Onger Akaba 16

Gumazim nɨghnɨzir gavgavim ikia God ko mɨgei

Devit onger akar kam osiri.

Onger akar kabar mam, me ziam Miktam, a garɨsi.

1 O God, nɨ deragh na geghuv egh nan gan.

Kɨ deraghvɨra ikiasa nɨ bagha iza nɨn aven modi.

2 Kɨ kamaghɨn Ikiavɨra Itir God mɨgɨa ghaze,

“Nɨ nan Ekiam.

Bizir aghuir kɨ datɨrɨghɨn itiba,

da nɨn agharimrama otifi.”

3 Godɨn gumazamizir nguazir kamɨn itiba,

me bar gumazamizir aghuiba.

Kɨ me ko ikiasa bar akonge.

4 Gumazamizir aseba bagha ivemara zuiba,

me osɨmtɨzir avɨriba ateram.

Kɨ me ko uari akuv asebar ziaba fɨ,

asɨzibav sogh me ko ofa damuan aghua.

5 Ikiavɨra Itir God, nɨrara nana, bizir igharaziba ua puvatɨ.

Bɨzir kɨ oteveziba, nɨ da na ganɨdi.

Ezɨ nan ikɨrɨmɨrim nɨn dafarimɨn iti.

6 Kɨ bizir aghuiba nɨn dafarimɨn da ini.

Bar guizbangɨra, bizir kaba da bar guizbangɨra dera.

7 Ikiavɨra Itir God nan sure gamima, kamaghɨn kɨ an ziam fe.

Nan navir averiam dɨmagaribar nan sure gamima,

kɨ datɨrɨghɨn deraghavɨra nɨghnɨgha bar bizibagh fo.

8 Kɨ fo, Ikiavɨra Itir God zurara nan boroghɨra iti.

A bar roghɨra ikia gavgavim na ganɨdima,

kɨ atiatiava agoir puvatɨ.

9 Kamaghɨn nan navir averiam bar akonge.

Ezɨ nan duam bar akonge.

Ezɨ nan mɨkarzim bar bizitamɨn atiatir puvatɨ.

10 Kɨ fo, nɨ na ateghtɨ kɨ Gumazamizir Oveaghuezibar Nguibamɨn magɨran kogham.

Nɨ gumazir ua baghavɨra inabazim ateghtɨ,

a mozir konimɨn ikɨ kurighan kogham.

11 Nɨ uabɨ ikɨrɨmɨrir aghuarim iniamin tuavim nan akagha gɨfa.

Kɨ nɨn damazimɨn ikɨtɨ, nan navir averiam agorogem bar a gizɨvagham.

Kɨ nɨn boroghɨra ikɨ zurara bar akueghvɨra ikiam.