Link to home pageLanguagesLink to all Bible versions on this site
51
Gumazim uan arazir kuraba gɨn amangasa God ko mɨgei
Devit onger akar kam osiri.
A gumazir onger akabar faragha zuim gɨnɨghnɨgha an osiri.
Devit Batseba ko arazir kuram gamizɨ, Godɨn akam inigha izir gumazim Natan, iza akam a gasara. Ezɨ Devit uan arazir kuram gɨnɨghnɨgha ighiar kam osiri.
1 [a]O God, nɨ uan apangkuvir arazimɨn gɨn mangɨ,
egh nan apangkufigh.
Nɨ apangkuvir ekiar kam nan ikɨ,
egh nan arazir kuraba batokegh.
2 [b]Gumazamiziba rua ua zue moghɨn,
nɨ na rueghtɨ nan arazir kuraba mangɨghtɨ
kɨ zueka.
 
3 [c]Kɨ fo, kɨ arazir kuram gamigha gɨfa.
Egha arazir kurar kɨ amizir kam,
kɨ a gɨnɨghnɨghavɨra iti.
4 [d]Kɨ bar nɨrara, nɨn damazimɨn arazir kuram gami.
Nɨ uan arazir aghuimɨn gɨn ghua na isa kot gatɨgha,
nan arazir kuraba bagha ivezir kuram na ganɨngi.
5 [e]Kɨ uan amebamɨn navir averiamɨn aven ikiavɨra itima,
arazir kuraba nan iti.
Arazir kurar kaba nan mɨkarzimɨn ikiavɨra itima
nan amebam na bate.
6 [f]Kɨ fo, nɨ kamaghɨn ifonge, kɨ uan nɨghnɨzimɨn aven nɨn guizɨn akamɨn gɨn mangam.
Kamaghɨn, nɨ uan nɨghnɨzir aghuim isɨ
nan navir averiam datɨgh.
 
7 [g]Nɨ hisopɨn ter aguar muziaritam inigh a isɨ dɨpam darugh,
egh nan mɨkarzimɨn a kavamadaghtɨ, kɨ nɨn damazimɨn zueka.
Egh na rueghtɨ kɨ bar zuegh nir ghurghurimɨn mɨn bar ghurghurika.
8 [h]Bar guizbangɨra, nɨ bar na dɨkabɨragha egha nan arazir kuraba ikaragha gɨfa.
Datɨrɨghɨn nan navir averiam deraghtɨ kɨ bar akuegham.
9 [i]Nɨ nan arazir kuraba ua dar ganan markɨ.
Nɨ da batuegh ua adagh nɨghnɨghan markɨ.
 
10 [j]O God, nɨ nan navir averiam damightɨ a zuegh ua igiamɨn otogh.
Eghtɨ nɨn ifongiar aghuim nan aven izɨtɨ kɨ nɨrara ganam.
11 [k]Nɨn Duam nan aven iti,
ezɨ nɨ uabɨn boroghɨn na batuegh, na da uan duam inian markɨ.
12 [l]Nɨ faraghavɨra ua na inizɨ kɨ nɨ bagha bar akonge.
Nɨ datɨrɨghɨn bar akongezir arazir kam na danɨngigh.
Kɨ nɨn akabar gɨn mangamin ifongiar kam, nɨ ua na danɨngigh.
 
13 [m]Eghtɨ kɨ gumazir arazir kurabagh amiba nɨn akamɨn me mɨkɨmam,
eghtɨ me nɨ bagh izam.
14 [n]O God, nɨ nan Akurvazir Gumazim,
kamaghɨn nɨ nan akuraghtɨ, kɨ uan arazir kurar kam bagh ovengan kogham.
Kamaghɨn amizɨ, nɨ nan akurazir bizir kam bagh,
kɨ pamten ighiabar amuam.
15 [o]O Ekiam, nɨ nan akuraghtɨ,
kɨ deragh eghaghanibagh fogh nɨn ziam fam.
16 [p]Kɨ fo, nɨ kamaghɨn aghua, kɨ asɨzim inigh izɨ nɨ bagh an ofa damuam.
Kɨ ofa damusɨ asɨzim mɨsuegh a tuaghtɨ, a bar isi mɨghɨran nɨ aghua.
17 [q]O God, nɨ kamaghɨn ifonge, kɨ ofan mɨn bar uabɨ abɨragh bar nɨn apengan ikiam.
Gumazamizir uari abɨra navibagh iziba,
nɨ akɨrim ragha me gasir puvatɨ.
 
18 O God, nɨ uan ifongiamɨn gɨn mangɨ Saionɨn gumazamizibar akuragh,
egh Jerusalemɨn nguibamɨn dɨvaziba uam adar ingarightɨ da tuifigh.
19 Dughiar kamɨn me ofan aghuir nɨn damazimɨn deraziba ko, asɨzim tuaghtɨ a bar isi mɨghɨrighamin ofa,
me da isɨ nɨ danɨngam.
Me uan bulmakaun apuriba inigh nɨn ofa gamir dakozimɨn izɨ
nɨ bagh dar ofa damuam.

<- Onger Akaba 50Onger Akaba 52 ->