30
Ikiavɨra Itir God Isip gasɨghasigham
1 Ikiavɨra Itir God ua kamaghɨn na mɨgei, 2 “O nguazir kamɨn gumazim, nɨ nan akaba inigh dar gun mɨkɨm:
“Kɨ Ikiavɨra Itir Godɨn Ekiam, kɨ kamaghɨn mɨgei:
Iavzika!
Dughiar kuram a izi.
3 Ikiavɨra Itir God Izamin Dughiar Ekiam, a roghɨra ize.
Kar dughiar God gumazamizibagh asɨghasɨghamim.
Dughiar kamɨn, overiamɨn ghuariar ekiaba otivightɨ,
God kantribar araziba tuisɨgh, ivezir kuram me danɨngam.
4 Dughiar kamɨn apaniba izɨ Isipia mɨsogham.
Eghtɨ Itiopiaba osɨmtɨzir ekiam iniam.
Eghtɨ Isipɨn gumazamizir avɨrim arɨghiram.
Apaniba bar a gasɨghasigh anekararightɨ a ikuvigh ikɨtɨ,
me an itir bizir aghuiba bar da inigh mangegham.
5 “Mɨdorozimɨn aven,
Itiopian gumazamiziba ko,
Putɨn gumazamiziba ko,
Lidian gumazamiziba ko,
Libian gumazamiziba ko,
nan gumazamiziba
uaghan arɨmɨghiregham.
6 “Kɨ Ikiavɨra Itir God kɨ kamaghɨn mɨgei:
Gumazir manaba Isipian akurvagha me bagha mɨsosi, me bar arɨmɨghiregham.
Egh notɨn amadaghan Mikdolɨn nguibamɨn ikegh mangɨ,
Sautɨn amadaghan Aswanɨn nguibamɨn tugham.
Eghtɨ Isipɨn mɨdorozir gumazir gavgavir ikia uari feba, me bar arɨmɨghiregham.
Kɨ Ikiavɨra Itir Godɨn Ekiam, kɨ kamaghɨn mɨkeme.
7 Isipɨn nguazim bar ikuvighɨva,
kantrin igharazibar nguazir ikuviziba bar dagh afiragham.
Eghtɨ an nguibar ekiaba bar akarɨghiregh ikɨ,
kantrin igharazibar nguibar ekiar ikuviziba bar dagh afiragham.
8 Kɨ avim Isip datɨghtɨ a isitɨ,
gumazir an akuragha a bagha mɨsoziba arɨghiregham.
Eghtɨ Isipia kamaghɨn fogh suam, kɨ Ikiavɨra Itir God.
9 “Dughiar kamɨn, Itiopiaba deravɨram apiagha ghaze,
bizir kuratam me bativan kogham.
Eghtɨ Isip ikuvightɨma, kɨ gumazitaba amadaghtɨ
me kuriba inigh mangɨ Itiopiabav kɨm suam,
Isip bar ikuvigha gɨfa.
Eghtɨ Itiopiaba bar atiatigh dɨgavir kuram damigham.
Ia ikiangsɨzir akam baragh! Dughiar kurar kam, bar roghɨra izi!
10 “Kɨ Ikiavɨra Itir Godɨn Ekiam, kɨ kamaghɨn mɨgei:
Kɨ Babilonian Atrivim Nebukatnesar amamangatɨghtɨ,
a Isipɨn gumazamizir avɨriba agɨvagham.
11 A uan mɨdorozir gumazir bar kuraba ko izɨva Isipɨn nguazim bar a gasɨghasigham.
Me izɨ uan mɨdorozir sababar Isipia mɨsoghɨrarightɨ,
Isipɨn nguazim gumazir kuaba bar a gizɨvagham.
12 Aisaia 19:4-6Kɨ Nailɨn Fanem damightɨ a dakegham.
Egh Isip isɨ gumazir arazir bar kurabagh amibar dafarim datɨgham.
Egh kɨ azenan izezir gumazamizibar amamangatɨghtɨ,
me izɨ nguazim ko a gisɨn itir biziba bar dagh asɨghasigham.
Kɨ Ikiavɨra Itir God, kɨ kamaghɨn mɨkeme.
13 “Kɨ Ikiavɨra Itir Godɨn Ekiam, kɨ kamaghɨn mɨgei:
Kɨ Isipɨn kantrin nguibar ekiam Memfis, an marvir guaba ko aseba bar adagh asɨghasigham.
Eghtɨ tam ua Isipɨn atrivimɨn ikian kogham.
