Esekiel 24

Jerusalem mati mɨner mam

1 E namba 9ɨn azenimɨn Babilonɨn kalabuzɨn itima, an namba 10ɨn iakɨnimɨn, an namba 10ɨn aruem otozɨ,[a] Ikiavɨra Itir God kamagh na mɨgei. 2 [b]“O nguazir kamɨn gumazim, nɨ datɨrɨghɨn aruer kamɨn dughiam osirigh. Datɨrɨghɨn, dughiar kamra, Babilonian atrivim ghua, Jerusalem ekɨarughasava ami. 3 Nɨ ikɨzir akaba batozir kam, kɨ me bagha nɨ ganɨdir akar isɨn zuir kam isɨ, me mɨkemegh:

“Kɨ Ikiavɨra Itir Godɨn Ekiam, kɨ kamaghɨn me mɨgei,

Nɨ mɨnem isɨ avim dafagh,

egh dɨpam a gingeghtɨ a izɨfagh.

4-5 Egh sipsipbar tongɨn, sipsipɨn bar aghuir mɨkarzim sara ititam inigh a mɨsuegh aneghoregh,

an gurir tuzir bar aghuim ko an sueba, ko an agharir aghuiba inigh mɨnem daghuigh.

Egh agharir igharaziba isɨ asɨzibar apengan da amangigh,

egh asɨzir aghariba ko tuziba avikigh.

6 “Kɨ Ikiavɨra Itir Godɨn Ekiam, kɨ kamaghɨn mɨgei,

Gumaka! Jerusalemɨn nguibar ekiar kam, a bar ikuvigham.

A gumazamizir avɨribav suagharɨki.

A mati mɨner mam, an averiam bizir mɨzɨrɨziba an iti,

me tong a rueghan kogham.

Nɨ asɨzir tuzir kaba ko aghariba vaghvagh da inigh azenim darɨgh,

eghtɨ tam ua mɨnemɨn aven ikian markɨ.

Guizbangɨra, Jerusalemia bar ikuvigham.

7 Guizbangɨra, men arazir kuram azenimra iti.

Me mati, gumazim, mɨsoghezɨ an aremezɨ, an ghuzim dagɨam gire.

Gumazir kamɨn ghuzim nguazim girezɨ nguazir mɨneziba anevaragha a modozir puvatɨ.

A dagɨar azenan itim gisɨn ire.

Kamaghɨra, me azenara gumazamizibar damazimɨn kamaghɨn amima,

me bar men gari.

8 Kɨrara, kɨ ghuzim gamizɨ

a dagɨar azenan itim gisɨn ikia mamaghɨra itima, kɨ an gari.

Eghtɨ me modoghan kogham.

Kamaghɨn amizɨ, kɨ men arazir kuram gɨnɨghnɨgh,

puvɨram atarɨva a ikarvagham.

9 “Kɨ Ikiavɨra Itir God, kɨ kamaghɨn mɨgei,

Gumaka! Jerusalemɨn nguibar ekiar kam, a bar ikuvigham.

A gumazamizir avɨribav suagharɨki.

Kɨ uabɨ dazibar pozim mɨkɨnam.

10 Nɨ dazir avɨriba inigh izɨ!

Egh avim atɨgh a givi!

Egh asɨziba amangsɨzim ko iriziba sara da vereghtɨ, da isi.

Eghtɨ asɨzir tuziba isi mangɨtɨ dɨpam dakeghtɨ,

asɨzir aghariba bar isigh mɨghɨrigh.

11 Nɨ datɨrɨghɨn mɨnevsevim isɨ avivkɨabagh isɨn anefaghtɨ,

a isi mangɨ bar aghefegh.

Mɨner kam, a bar mɨze,

eghtɨ mɨnemɨn itir mɨneziba isi mangɨ bar gɨvaghtɨ,

mɨnem ua bar zuegham.

12 Ezɨ kɨ fo, avim mɨner kamɨn mɨnezibar isi da agɨvaghan kogham.

Nan ingangarim pura ghu, ezɨ kɨ bar amɨra.

13 O Jerusalem, mɨner kamɨn itir mɨneziba,

da nɨn arazir mɨzɨrɨzibar ababanim gami.

Kɨ zueghasa nɨ gamima,

nɨ mɨzeghvɨra iti.

Nɨ zueghan kogh ikɨ mangɨ

dughiar nan anɨngagharim gɨvaghamimɨn tugham.

14 Kɨ Ikiavɨra Itir God kamaghɨn mɨkeme,

kɨ ia gasɨghasɨghamin dughiam izi.

Kɨ a damu,

egh ian arazir kuraba ateghan kogham.

