15
Ikiavɨra Itir God Moapia gasɨghasɨgham
1 Aisaia 25:10-12; Jeremaia 48:1-47; Esekiel 25:8-11; Amos 2:1-3; Sefanaia 2:8-11Ikiavɨra Itir God kantri Moap gɨnɨghnɨgha akar kam anɨngi:
Apaniba dɨmagarimɨn iza kantri Moapɨn otogha,
Arɨn nguibar ekiam gasɨghasɨsi.
Me ghua Kirɨn nguibar ekiam gasɨghasɨghizɨ,
Moapɨn kantri datɨrɨghɨn bar ikufi.
2 Kamaghɨn amizɨ, Dibonɨn nguibar ekiamɨn itir gumazamiziba, mɨghsɨabar ghuavanabogha,
asebar ziaba fer danganibar aziava ara iti.
Moapia bar fo, Nebon nguibar ekiam ko, Medeban nguibar ekiam bar ikuvizɨma,
kamaghɨn me aningɨn apangkuvigha azi.
Me bar aning bagha osemegha,
uan dapanir arɨziba ko, ghuamasɨzir arɨzibagh ise.
3 Egha azir korotiaba aghuigha,
nguibar ekiabar tuavibagh arui.
Marazi uan dɨpenibar avughsamin danganibar iti,
ezɨ marazi uari akuva itir danganibar iti,
Me bar puv azima, temeriba men damazibar izaghira,
egha uaghira nguazim giri.
4 Hesbonɨn nguibar ekiam ko, Elealen nguibar ekiamɨn itir gumazamiziba,
me uaghan bar puvɨram azi,
ezɨ Jahasɨn nguibar ekiamɨn itir gumazamiziba, men azir akaba barasi.
Ezɨ mɨdorozir gumazir gavgaviba uaghan osemegha ara dei.
Guizbangɨra, Moapian gavgavim bar gɨfa.
5 Mevzika! Kɨ uaghan Moapian apangkuvigha, me bagha azi.
Kɨ garima, me uan nguibam ategha, ara ivemara
Soarɨn nguibar ekiam ko, Eklat Selisian nguibar ekiamɨn zui.
Me aziavɨra ghua Luhitɨn nguibar ekiamɨn tuavimɨn ghuavanadi.
Egha me uan osɨmtɨzir ekiam gɨnɨghnɨgha pamtem aziava ara
Horonaimɨn nguibar ekiamɨn tuavimɨn zui.
Ezɨ men ararem bar ekefe.
6 Me fo, Nimrimɨn dɨpam bar mɨsɨngizɨ, an apɨnimɨn itir oghevseviba uaghan mɨsɨngi.
Me ghaze, Danganir kam, oghevseviba ko, temeba ti uam an aghungan kogham.
7 Ezɨ Moapia uan nguibamɨn ikiava,
uari bagh akumakumizir bizir aghuiba, me da saram ari.
Me kantri Moap ategha, Temeba Itir Danganir Zarir tuavimɨn zui.
8-9 Bar guizbangɨra, me uarir akurvaghamin ararem bar ekevegha
men kantrin danganiba bar dar ghu.
Eklaimɨn nguibar ekiam ko, Berelimɨn nguibar ekiam ko,
kantri Moapɨn itir nguibar ekiar avɨribar gumazamiziba, men ararem baraki.
Guizbangɨra, Moapian ghuzim Dimonɨn dɨpam gizɨfa.
Ezɨ Ikiavɨra Itir God kamaghɨn mɨgei,
A uam puv Moapia damigham.
Moapian arav ghueziba ko, kantri Moapɨn ikiavɨra itir varazira,
a laionɨn bar kuram mɨkemeghtɨ, a izɨ bar me gasɨghasigham.*Vezɨn kam, Hibrun akam deragha mɨgɨrɨgɨar kamɨn mɨngarim abɨghizir puvatɨ.