115
God uabɨra a guizbangɨra God
1 O Ikiavɨra Itir God, nɨ zurara bar en apangkuvigha mamaghɨra ikia,
egha e ataghɨrazir puvatɨ.
Kamaghɨn amizɨ, e zurara nɨn ziamra fam.
E uari uan ziaba fan kogham.
2 Manmaghɨrama amizɨ, Kantrin Igharazibar Gumazamiziba kamaghɨn en azangsɨgha ghaze,
“Ian God managh iti?”
3 Me kamagh fozir puvatɨ, en God uan Nguibamɨn iti,
egha a bizir tizim uan ifongiamɨn a damusɨ ifuegh, ana damuam.
4 Onger Akaba 135:15-18; Jeremaia 10:4-5; Akar Mogomem 9:20Kantrin Igharazibar Gumazamiziba, silva ko gol isa uan marvir guabar ingari.
Me uari uan dafaribar dar ingari.
5 Ezɨ marvir guar kaba, da akatoriba ikia egha mɨgeir puvatɨ,
Da damaziba ikia bizibar garir puvatɨ.
6 Da kuariba ikia, egha orazir puvatɨ,
egha atiniba ikia bizibav ghuriabagh amir puvatɨ.
7 Da dafariba ikia, bizibar suizir pu.
Da sueba ikia, egha aruir puvatɨ.
Da akaba akartɨ tiariba puvatɨgham.
8 Guizbangɨra, gumazir marvir guar kabar ingariba,
me uari marvir guar me ingarir kabar mɨn iti.
Gumazir nɨghnɨzir gavgavim marvir guabar itiba, me uaghan dar mɨn iti.
9 O ia Israelian gumazamiziba,
ia nɨghnɨzir gavgavim Ikiavɨra Itir Godɨn ikɨ.
A deragha ia gamua egha ian akurvasi.
10 O ia Aronɨn adarasi, ia ofa gamir gumaziba,
ia Ikiavɨra Itir God nɨghnɨzir gavgavim an ikɨ.
A deragha ia gamua ian akurvasi.
11 O ia gumazamizir Ikiavɨra Itir Godɨn atiatiba,
ia nɨghnɨzir gavgavim an ikɨ.
A uabɨra deragha ia gamua ian akurvasi.
12 Ikiavɨra Itir God zurara e gɨnɨghnɨgha mamaghɨra iti.
Egh a deravɨra e damuam.
A, e Israelia deravɨra e damuam.
Egh uaghan Aronɨn adarasi,
me ofa gamir gumaziba, a deravɨra me damuam.
13 Akar Mogomem 11:18; 19:5Gumazamizir Ikiavɨra Itir Godɨn atiatiba,
a deragh me damuam,
gumazamizir ziaba itiba ko ziaba puvatɨziba uaghara,
a deragh me damuam.
14 Kɨ ghaze, Ikiavɨra Itir God borir bar avɨriba,
ia ko ian gɨn otivamin ovavir boribar anɨngam.
15 Guizbangɨra, Ikiavɨra Itir Godɨn overiam ko nguazimɨn ingarizim,
a bar deravɨra ia damu.
16 Nguibar bar pɨn itim, kar Ikiavɨra Godɨn bizimra.
A nguazir kam isa gumazamizibagh anɨngi.
17 E fo, gumazamizir ariaghɨriba me uan nguibamɨn iraghue.
Egha Ikiavɨra Itir Godɨn ziam fer puvatɨ.
18 Ezɨ e datɨrɨghɨn angamɨra itir gumazamiziba,
e Ikiavɨra Itir Godɨn ziam mɨnabɨ
mamaghɨra ikiam.
Aleluia!