Egh ian apangkuvighan kogham.

Kɨ ia amizir arazir kuraba tuisɨgh,

da bagh ivezir kuram ia danɨngam.

Kɨ Ikiavɨra Itir Godɨn Ekiam, kɨ kamaghɨn mɨkemegha gɨfa.”

Godɨn akam inigha izir gumazim Esekiel, an amuim areme

15 Ikiavɨra Itir God kamaghɨn na mɨgei. 16 “O nguazir kamɨn gumazim, kɨ fo nɨ uan amuim bar faraghvɨrama anerɨgha bar a gifonge. Kɨ zuamɨra nɨ dam amizir kam inightɨ nɨ pura ikiam. Eghtɨ nɨ a bagh azian kogh temeriba iran markɨ. 17 Eghtɨ tav nɨn ararem baraghan markɨ. Nɨ nɨmɨra ikɨ uan navir averiamɨn aven osemegh. Nɨ zurara ami moghɨn uan inim isɨ uan dapanim gikeghɨva uan dagarir asuabar aghuigh, egh gumazim aremezɨ me a bagh aziava amir araziba, nɨ dar amuan markɨ. Nɨ uan guam avan markɨ. Egh nɨ azia itir darazi nɨ danɨngamin daghebar aman markɨ.”

18 Dughiar kamɨn, bar mɨzaraghara kɨ gumazamiziba ko mɨgɨa iti. Ezɨ guaratɨghɨn nan amuim areme. Ezɨ amɨmzaraghan kɨ Ikiavɨra Itir God na mɨkemezɨ moghɨn ami. 19 Ezɨ gumazamiziba kamaghɨn nan azai, “Nɨ manmaghsua kamaghɨn ami? Nɨ bizir kamɨn mɨngarimɨn gun e mɨkɨm.”

20 Ezɨ kɨ kamaghɨn me mɨgei, “Ikiavɨra Itir God na mɨgɨa ghaze: 21 Nɨ Israelɨn ikɨzimɨn mangɨ akar kam me mɨkɨm. Kɨ Ikiavɨra Itir Godɨn Ekiam, kɨ kamaghɨn mɨgei: Ia nan Dɨpenim bagha bar akongegha ghaze, a bar deragha gavgafi. Ia Dɨpenir kam bar faraghvɨrama anerɨgha bar a gifonge. Ia uan navir averiabar aven, zurara a baghavɨra iti. Ia bizir kam gɨfogh, kɨ a gasɨghasightɨ a bizir kɨnimɨn mɨn otogham. Eghtɨ ian borir Jerusalemɨn ikiavɨra itiba, me mɨdorozimɨn aven arɨmɨghiregham. 22 Eghtɨ dughiar kamɨn, ia kɨ amizɨ moghɨn damu. Egh uan akaba avan markɨ. Egh ia, azia itir darazi ia danɨngamin daghebar aman markɨ. 23 Ia zurara ami moghɨn, iniba isɨ uan dapaniba ikeghɨva dagarir asuabar aghuigh. Egh ia aziva arangan markɨ. Ia uan arazir kurabagh nɨghnɨgh aghariba guigh, uari uan navir averiabar aven osemegh azi. 24 Esekiel ia bagha ababanim gami, ezɨ ia an amizɨ moghɨra damu. Bizir kaba otoghamin dughiamɨn ia fogh suam, kɨrara, kɨ Ikiavɨra Itir Godɨn Ekiam.”

25 Ikiavɨra Itir God ua mɨgɨa ghaze, “O nguazir kamɨn gumazim, nan Dɨpenim men tongɨn itima me an gavgavim ko dirimɨn gara, ziar ekiam isa naviba bar akonge, egha me bar faraghvɨrama anerɨgha zurara bar a gifonge. Me uan navir averiabar aven, zurara a baghavɨra iti. Eghtɨ kɨ me da a batuegham. Egh uaghan men boriba me dama da inigham. 26 Kɨ kamaghɨn damuamin dughiamɨn, tav dughiar kurar kamɨn Jerusalemɨn mɨseveghɨrɨgh nɨ bagh izɨ nɨ mɨkɨmam. 27 Eghtɨ dughiar kamra, nɨ ua bizibav kɨmam. Eghtɨ nɨ gumazir kam ko mɨkɨm, egh ua nɨmɨra ikian kogham. Arazir kamɨn, nɨ mati ababanimɨn mɨn ikɨva fofozim gumazamizibar anɨngam, eghtɨ me fogh suam, kɨ Ikiavɨra Itir Godɨn Ekiam.”

<- Esekiel 23 Esekiel 25 ->