Link to home pageLanguagesLink to all Bible versions on this site
27
Godɨn ziam fava a ko mɨgeir mɨgɨrɨgɨaba
Devit onger akar kam osiri.
1 [a]Ikiavɨra Itir God, a nan angazangarim ko nan Akurvazir Gumazim.
Ezɨ kɨ gumazitamɨn atiatingan kogham.
Ikiavɨra Itir God, a dɨpenir gavgavimɨn mɨn na modogha na geghuva nan garima,
kɨ atiatir puvatɨ.
2 [b]Mati afiam asɨzimɨn tuzibar amasava ami moghɨn,
nan apaniba na gasɨghasɨghsɨ izɨva,
bizibagh asaghpor iregham.
3 [c]Mɨdorozir gumazir avɨriba bar na ekɨarughamin dughiamɨn, kɨ atiatingan kogham.
Nan apaniba na ko mɨsoghsɨ izamin dughiamɨn,
kɨ nɨghnɨzir gavgavim Godɨn ikɨ egh tugh gavgavigham.
 
4 [d]Kɨ bizir vamɨra bagha Ikiavɨra Itir Godɨn azaragha gɨfa.
Bizir kɨ bar ifongezimra kara:
kɨ angamɨra itir dughiamɨn, kɨ an Dɨpenimrama aven ikiam.
Kɨ an ganganir aghuimɨn gan an boroghɨn ikɨ bar akueghasa.
Kɨ an Dɨpenimɨn ikɨ a baghvɨra ikɨva an nɨghnɨzim gɨfofoghsɨ an azangam.
5 [e]Eghtɨ osɨmtɨziba otivamin dughiamɨn
a uan Dɨpenimɨn bar deravɨra na modogham.
A na isɨ uan Purirpenimɨn aven na modogham.
A na isɨ dagɨar gavgavimɨn pɨn mar na afagham.
6 [f]Nan apanir na okarigha itiba, kɨ bar me abɨragham.
Egh bar akongegh dɨmɨva arang an Purirpenimɨn a bagh ofa damuam.
Egh onger akabar amu Ikiavɨra Itir Godɨn ziam fam.
 
7 [g]O Ikiavɨra Itir God, kɨ nɨn deir dughiamɨn,
nɨ nan kuarkuvigh nan mɨgɨrɨgɨaba baragh na ikarvagh.
8 [h]O Ikiavɨra Itir God, nɨ kamagh na mɨgɨa ghaze,
“Nɨ bar na nan boroghɨra izɨ na baghavɨra ikɨ
na gɨfofoghsɨ nan azangsɨgh.”
Eghtɨ kɨ nɨ ko ikɨsɨ bar nɨn boroghɨra mangam.
9 [i]Nɨ uabɨ nan mongan markɨ.
Kɨ nɨn ingangarir gumazim, nɨ nan God, nan Akurvazir Gumazim.
Nɨ dughiar avɨribar nan akurvasi.
Nɨ nan atar nan aghuagh, egh na ataghɨraghan markɨ.
10 [j]Dughiar mabar nan amebam ko afeziam akɨrim na gasaragha nan aghuaghuasi,
ezɨ nɨ Ikiavɨra Itir God, nɨ na geghuva deragha nan gari.
 
11 [k]O Ikiavɨra Itir God, kɨ damuasa nɨ ifongezir araziba, nɨ dar nan sure damu.
Kɨ apanir avɨriba iti,
kamaghɨn nɨ tuavir aghuimra nan akaghtɨ kɨ an mangam.
12 [l]Nɨ na ateghtɨ nan apaniba na inigh me ifongezɨ moghɨn na damuan markɨ.
Me akar ifavaribagh amua egha atiatim na ganɨdi.
 
13 [m]Nɨghnɨzir gavgavir kam nan ikiavɨra itima, kɨ kamaghɨn fo,
kɨ nguazir kamɨn angamɨra ikɨ gantɨ,
God deraghvɨra uan gumazamizibar amuam.
14 [n]Nɨ nɨghnɨzir gavgavim Ikiavɨra Itir Godɨn ikɨ a bagh mɨzuam.
Nɨn navim osɨman markɨ.
Nɨ tugh gavgavigh mamaghɨra ikɨ mangɨtɨ
a izɨ nɨn akuragham.

<- Onger Akaba 26Onger Akaba 28 ->