Egh kɨ gumazamiziba bar me damightɨ me bar atiatigham.
14 Kɨ Isipɨn sautɨn amadaghan itir nguibar ekiam Patros damightɨ, biziba bar an puvatɨgham.
Egh notɨn amadaghan nguibar ekiam Soan, avim a datɨghtɨ a isigham.
Egh kɨ nguibar ekiam Tebes, an gumazamiziba tuisɨgh ivezir kuram a danɨngam.
15 Pelusiumɨn nguibar ekiam, a Isipɨn nguibar ekiar bar gavgavim,
kɨ uan anɨngagharim a gingegh a damightɨ,
an gumazamiziba osɨmtɨziba ini maburan mɨzaziba ateram.
Egh Tebesɨn nguibar ekiam,
kɨ an gumazamizir avɨrim bar me gasɨghasigham.
16 Kɨ Isip avim a datɨgham.
Eghtɨ nguibar ekiam Pelusium, maburan osɨmtɨziba ko mɨzaziba iniam.
Eghtɨ apaniba Tebesɨn nguibar ekiamɨn dɨvaziba akararigham.
Eghtɨ Memfisɨn nguibar ekiam, apaniba dughiabar zuraram an izɨvɨra ikɨtɨ,
an nguibar ekiam aperiam a batogham.
17 Eghtɨ Heliopolisɨn nguibar ekiam, ko Bubastisɨn nguibar ekiam, aningɨn gumazir igiaba mɨdorozimɨn arɨghiregham,
eghtɨ aningɨn gumazamizir igharaziba, apaniba me inigh mangɨ
kantrin igharazimɨn me kalabuziabar mɨn me arɨgham.
18 Isipia faragha uan gavgaviba bagha bar akongegha uari fe.
Eghtɨ kɨ bar Isipɨn gavgaviba abɨragham.
Eghtɨ mɨtarmer kuram,
Tapanesɨn nguibar ekiam avaragham.
Overiamɨn ghuariar pɨzir tam Isip avaraghtɨ,
apaniba an gumazamiziba bar me inigh kalabuziabar mɨn me arɨgham.
19 Kɨ Isipian arazir kuraba tuisɨgh ivezir kuram isɨ me danɨngightɨ,
me fogh suam, kɨ Ikiavɨra Itir God.”
Isipɨn atrivimɨn gavgavim gɨfa
20 E kalabuziabar mɨn itima, namba 11ɨn azenimɨn, an faragha zuir iakɨnimɨn, namba 7ɨn aruemɨn, Ikiavɨra Itir God kamaghɨn na mɨgei, 21 “O nguazir kamɨn gumazim, kɨ Isipɨn atrivimɨn gavgavim abɨra, mati kɨ an agharim mɨsogha anepɨri. Ezɨ tav an agharim noghezir puvatɨ, eghtɨ a ua deragh gavgavightɨ, a ua mɨdorozir sabamɨn suigham. 22 Datɨrɨghɨn, kɨ Ikiavɨra Itir Godɨn Ekiam, kɨ kamaghɨn mɨgei: Ia oragh! Kɨ Isipɨn atrivimɨn apanim gami. Egh kɨ an agharimning uaghara aning mɨsogh aning apɨrigham. Eghtɨ an agharir aghuim ko agharir dɨpɨriaghirɨzim suirazir mɨdorozir sabam ateghtɨ a irɨgham. 23 Egh kɨ Isipia batuegh me aghamsightɨ, me tintinibar kantrin igharazibar mangegham. 24 Eghtɨ kɨ Babilonian atrivimɨn agharimning damightɨ aning gavgavigham. Kɨ uan mɨdorozir sabam an dafarim datɨgham. Kɨ Isipɨn atrivimɨn agharimning apɨrightɨ, a mɨzazir bar ekiam iniam. Egh Babilonɨn atrivimɨn damazimɨn mati gumazim aremeghasava amua bar puvɨra tuava arai. 25 Guizbangɨra, kɨ Isipɨn atrivim damightɨ a gavgaviba puvatɨgham. Egh kɨ Babilonian atrivim damightɨ a gavgavigham. Kɨ uan mɨdorozir sabam isɨ a danightɨ, a Isipian akaghtɨ me bar fogh suam, kɨ Ikiavɨra Itir God. 26 Egh kɨ Isipia batuegh me aghamsightɨ, me tintinibar kantrin igharazibar mangegham. Eghtɨ me kamaghɨn fogh suam, kɨ Ikiavɨra Itir God.”
<- Esekiel 29Esekiel 31 ->
30:12: Aisaia 19:4-6