57
Israelia orazi puvatɨgha, asebar ziaba favɨra iti
1 2 Atriviba 22:20; Onger Akaba 12:1Gumazamizir aghuiba ariaghirir dughiamɨn,
gumazamiziba men gara men apangkuvir puvatɨ.
Egha me kamaghɨn nɨghnɨzir puvatɨ, Ekiam gumazamizir kaba ataghizɨ,
me ovea zui, me gɨn izamin dughiar kurabagh itavɨragham.
2 Gumazamizir arazir aghuibagh amiba, me ovengamin dughiamɨn,
me uan mozibar akua, avughsazir bar aghuim ini ikiam,
eghtɨ dughiar kuratam me bativan kogham.
3 Ekiam kamaghɨn mɨgei,
“Ia gumazamizir arazir kurar guar avɨribagh amiba,
ia kukunir amizibar boriba,
ia gumazamizir poroghamiba uari bakɨava uari isava akuir arazim gamir gumazamizibar boriba,
ia tuavimɨn amizibar boriba,
ia kagh izɨ.
4 Ia gumazir akaba barazir puvatɨziba ko ifavarir gumazamizibar boriba,
ia dɨbovir akar kuramɨn tina mɨgei?
Ia akaba ikɨzɨrɨgha, mɨzeba onga tina garɨsi?
Kɨ fo, ia arazir kurar kaba nararam ami.
5 “Ia asebar ziaba fasa, ian inivafɨzibar ifongiamɨn agorogem dɨkavima,
ia ghua temer ekiabar apengan uan godɨn ifavaribar ziaba fer danganibar,
poroghamiba uari isava akuir arazim gami.
Egha ia uan boribav sozi da ariaghɨrima,
ia da isa danganir zarimɨn dagɨar ekiabar tongɨn
aseba bagha ofan mɨn da tue.
6 Egha ia danganir kamɨn dagɨabar gara ghaze, ian aseba dar aven iti.
Ezɨ da ian godba.
Ia asebar ziabagh nɨghnɨgha,
wain inger ofa ko witɨn ofaba me ganɨdi.
Ia arazir kabagh amua ghaze,
kɨ uan nɨghnɨzim giragh ian apangkuvam?
Bar puvatɨgham.
7 Ia mɨghsɨabar ghuavanaga aseba fer danganibar ofa gamua,
poroghamiba uari isava akuir arazim gami.
8 Ia bar akɨrim ragha na gasara.
Ia uan asebar nedaziba uan dɨpenibar aven tiar akabar boroghɨn da gui.
Ia dar ziaba fasa, tintinibar tuavir amiziba ko tuavimɨn gumaziba isa me ko dakuasa, uan dakozir ekiabar ingari,
egha dar mɨsiaba adangizɨ, da pura mɨzua iti.
Ia dakozir ekiar kabagh nɨghnɨgha bar ifonge.
Egha ia dagɨaba me ganɨdima, me izima,
ia men bibiamra itir mɨkarzibar gara bar akonge.
Egha ia me ko dakozir ekiar kabagh isɨn
poroghamiba uari isav akuir arazim gami.
9 Ia paura ko sandan mughuriar bar isɨngtɨzim zuim uari gaghua,
asem Melekɨn ziam fasa zui.
Egha ia asebar ziaba fasa, abuir gumaziba amadima,
me aseba buria nguibar bar saghon tibar zui.
Egha ia uaghan me amadima, me Gumazamizir Oveaghuezibar Nguibamɨn ghua, dar duaba buri,
eghtɨ ia dar ziaba fɨsɨ damuam.
10 Ia aseba buria ingangarir dafam uari ganɨngi,
ezɨ ian gavgaviba gɨfa.
Egha ia bizir kam barazir puvatɨgha ghaze,
‘E pura uan gavgaviba agefi. E ti arazir kam ateka.’
Puvatɨ.
Ian inivafɨzimɨn ifongiar kurar kam gavgavigha ia getuima,
11 “Ia bar tinaram atiatia,
na gifara akɨrim ragha na gasaragha bar na bakɨnɨghnɨki?
