4
Ia fofozir aghuim ko nɨghnɨzir aghuim inigh
1 Nan boriba, kɨ ian afeziam, ia bar deraghvɨra nan aghuzir akam baragh,
egh ia mɨngariba izɨvazir akaba, deraghvɨra dagh fogham.
2 Aghuzir akar kɨ ia ganɨdir kam, a bar dera,
eghtɨ ia an suiragh gavgafigh.
3-4 Nan amebam borir igharazir tam batezir puvatɨ, a nararam ote, egha a bar na gifonge.
Ezɨ kɨ aghɨrimra itir dughiamɨn uan afeziamɨn dɨpenimɨn itima,
a nan sure gamigha kamaghɨn na mɨgei,
“Nan akam deraghvɨram a inigh uan navim datɨgh, egh an gɨn mangɨ, egh nɨ bar deraghvɨra ikiam.
5 Nɨ nɨghnɨzir aghuim ko fofozir aghuiba inigh.
Egh nɨ nan akam batogh a bakɨnɨghnɨghan markɨ.
6 Nɨ nɨghnɨzir aghuim ataghɨraghan markɨ.
Nɨ bar a gifongegh, eghtɨ a bar deraghvɨra nɨ geghuvam.
7 Matyu 13:44; Luk 10:42Nɨghnɨzir aghuim, a bar bizibar faraghavɨra iti.
Guizbangɨra, nɨ gɨn bizir igharazir avɨriba iniam, ezɨ nɨghnɨzir aghuim a bar dagh afira, ezɨ nɨ a inisɨ pamtem ingar.
8 Nɨ nɨghnɨzir aghuim gifuegh pamtemɨn an suiragh,
eghtɨ a ziar ekiam nɨ danɨngam.
9 A kurukazir aghuimɨn mɨn nɨn dapanimɨn ikɨ,
egh a mati atrivimɨn dapanir asuamɨn mɨn ikiam.”
Tuavir aghuim ko tuavir kuram
10 Nan borim, nɨ bar deraghvɨra nan akam baragh,
egh nɨ dughiar bar ruarimɨn ikiam.
11 Kɨ nɨghnɨzir aghuimɨn nɨn sure gami,
egha nɨn akua tuavir aghuimɨn zui.
12 Nɨ tuavir kamɨn mangɨtɨ,
bizitam nɨn tuavim apɨrightɨ nɨ irɨghan kogham.
13 Aghuzir akar aghuim, a nɨn ikɨrɨmɨrimɨn mɨngarim.
Kamaghɨn nɨ zurara an suiragh deravɨram a geghuv, egh anetaghɨraghan markɨ.
14 Nɨ gumazir kurabar tuavimɨn mangan markɨ,
egh men arazibar gɨn mangan markɨ.
15 Egh nɨ bar moghɨra tuavir kam gitagh, akɨrim a gasaragh
mangɨ bar an saghon ikɨ.
16 Gumazir kuraba arazir kuratam damusɨ nɨghnɨgh egh dakuighan kogham.
Me arazir kuratam gumazir igharazitam damighvɨrama, egh me deraghvɨra dakuam.
17 Arazir kuram ko arazir gumazir igharaziba paza me gamim,
aning mati men daghem ko dɨpar me apimning.
18-19 2 Samuel 23:4; Matyu 5:14-15; Filipai 2:15Gumazir kurabar tuavim mɨtarmer bar ekiamɨn mɨn iti.
Gumazir kaba tuavir kamɨn ghua irava fozir puvatɨ, bizir manam men dagaribav tifi.
Ezɨ gumazir aghuibar tuavim mati aruem anaga isiragha,
angazangarim bar ekevegha ghua aruer arɨzimɨn tu.
20 Nan borim, nɨ deraghvɨra kuarim atɨgh
nan akam baragh.
21 Nɨ akar kam deraghvɨram an suiragh.
Egh a isɨ uan navim datɨgh.
22 Nɨ nan akam inigh, eghtɨ akar kam ikɨrɨmɨrir aghuim nɨ danɨngtɨ
nɨn mɨkarzim ghuamagheghtɨ, nɨ bar deraghvɨra ikiam.
23 Onger Akaba 44:21Ezɨ nɨghnɨzir aghuir nɨn ikɨrɨmɨrim akakazim, a nɨn nɨghnɨzimɨn otifi.
Kamaghɨn amizɨ nɨ zurara uan nɨghnɨzim deraghvɨram an gan.
24 Nɨ akar ifavariba ko akar kurabav mɨkɨman markɨ.
25 Nɨ tuavir nɨ mangamimra deraghvɨram an gan.
Egh nɨ tintinimɨn ganan markɨ.
26 Hibru 12:13Nɨ faragh deragh nɨghnigh, egh gɨn mangɨ bizibar amu.
Eghtɨ nɨn araziba bar deraghvɨram otivam.
27 Nɨ zuir tuavir aghuim, nɨ anetaghɨraghan markɨ.
Egh nɨ agharir guvim ko ikiriamɨn gɨn mangɨ arazir kuratam bar a damuan markɨ.
<- Aghuzir Akaba 3Aghuzir Akaba 5 ->