22
Ikiavɨra Itir God, Jerusalemɨn gumazamizibar atari
1-2 Ikiavɨra Itir God, Irebamɨn Mɨn Garir Biziba Otivamin Danganir Zarim bagh akar kam anɨngi.
Ia Jerusalemɨn itir gumazamiziba, ia bar manmaghɨra nɨghnigha,
dɨa nɨgɨnir dafam gamua, egha bar akonge?
Ia uan dɨpenir inogoribar ghuavanega pamtem deima,
ian nɨgɨnim nguibar ekiamɨn ruaghateviba bar dar ghu.
Ian gumazir ariaghireziba,
me mɨdorozir gumazir gavgavibar mɨn mɨsoghava ariaghirezir puvatɨ.*Asiriaba iza Jerusalem ekɨaruzir dughiamɨn, Jerusalemɨn gumaziba Asiriabar atiatigha tuivigha gavgavigha me ko mɨsoghezir puvatɨ. Jerusalemɨn gumazir maba arasava ami, ezɨ Asiriaba men suigha me mɨsoghezɨ me ariaghire. Ezɨ marazi nguibar ekiamɨn aven ikia arɨmariaba ko mɨtiriam bangɨn ariaghire.
3 Ia fo, ian mɨdorozir gumazir dapaniba ara bar saghon ghue.
Ian gumaziba uan apanibar mɨdorozim ikarvaghan piba ko biziba puvatɨ.
Kamaghɨn amizɨ, apaniba men apigha
zuamɨra bar moghɨra men suiki.†Hibrun akam deragha mɨgɨrɨgɨar kamɨn mɨngarim abɨghizir puvatɨ.
4 Kamaghɨn kɨ ia mɨgei,
Ia nan navim damutɨ,
a nɨmɨra ikɨsɨ damuan markɨ.
Nan navim bar ikuvizɨ kɨ azia iti,
kamaghɨn amizɨ, ia na ateghtɨ kɨ uabɨra ikiam.
Nan gumazamiziba bar ikufi,
ezɨ kɨ me ginɨghnɨghav arai.
5 Ikiavɨra Itir Godɨn Gavgaviba Bar Itim, nan Ekiam,
an osɨmtɨzir guar avɨriba ia bativamin dughiam amɨsevegha gɨfa.
Osɨmtɨzir kaba, Irebamɨn mɨn Garir Bizibar Garir Danganir Zarimɨn ia bativam.
Dughiar kamɨn, apanir bar avɨrim izɨva pamtemɨn dɨmɨva ivemar mangɨ izegh damutɨ,
ia dɨgavir kuram damigh onganigham.
Egh me nguibar ekiamɨn dɨvazir gavgavim akartɨ,
ia atiatingtɨ, ian dɨmdiam bar saghon mangɨ mɨghsɨabar tugham.
6 Elamɨn kantrin mɨdorozir gumaziba, me piba ko baribar suiki,
egha me mɨsoghasa hoziaba ko karisba sara izi.
Ezɨ Kirɨn nguibar ekiamɨn mɨdorozir gumaziba,
me mɨsoghasa uan oraba sara izi.
7 Mɨsoghamin karisba ian danganir zarir bar aghuiba bar dagh izefe.
Ezɨ mɨdorozir gumaziba hoziaba mɨkɨrvazir karisbagh apiagha,
men nguibar ekiamɨn tiar akabar otivigha gɨvagha mɨsoghasa gara iti.
8 Ia fo, Ikiavɨra Itir God,
ua kantri Juda geghuva an garir puvatɨ.
Ia fomɨra kamaghɨn fo,
ia mɨsoghamin bizir avɨriba isa dɨpenir me kamaghɨn dɨborim gatɨ,
Lebanonɨn Ruarir Pɨzimɨn Temebar Ingarizir Dɨpenim.
Ezɨ ia ti datɨrɨghɨn ghaze, apaniba izɨ ia ko mɨsoghtɨ,
ia mɨsoghamin bizir kaba ian akuraghtɨ, ia deraghvɨra ikiam.
9-10 Egha ia kamaghɨn gari, Jerusalemɨn dagɨabar ingarizir dɨvazir bar mɨtiar gavgavim,
an danganir avɨriba akuaghiregha ikuvigha iti.
Egha ia Atrivim Devitɨn nguibar ekiam Jerusalem,
ia an dɨpeniba bar da menge.
Egha ia dɨpenir maba akaragharigha
dar dagɨaba inigha nguibar ekiamɨn dɨvazim akɨrmɨki.
Egha ia dɨpam, Mozir Dɨpar Vɨn Itimɨn magɨrasa,
ia afemozibagh gɨkui.
11 Egha ia mozir dɨpar mam, nguibar ekiam avɨnizir dɨvazimningɨn tongɨram a gɨkui.
Eghtɨ mozir dɨpar ghurir nguibar ekiamɨn azenan itim, a ivemar izɨ
nguibar ekiamɨn aven itir mozir dɨpar igiamɨn magɨram.
Ia bizir kabagh amua, egha tong God gɨnɨghnɨzir puvatɨ.
Bizir ia bativamin kaba, a fomɨra ia bagha da amɨsefe.
Egha bizir kabar ingarizɨ, da otifi.
12 Egha bizir kaba otivir dughiamɨn, Ikiavɨra Itir Godɨn Gavgaviba Bar Itim, nan Ekiam, a kamaghɨn ifonge,
Ia aziv arang kuarkuv, egh uan dapaniba bar dagh isegh,
egh azir korotiabar aghuigh.
13 1 Korin 15:32Egh ia gan! Ia azir arazibagh amir puvatɨ.
