23
1 Egha Balam kamaghɨn Balak mɨgei, “Nɨ na bagh 7plan ofa gamir dakozibar ingarighɨva 7plan bulmakaun apuriba ko 7plan sipsipɨn apuriba inigh izɨ.”
2 Ezɨ Balam mɨkemezɨ moghɨn Balak ami. Egha aning bulmakaun vamɨra ko sipsipɨn vamɨra uaghara da isa, vaghvagha 7plan ofa gamir dakozibar dar ofa gami.
3 Egha Balam kamaghɨn Balak mɨgei, “Nɨ kagh ofan bar isia mɨghɨribar danganimɨn boroghɨn tughɨv ikɨ. Eghtɨ kɨ munagh mangɨ orarkɨ ganika, Ikiavɨra Itir God izɨ na batogham, o ti puvatɨgham. Kɨ fozir puvatɨ. A izɨ bizitam na mɨkemeghtɨ, kɨ an akamɨn gun nɨ mɨkɨmam.” Egha uabɨra ghua mɨghsɨar mamɨn orazimɨn itima, 4 God a bato.
Ezɨ Balam kamaghɨn God mɨgei, “Kɨ 7plan ofa gamir dakozibar ingarigha bulmakaun vamɨra ko sipsipɨn vamɨra, vaghvagha ofan dakozir kabar dar ofa gami.”
5 Ezɨ Ikiavɨra Itir God, akar maba, Balak mɨkɨmasa Balam amada. 6 Ezɨ a uamategha ghua garima, Balak ko Moapian gumazir dapaniba, uan ofan bar isia mɨghɨribar danganibar boroghɨn tuivighav iti. 7 Ezɨ Balam maghɨra God a mɨkemezir akabar gun me mɨgei:
“Moapian Atrivim Balak, Aramɨn kantrin aven aruem anadi naghɨn mɨghsɨabar na inigha kagh ize.
Egha ghaze, ‘Nɨ izɨ na bagh mɨkɨm.
Me ikuvighsɨ nɨ akavsiatam Israelian gumazamizibar atɨghtɨ,
nɨn aseba me damutɨ, me ikuvigham.’
8 Ezɨ kɨ fo, God me ikuvighasa na mɨkemezir puvatɨ.
Kamaghɨn, kɨ uaghan me ikuvighsɨ mɨkɨman kogham.
Ikiavɨra Itir God paza me damuasa akavsiatam me gatɨzir puvatɨ.
Eghtɨ kɨ manmaghɨn pazɨ me damusɨ akam me darɨgham? Bar puvatɨgham.
9 Bar guizbangɨra, kɨ mɨghsɨabar orazibar itir dagɨar bar pɨn itibar ikia men gara fo,
me gumazamizir igharaghavɨra itiba.
Me fo, God deraghavɨra me gamizɨ,
me ikɨzir igharazibar mɨn itir puvatɨ.
10 Israelɨn ovavir boriba bar avɨraseme,
me nguazir mɨnezibar mɨn bar avɨraseme.
Eghtɨ gumazitam me mengan iburagham.
Ia na teghtɨ, kɨ uan arueba gɨvaka.
Kɨ Godɨn gumazamizibar mɨn navir amɨrizim sara aremeka.
Kɨ gumazamizir aghuibar mɨn aremeghasa.”
11 Ezɨ Atrivim Balak kamaghɨn Balam mɨgei, “Nɨ manmaghɨn na gami? Kɨ kamaghɨn ifonge, nɨ nan apaniba ikuvighsɨ akavsiam me darɨghasa, egha kɨ nɨ inigha kagh ize. Ezɨ nɨ nan ifongiamɨn gɨn ghuzir puvatɨ. Nɨ deraghvɨra ikiamin akam me mɨgei.”
12 Ezɨ Balam ghaze, “Ikiavɨra Itir God mɨkɨmasa na mɨkemezɨ moghɨra kɨ mɨkɨmam.”
Balamɨn akar namba 2
13 Ezɨ gɨn Atrivim Balak, kamaghɨn Balam mɨgei, “Ga uaning, nɨ nan gɨn izɨva ga mangɨ danganir igharazimɨn otogh, egh Israelian marazira ganam. Egh nɨ bar men ganan kogham. Egh nɨ munagh tugh, na bagh me ikuvighsɨ akavsiam me datɨgh.”
