Onger Akaba 62

God uabɨra deragha en gara e geghufi

Devit igiar kam osiri.

An onger akar kabar faragha zuir gumazim Jedutun gɨnɨghnɨgha, onger akar kam osiri.

1 Godra, kɨ nɨghnɨzir gavgavim an ikia a baghavɨra mɨzua iti.

Anarɨra, a nan akurvazima kɨ angamɨra ikiavɨra iti.

2 Godra, a nan dagɨamra, ezɨ kɨ an aven modima, a nan akurvasi.

A nan dɨvazir gavgavimɨn mɨn iti, ezɨ kɨ akongan kogham.

3 Ia dughiaba manmaghɨn, na gasɨghasɨghasa na bagha izi?

Ia ghaze, kɨ dɨvazir ghurimɨn mɨn irɨgh bar dɨpɨrighiregh bar gɨvagham.

4 Kɨ ziar ekiam iti, eghtɨ ia na abɨragh nan ziar ekiar kam gasɨghasɨghasa.

Ia ifavarir arazim bar a gifonge.

Ia uan akabar God deragh na damuasa ia a mɨgei,

ezɨ ian navir averiaba ghaze,

“God a gasɨghasɨkigh.”

(Ighiam gamua an suiam
atugha avughsegha ua
ighiam gami.)

5 Kɨ nɨghnɨzir gavgavim Godra ikia a baghavɨra iti.

Anarɨra deragha nan garima, kɨ angamɨra ikiavɨra iti.

6 Godra, a nan dagɨam, ezɨ kɨ an aven modima, a nan akurvasi.

A nan dɨvazir gavgavimɨn mɨn iti, ezɨ kɨ akongan kogham.

7 God uabɨra nan akurvagha ziar ekiam na ganɨdi.

A nan dagɨamɨn mɨn itima, kɨ an aven modi.

8 Nan adarasi, ia zurara nɨghnɨzir gavgavim Godɨn ikɨ.

Egh osɨmtɨzir ia itiba ko nɨghnɨzir ia itiba, ia bar da isɨ a danɨng.

E ia a bagh mangɨ an aven mongegh deraghvɨra ikiam.

(Ighiam gamua an suiam
atugha avughsegha ua
ighiam gami.)

9 Gumazir kɨniba mati, amɨnim pura akamɨn otiva zui.

Gumazir ziaba itiba, me uaghan pura biziba.

E men osɨmtɨziba tuisɨgh fogham, me guizbangɨrama osemes ti.

Men osɨmtɨziba akamɨn otivir amɨnim ko magh ghue.

10 Ia mɨdorozir arazim ko okɨmakɨar arazim kamaghɨn aning gɨnɨghnɨghan markɨ,

“Aning dera, aning e damightɨ e dagɨar avɨriba ikiam.”

Ian dagɨaba ko ian biziba bar avɨrasemeghtɨ, ia kamaghɨn mɨkɨman markɨ,

“Bizir kaba darara en gavgaviba.”

11 Nan orarazim, God dughiar avɨribar kamaghɨn mɨgei,

“Kɨ God, kɨ gavgavir ekiam iti.

12 Kɨ zurara gumazamizibar apangkufi.

Ekiam, nɨ gumazamiziba amir ingangariba baghvɨra ivezim isɨ me danɨngam.”