Ia akazim gamua bar akuegha iti.
Egha ia sipsipba ko bulmakaubav sogha, isar dafam gamua,
egha wainɨn dɨpaba api.
Egha ia kamaghɨn mɨgei,
“E fo, e gurumɨn ovengam, kamaghɨn amizɨ,
ia izɨ e damɨ wainɨn dɨpabar amam.”
14 Ikiavɨra Itir Godɨn Gavgaviba Bar Itim,
a uabɨ na batogha mɨgɨrɨgɨar kam nan kuarim gatɨ,
“Kɨ ian arazir kurar kam gɨn amadaghan kogh,
mamaghɨra ikɨ mangɨ ia aremeghtɨmra gɨvagham.”
Kar Ikiavɨra Itir God, Godɨn Gavgaviba Bar Itim, a nan Ekiam, an akam.
Ikiavɨra Itir God Sepna batuegham
15 Ekiam a Ikiavɨra Itir Godɨn Gavgaviba Bar Itim, a mɨgɨa ghaze:
Nɨ mangɨ Sepnan ganigh, gumazir kam atrivimɨn dɨpenimɨn biziba bar dar gari.
Egh nɨ akar kamɨn a mɨkɨm,
16 “Sepna, nɨ nguaziba ko ikɨziba kagh itir puvatɨ.
Tinara nɨn amamangatɨzɨ, nɨ uabɨ fa pɨn itir mɨghsɨamɨn ghua,
ua bagha dagɨam abigha torim okore,
eghtɨ dagɨar torir kam, nɨ bagh mozir bar aghuimɨn otogham?
17-18 “Nɨ ti ghaze, nɨ gumazir gavgavim, a? Bar puvatɨ!
Nɨ kamaghɨn fogh, Ikiavɨra Itir God, bar pamtemɨn nɨn suiragh, nɨ munumigh nɨ rightɨ,
nɨ balɨn muziarimɨn mɨn otogham.
Egh a nɨ akunightɨ, nɨ akɨgh mangɨ
bar saghon itir nguazir ekiatamɨn irɨgham.
Egh nɨ danganir kamɨn aremegham.
Egh nɨ karisɨn bar dirir nɨ bar ifongezir kaba ategham.
Nɨ datɨrɨghɨn atrivimɨn ingangarim gami.
Egh nɨ gɨn aghumsɨzim atrivimɨn adarazir ganɨdir gumazimɨn otogham.‡Hibrun akam vezɨn kamɨn deragha bigha mɨkemezir puvatɨ.
19 “Ikiavɨra Itir God ingangarimɨn nɨ agɨvagh nɨ batueghtɨ, nɨ pura ikɨva ua ziaba puvatɨgham. 20 Bizir kam otoghtɨ, kɨ uan ingangarir gumazim Eliakimɨn diaghtɨ a izam. A Hilkian otarim. 21 Eghtɨ kɨ korotiar ruarir kam isɨ Eliakim darugh, mɨter atrivimɨn ingangarir gumazim uan ivariam gitim a gikegh, nɨ amir ingangarimɨn gavgavim inigh an dafarim datɨgham. Eghtɨ an afeziamɨn mɨn otogh bar moghɨra Jerusalem nguibamɨn gumazamiziba, ko Judian nguibaba bar me gativagh men ganam. 22 Akar Mogomem 3:7Eghtɨ kɨ Ikiavɨra Itir God, kɨ Atrivim Devitɨn dɨpenimɨn kiba isɨ, an dafarim datɨgham. Eghtɨ a tiam kuightɨ tav a dukuaghan kogham. A tiam dukuaghtɨ tav a kuighan kogham. 23 Kɨ a damightɨ, a ingangarir kam bagh bar gavgavigham, mati purirpenibar suizir afughafuziba, da purirpenimɨn suirazɨ a danganir vamɨra ikia gavgafi. Eghtɨ an adarazi bar moghɨra ingangarir an amir kam bangɨn ziar ekiam iniam.
24 “Eghtɨ an adarazi ko an boriba ko namakaba, me bar moghɨra an guighɨv ikɨ, uarir akurvaghsɨ an azangsɨgham. Me, mɨneba ko mɨtariba akezir mamɨn guraghav iti moghɨn, me an guighɨv ikiam.”
25 Egha Ikiavɨra Itir Godɨn Gavgaviba Bar Itim, ua kamaghɨn mɨgei, “Dughiar kamɨn akezir kam, a faragha gavgavigha iti, egh a datɨrɨghɨn asighirɨgh irɨgham. Eghtɨ bizir an guighav ikia osɨmtɨzim a ganɨdiba, me bar ikuvigham. Kɨ Ikiavɨra Itir Godɨn Gavgaviba Bar Itim, kɨ mɨkemegha gɨfa.”
<- Aisaia 21Aisaia 23 ->- ~2~ Hibrun akam deragha mɨgɨrɨgɨar kamɨn mɨngarim abɨghizir puvatɨ.
22:13: 1 Korin 15:32
‡22:17-18: Hibrun akam vezɨn kamɨn deragha bigha mɨkemezir puvatɨ.
22:22: Akar Mogomem 3:7
*22:1-2: Asiriaba iza Jerusalem ekɨaruzir dughiamɨn, Jerusalemɨn gumaziba Asiriabar atiatigha tuivigha gavgavigha me ko mɨsoghezir puvatɨ. Jerusalemɨn gumazir maba arasava ami, ezɨ Asiriaba men suigha me mɨsoghezɨ me ariaghire. Ezɨ marazi nguibar ekiamɨn aven ikia arɨmariaba ko mɨtiriam bangɨn ariaghire.