Kɨ ti bar dughiar ruarimɨn ian atarizir puvatɨ, kamaghɨn amizɨ,
ia ua nan atiatir puvatɨ.
12 Ia ti ghaze, ia arazir aghuibaram ami.
Ian arazir ia amiba, kɨ da azenim datɨgham.
Eghtɨ da tong ian akuraghan kogham.
Bar puvatɨgham.
13 Egh osɨmtɨzim ia bativamin dughiamɨn, ia ti marvir guar ia akuvazir kabar dɨmtɨ,
me izɨ ian akuragham, o?
Bar puvatɨgham.
Da gavgaviba puvatɨ, amɨnir bar muziarim me gɨvaragh mangɨgham.
Ezɨ gumazamizir na bagha iza nɨghnɨzir gavgavim nan ikia nan aven modoghav itiba,
me nguazir kam iniam.
Me uaghan mɨghsɨar kɨ ua bagha inabazir kam inigh an ikiam.”
God gumazamizibar arazir kuraba gɨn amadagh, egh dughiar aghuim me danɨngam
14 Ikiavɨra Itir God kamaghɨn mɨgɨa ghaze,
“Nan gumazamiziba ua na bagh izɨ.
Kamaghɨn amizɨ, ia me bagh deraghvɨra tuaviba akɨr,
egh tuavim apɨrizɨ biziba isɨ da makun.
Puvatɨghtɨ, bizir katam men suetam mɨtɨghtɨma
me daghiregham.
15 Onger Akaba 147:3; Aisaia 33:5; 40:28; 66:2“Kɨrara, kɨ God, kɨ ziar bar pɨn itim ikia, egha zurara iti.
Ezɨ nan ziam bar zue.
Kɨ bar pɨn ikia uan Nguibar Zuezimra iti.
Egha kɨ uaghan gumazamizir uari dɨkabɨra, uan arazir kuraba ataghɨragha navibagh iraziba,
kɨ me ko iti.
Egha kɨ gavgavim men navibagh anɨga, men ikɨrɨmɨrim gamima,
a ua deraghavɨram oto.
16 Onger Akaba 85:5; 103:9; Maika 7:18Kɨ uan gumazamiziba zurara akam me gasɨ men ataran kogham.
Kɨ men atar me damutɨ, men ikɨrɨmɨrim ikuvigh bar gɨvagham,
men ikɨrɨmɨrir kam, kɨ uabɨ me ganɨngi.
17 Me faragha bizir avɨriba iniasa, arazir kurar guar avɨribagh ami,
kamaghɨn amizɨ, nan anɨngagharim men ikia,
puv me gamua, egha uan guam men modo.
Ezɨ me akaba barazir puvatɨgha,
uan ifongiabar gɨntɨsi.
18-19 Efesus 2:17“Me amir arazir kuraba, kɨ dar ganigha gɨfa,
egh kɨ me gasɨghasɨghan kogham.
Puvatɨ.
Kɨ men arazir kuraba adeghtɨ, me ua ghuamaghegham.
Egh gumazamizir osɨmtɨziba ikiava araiba,
kɨ men aku tuavim men akagh me damutɨ,
me osɨmtɨzir arazim ataghɨragh, na mɨnabɨ bar akueghamin ighiabar amuam.
Kɨ Ikiavɨra Itir God, kɨ kamaghɨn mɨgei,
Bar guizbangɨra, nan navir amɨrizim ko dabirabir aghuim, gumazamizir roghɨra itiba ko nguibar saghon itiba baghavɨra iti.
Kɨ me damightɨ me ua deraghtɨ,
kɨ dughiar aghuim me danɨngam.
20 Ezɨ gumazamizir arazir kurabagh amiba, me uan arazir kuram ateghan kogham.
Me mati ongarim zurara dɨpɨra iza,
mɨnezir guar avɨrim atera iza ongarir dadarimɨn da akuri.”
21 Aisaia 48:22; 59:8Nan God kamaghɨn mɨgei,
“Gumazamizir arazir kurabagh amiba,