra ikiasa.
13 Kɨ uabɨ bar deravɨra uan navir averiam geghuvima, a Godɨn damazimɨn zuezɨ,
kɨ arazir kuratabagh amizir puvatɨ.
Nan arazir kam, a ti pura ghuz o?
14 O God, nɨ arueba ko dɨmagaribar mɨzaziba na ganɨgavɨra iti.
Ezɨ osɨmtɨzir kaba, mɨzarazibar fofoziba na ganɨdi.
15 Kɨ gumazir kurabav gei moghɨn, nɨn gumazamiziba akar otevitam me mɨkemeghtɨ,
me okam nɨghnɨgham.
Kɨ kamaghɨn amizir puvatɨ.
16 Kɨ mɨghɨgha osɨmtɨzir kabagh nɨghnɨgha,
dar mɨngaribagh foghfoghasa amuava avenge.
17 Onger Akaba 27:4; 37:38O God, kɨ kamaghɨn amua ghua amɨragha nɨn Dɨpenimɨn aven ghu.
Kɨ nɨn Dɨpenimɨn aven ikia nan nɨghnɨzim derazɨ,
kɨ bizir gumazir kuraba bativamibagh fofosi.
18 Guizbangɨra, tuavir me aruiba nɨ dagh ami da bar apɨghsɨki,
egha me gami me ira bar moghɨra ikufi.
19 Me bar moghɨra ikuvamin arazir kam, a bar zuamɨra me batogham.
Eghtɨ me ovengamin arazir kam bar moghɨra men ikuvigham.
20 O Ekiam, me mati gumazim irebamɨn ganizɨ, an amɨmzaraghan pura gɨfa.
A mɨzarazimɨn irebam gɨnɨghnɨzima, a uam an nɨghnɨzimɨn itir puvatɨ.
21 Kɨ faragha bizir kabagh nɨghnigha nan navim bar oseme.
Mati, kɨ bizir kurar mam amezɨ, nan navir averiam puvɨra na gami.
22 Nan nɨghnɨzim nan otevezɨ, kɨ deragha nɨn arazibagh fozir puvatɨ.
Kɨ asɨzir atiar nɨghnɨziba puvatɨzimɨn mɨn, nɨn damazimɨn an arazibagh ami.
23 Bar guizbangɨra, kɨ nɨ ko zurara iti,
ezɨ nɨ nan dafarimɨn suira.
24 Onger Akaba 48:14; 49:15; 58:11Nɨ uan akar aghuimɨn, tuavir kɨ daruamibar nan akakasi.
Nɨ gɨn na inigh mangɨtɨ, kɨ nɨ ko nɨn Nguibamɨn ikiam.
25 O God, tina ua nɨn Nguibamɨn ikɨ deragh nan ganam?
Nɨ bar uabɨra, ua gumaziba puvatɨ.
Kɨ bar nɨ gifonge.
Kɨ nguazir kamɨn ua bizitam gifongezir puvatɨ.
26 Onger Akaba 16:5; 40:12; 84:2Nan nɨghnɨzim ko nan mɨkarzim ua gavgaviba puvatɨghtɨ,
God, nɨ uabɨ gavgavim nan navir averiam danɨng.
Kɨ ua gumazir igharazitamɨn ganan kogham.
Nɨ bar uabɨra kɨ nɨn ganam.
27 Bar guizbangɨra, gumazamizir akɨrim ragha nɨ gasaraziba,
me bar moghɨra gɨvagham.
Gumazir faragha nɨn gɨn ghua datɨrɨghɨn nɨ ataghiziba,
nɨ me gasɨghasɨgham.
28 Onger Akaba 14:6; 40:5; Hibru 10:22; Jems 4:8O God, kɨ nɨn boroghɨra itir arazir kam, a bar dera.
Ekiam, nɨ Ikiavɨra Itir God, nɨ guizbangɨra nan dɨvazir gavgavim,
ezɨ kɨ nɨn aven modi.