14
Gumazamizibar arazir kuraba
(Onger Akaba 53)
Devit onger akar kam osiri.
An onger akar kabar faragha zuir gumazim gɨnɨghnɨgha onger akar kam osiri.
1 Onger Akaba 10:4; 53:1Rom 3:10-12Gumazamizir onganiba uan navir averiabar aven nɨghnɨgha ghaze,
“God itir puvatɨ.”
Gumazamizir kaba, me bar gumazamizir kurabara.
Me bar moghɨra arazir aghuitam gamir puvatɨ.
2 Onger Akaba 33:13; 102:19Ikiavɨra Itir God uan Nguibamɨn pɨn ikia, nguazimɨn itir gumazamizibar garima,
men tav nɨghnɨzir aghuim ikia a gɨfofoghasa a buri,
ti puvatɨ.
3 Me bar tuavir aghuim ataki.
Me bar moghɨra ikuvigha magh gari.
Men tav arazir aghuitam bar a gamizir pu.
Bar puvatɨ.
4 Aisaia 64:7; Jeremaia 10:25; Amos 8:4Ikiavɨra Itir God kamaghɨn mɨgɨa ghaze,
“Gumazamizir arazir kuram gamiba, nɨghnɨzir aghuitam men itir puvatɨ.
Me bret apa anegevi moghɨn, me nan gumazamiziba agefi.
Egha me tong na ko mɨgeir puvatɨ.”
5 God gumazamizir an akam baragha an gɨn zuiba, a me ko iti.
Kamaghɨn amizɨ, gumazamizir arazir kurabagh amir kaba,
a me gɨnobaghtɨ me nɨghɨva akong bar atiatigham.
6 Onger Akaba 9:9; 142:5Gumazamizir onganarazibagh amiba, Ikiavɨra Itir God me akumakua deragha men garima, me an aven modi.
Kamaghɨn, gumazir arazir kurabagh amiba,
me onganarazibagh amir gumazamiziba damuasa mɨgeir bizibar ingaravati.
7 Jop 42:10; Onger Akaba 53:6; 126:1Kɨ kamaghɨn ifonge, Israelian akurvaghamin gumazitam Saionɨn nguibamɨn ikegh azenan izɨ.
Ikiavɨra Itir God, uan gumazamizibar akuraghtɨ me deravɨra ikɨtɨ, Jekopɨn ovaviba bar akuegham.