9
God ivezir kuram Israelia danɨngam
1 O Israelia, ia God gɨfozir puvatɨzir gumazamizibar mɨn ikia,
isar ekiaba ko nan ziam fer dughiabar bar akongezir arazim gami.
Ia arazir kam atakigh.
Ia akɨrim ragha uan God gasaragha gɨfa,
egha an gɨn zuir puvatɨ.
Ia danganiba bar, asem Balɨn ziam fe,
mati tuavimɨn amizim tintinimɨn gumaziba koma akui.
Egha ghaze, Bal ian azenibagh amima,
dagher avɨriba otifi, mati tuavimɨn amizimɨn ivezim.
2 Ezɨ kɨran oveghangɨn ia dagheba,
ko wainɨn dɨpaba puvatɨgham.
3 Egh ia Efraimia, ia uam Ikiavɨra Itir Godɨn nguazimɨn ikian kogham.
Eghtɨ ian tarazi uamategh mangɨ Isipɨn kalabuziabar mɨn ikiam.
Eghtɨ ian tarazi uaghan Asirian kantrin mangɨ kalabuziabar mɨn ikiam.
Ia kantrin kamningɨn ikɨ dagher God anogoroghezibar amam.
4 Ia ikɨzir igharazibar kantrin ikiamin dughiamɨn,
ia asɨziba ko wainɨn dɨpaba ofan mɨn Ikiavɨra Itir God danɨngan kogham.
Ian dagheba ia damightɨ, ia Godɨn damazimɨn mɨzegham,
mati dagher me gumazir kuamɨn azia, egha apim,
ezɨ dagher kam me gamizɨ, me mɨze.
Dagher kaba, ia pura naviba izɨvsɨ da iniam.
Ia dagher nar katam inigh
Ikiavɨra Itir Godɨn Dɨpenimɨn mangɨ an ofa damighan kogham.
5 Eghtɨ Ikiavɨra Itir Godɨn ziam famin dughiar ekiam izɨtɨ,
ia manmaghɨn damuam?
Ia ofa damuamin tuaviba bar puvatɨgham.
6 Ia oragh! Gɨn osɨmtɨzir ekiam otoghtɨ,
ia tintinibar arɨ mangegham.
Eghtɨ Isipia izɨ ia batogh ia inigh mangɨtɨ,
ia Isipɨn kantrin otivigh kalabuziabar mɨn ikiam.
Egh ia ikɨ mangɨ arɨghireghtɨ, me uan nguibar ekiam Memfisɨn ian kuabar afegham.
Ia uamategh uan nguibamɨn izeghan kogham.
Puvatɨgham.
Eghtɨ ian silvan dagɨaba ko dɨpeniba ko ian bizir aghuiba pura ikɨtɨ,
ruarim aghung bar da avaragham.
7 Luk 21:22God pazɨ ia damuamin dughiam otogha gɨfa.
Eghtɨ ia uan arazir kurar amizibar ivezir kuram iniam.
Arazir kam otoghamin dughiamɨn, ia Israelia fogham,
kar dughiar God ia ikarvaghamim.
Ia kamaghɨn na mɨgei,
“Akam inigha izir gumazir kam ongani.
Gumazir Godɨn Duam itir kam, a nɨghnɨzir aghuiba puvatɨ.”
Ia gumazamiziba, ian arazir kuram bar ekefe,
kamaghɨn amizɨ, ia bar na gifongezir puvatɨ.
8 God uabɨ Akar Gavgavim uan gumazamizibar anɨngasa,
akam inigha izir gumazimɨn mɨn na amada.
Ezɨ danganir kɨ aruiba bar, ia nan suighasava ami,
mati gumazim kuaraziba guasa ivem adui.
Egha Godɨn Dɨpenimɨn uaghan nan apanim gami.
9 Ia arazir kuram gamuavɨra iti,
mati ian inazir afeziaba fomɨra Gibean nguibar ekiamɨn amizɨ mokɨn.
Kamaghɨn amizɨ, God ian arazir kurabagh nɨghnɨgh,
ia ikarvagh ivezir kuram ia danɨngam.*Nɨ Gumazir Dapaniba sapta 19 ko 20ɨn gan.
Israelian arazir kuraba ko dar ivezir kuram
10 Dɨboboniba 25:1-5Egha Ikiavɨra Itir God kamaghɨn mɨgei:
“Kɨ faraghavɨra ian apizir dughiamɨn, ia bar dera,
mati wainɨn ikarɨzim nguazir mɨdiarimɨn otogha deraghavɨra be.
Ezɨ ian inazir afeziaba, mati temer fikɨn ovɨzir faraghavɨram aniba.
Egha gɨn me Peorɨn Mɨghsɨamɨn otivigha,
egha faraghavɨra asem Balɨn ziam fava aghumsɨzir araziba baghavɨra iti.
Me bar aser kam gifonge, egha an mɨrara bar ikufi.
11 Efraimian gavgavim mangɨ gɨvagham,
mati kuarazim mɨghegha ghu.
Eghtɨ men amiziba naviba asang
boriba batan kogham.
12 Tarazi boriba batɨtɨ,
kɨ me mɨsueghtɨ, me arɨmɨghiregham.
Kɨ tav ateghtɨ a ikian kogham.
Kɨ gumazamiziba ateghamin dughiamɨn,
bizir kuraba tintinimɨn me bativam.
Mevzika!”
13 Egha Hosea kamaghɨn mɨgei:
“O Ikiavɨra Itir God, Efraimia faragha, mati Tairɨn nguibar ekiamɨn mɨn bar deravɨra iti.
Ezɨ kɨ garima, apaniba izava Tair gasɨghasɨki.
Eghtɨ arazir kam uaghan Efraimian otivam.
Apaniba izɨ men boribav soghtɨ me arɨmɨghiram.
14 O Ikiavɨra Itir God, nɨ ti ivezir manam me danɨngam?
Nɨ men amizibar amutɨ me naviba asangan kogham.
Nɨ amizir borir iririviba itiba men oter eboribar amightɨ da mɨsɨngigh,
eghtɨ me oteba boribar anɨngan kogham.”
15 Egha Ikiavɨra Itir God ua kamaghɨn mɨgei:
“Efraimia fomɨra Gilgalɨn ikia egha faraghavɨra arazir kurar kabagh ami.
Ezɨ dughiar kamra, kɨ uaghan men anɨngagha men atari.
Gumazamiziba arazir kurar avɨrim gamima,
men gumazir dapaniba uaghan nan akaba batosi.
Kamaghɨn amizɨ, kɨ uan dɨpenimɨn me batuegham.
Egh ua me gifueghan kogham.
16 Efraimia boriba batan kogham,
mati temem an biba mɨsigha gɨfa, egh ua ban kogham.
Eghtɨ tarazi boriba batɨtɨ, kɨ borir me bar ifongezir kabav soghtɨ,
me arɨmɨghiregham.”
Hosea ghaze, God pazavɨra Efraimia damuam
17 Gumazamizir kaba nan Godɨn akaba batogha an akamɨn gɨn zuir puvatɨ.
Kamaghɨn amizɨ, an akɨrim ragh uan gumazamizibagh asaragham.
Eghtɨ me kantrin igharazibar tongɨn
pura guighav itir gumazamizibar mɨn ikiam.