14 Egha Balak, Balam inigha ghua Pisgan Mɨghsɨamɨn orazimɨn otogha, Sopimɨn danganir me deravɨra vɨn garimɨn tu. Danganir kamɨn, a 7plan ofa gamir dakozibar ingarigha, bulmakaun vamɨra ko sipsipɨn vamɨra, 7plan ofa gamir dakozibar vaghvagha dar ofa gami. 15 Ezɨ Balam kamagh Balak mɨgei, “Nɨ kagh uan ofan bar isia mɨghɨribar boroghɨn tughɨv ikɨ. Eghtɨ kɨ munagh mangɨ God bagh orarkɨ a batoka.”
16 Ezɨ Ikiavɨra Itir God Balam batogha, Balak mɨkɨmamin akabar a mɨkemegha ua anemadazɨ, a Balak bagha ghu. 17 A uamategha ghua garima, Balak Moapian gumazir dapaniba ko uan ofan bar isia mɨghɨribar boroghɨn tughav iti. Ezɨ Balak Balamɨn azara, “Ikiavɨra Itir God manmaghɨn nɨ mɨkeme?”
18 Ezɨ Balam kamaghɨn a mɨgei:
“O Siporɨn otarim Balak, nɨ dɨkavigh izɨva
akar kɨ mɨkɨmamiba baragh.
19 God a gumazamizibar mɨn ikia ifarir puvatɨ.
Egha gumazamizibar mɨn ikia uan nɨghnɨzim gɨghavkɨrir puvatɨ.
A bizir manam damuasa akar dɨkɨrɨzim gami, an a damuam.
A mɨgeir biziba otivaghiri.
20 God deravɨra Israelia damuasa akam na ganɨngi.
God uabɨ deravɨra me gami,
eghtɨ kɨ an arazir kam agɨraghan kogham.
21 Kɨ garima,
Israelia bativamin araziba,
dar tam me damutɨ me bar ikuvighan kogham.
Bar puvatɨgham.
Ikiavɨra Itir God, men God, a me ko iti.
Me kamaghɨn an gun mɨgei,
a men Atrivim.
22 God Isipɨn kantrin me inigha azenan ize,
egha bulmakaun atiamɨn mɨn me bagha mɨsosi.
23 Bar guizbangɨra, imeziba ko akuzir araziba, Israelian gumazamizibagh amuva avegham.
Eghtɨ gɨn gumazamiziba Israelian ganɨva mɨkɨm suam,
Ia God amizir bizir ekiabar gan!
24 Ia gan! Israelɨn ikɨzim, mati laionɨn bar gavgavim.
An avughsan kogh mangɨ dughiar an asɨzim suegh bar anebɨghɨrarɨgh an tuzibar amɨva
an ghuzim sara dozegham.”
25 Ezɨ Balak kamaghɨn Balam mɨgei, “Nɨ me ikuvighsɨ akavsiam me darɨghan aghuaghɨva, egh nɨ deraghvɨra me damusɨ akam me darɨghan markɨ.”
26 Ezɨ Balam a ikaragha ghaze, “Kɨ nɨ mɨkemegha gɨfa. Ikiavɨra Itir God damuasa na mɨkemezir bizibara, kɨ dav kɨmam.”
Balamɨn akar namba 3
27 Ezɨ Atrivim Balak kamaghɨn Balam mɨgei, “Ga uaning, nɨ na ko izɨ ga danganir igharazitamɨn mangam. God ti tɨghar nɨ ateghtɨ, nɨ munagh ikɨ na bagh me ikuvighsɨ akavsiam me darɨgham.”
28 Kamaghɨn amizɨ, aning Peorɨn Mɨghsɨamɨn orazimɨn bar ghuanabogha, munagh gumazamiziba puvatɨzir danganimɨn gari.
29 Egha Balam kamaghɨn Balak mɨgei, “Nɨ na bagh 7plan ofa gamir dakozibar ingarighɨva, uaghan 7plan bulmakaun apuriba ko 7plan sipsipɨn apuriba na bagh da inigh izɨ.” 30 Ezɨ Balak, Balam mɨkemezɨ moghɨn, an amua bulmakaun apurir vamɨra ko sipsipɨn apurir vamɨra vaghvagha 7plan ofa gamir dakozibagh isɨn dar ofa gami.
<- Dɨboboniba 22Dɨboboniba 24 ->
