Link to home pageLanguagesLink to all Bible versions on this site
15
Kraisɨn adarazi Jerusalemɨn nguibamɨn uari akufa
1 [a]Ofa Gami 12:3; Jon 7:22; Galesia 2:12; 5:2; Kolosi 2:11; 2:16Ezɨ Judian Distrighɨn gumazir maba Antioghɨn izegha Kraisɨn adarazir sure gamua ghaze, “Ia Mosesɨn Arazimɨn gɨn mangan kogh, egh uan mɨkarzir mogomebar iniba aghoreghan koghtɨ, God ua ia inighan kogham.”*Gumazir kaba me Judan gumaziba, egha me ghaze, gumazir azenan itiba me en arazibar amuam. Men marazi fomɨra Farisibar ike. 2 [~4~]Aposel 11:30; Galesia 2:1Bizir kam bangɨn, Pol ko Barnabas maburan odorozim me koma a gami. Kamaghɨn amizɨ, Kraisɨn adarazi Pol ko Barnabas ko nɨghnɨzir gavgavim Iesusɨn itir gumazir maba sara me amɨsevegha ghaze, me Jerusalemɨn mangɨ bizir kam bagh aposelba ko Siosɨn gumazamizir dapanibav kɨmam.

3 Egha Kraisɨn adarazi, me amadazɨma me zui. Me Fonisian Distrik ko Samarian moghɨn ghua Kantrin Igharazibar Gumazamiziba uan navibagh irazir bizimɨn gun me mɨgei. Ezɨ Kraisɨn adarazi bar mɨgɨrɨgɨar kam baregha bar akonge.

4 [~6~]Aposel 14:27Ezɨ Pol ko Barnabas, me ko zui darazi ko, me Jerusalemɨn otivizɨ, aposelba ko Kraisɨn adarazi ko men gumazir dapaniba bar akuegha me ini. Ezɨ Pol ko Barnabas God aningɨn agharimɨn amizir bizibar, gun me mɨgei.

5 Ezɨ nɨghnɨzir gavgavim Iesusɨn itir gumazir maba, me fomɨra Farisibar mɨn ike, me dɨkavigha kamaghɨn mɨgei, “Kantrin Igharazibar Gumazamiziba uaghan Moses Osirizir Arazibar gɨn mangɨva uan mɨkarzir mogomebar aghor.”†Nɨ akar Filipai, 3:2ɨn itimɨn gan.

6 Ezɨ aposelba ko siosɨn gumazamizir dapaniba akar kam akɨrasa uari akufa. 7 [~9~]Aposel 10:1-43Dughiar ruarimɨn me bizir kam mɨgɨa ghua, Pita dɨkavigha me mɨgei, “Nan adarasi, ia fo dughiar maba gɨvazɨ God kamaghɨn ifonge, Kantrin Igharazibar Gumazamiziba nan akatorimɨn Akar Aghuimɨn mɨgɨrɨgɨam bareghɨva nɨghnɨzir gavgavim Iesusɨn ikiam. Egha a ian tongɨn na mɨsefe. 8 [~11~]Aposel 1:24; 2:4; 10:44; 11:15E fo, God gumazamizibar navir averiabagh fo. Egha a uan Duam me ganɨngi. An e gamizɨ moghɨra, me gami. Egha tuavir kamɨn a kamaghɨn en aka, a me gifuegha ua me ini. 9 [~13~]Aposel 10:15; 10:28; 10:34-35; Rom 10:11; 1 Korin 1:2; 1 Pita 1:22Godɨn damazimɨn Judaba ko Kantrin Igharazibar Gumazamiziba, e bar magh ghue. Kantrin Igharazibar Gumazamiziba nɨghnɨzir gavgavim Iesusɨn itima, God men nɨghnɨzir gavgavimɨn tuavimɨn, men navibagh amizɨ me an damazimɨn dera. 10 [~15~]Matyu 11:30; 23:4; Luk 11:46; Galesia 3:10; 5:1Ezɨ kamaghɨn ia tizim bagh God damightɨ, a ian nɨghnɨzibar gɨn mangam? Egha osɨmtɨzir faragha en ovaviba ateran iburaziba ko, osɨmtɨzir e uaghan datɨrɨghɨn ateran iburaziba, da isa nɨghnɨzir gavgavim Iesusɨn itir darazigh arɨsi. 11 [~17~]Rom 3:24; Galesia 2:16; Efesus 2:5-8; Taitus 2:11Kamaghɨn puvatɨ. En nɨghnɨzir gavgavim ghaze, en Ekiam Iesusɨn apangkuvimɨn, God uam e inizir moghɨra me ini.”

12 [~19~]Aposel 14:27Ezɨ gumazir uari akuvaziba bar nɨmɨra ikia Barnabas ko Pol barasi. Ezɨ aning mirakelɨn arazaraziba ko dɨgavir kuram gamir bizibar gun me mɨgei. Egha aning ghaze, God aningɨn dafaribar arazir kaba Kantrin Igharazibar Gumazamizibar tongɨn, dagh ami.

13 [~21~]Galesia 2:9Aning mɨkemegha gɨvazɨ Jems kamaghɨn mɨgei, “Nan adarasi, ia na baragh. 14 [~23~]Aposel 15:7-9Saimon kamaghɨn e geghara ghaze, kar faragha zuir dughiam, God Kantrin Igharazibar Gumazamiziba uan apangkuvim men akagha, men tongɨn gumazir maba ua bagha me inigha me gamizɨ, me an gumazamizibar otifi. 15 Godɨn akam inigha izir gumazibar mɨgɨrɨgɨamɨn mɨrara ghu. Me fomɨra kamaghɨn osiri, men mɨgɨrɨgɨamɨn osizirimra kara:

 
16 Amos 9:11-12“ ‘God kamaghɨn mɨgei,
Devitɨn ovaviba mati, purirpenim degiaghirɨ.
Egh kɨ gɨn uamategh izɨ,
an ingarightɨ a tugham.
An bizir ikuviziba kɨ ua dar ingarigham,
egh kɨ a damightɨ
a ua deragham.
17 Eghtɨ gumazamizir ikiavɨra itir naba
God bagh ruiam.
Kantrin Igharazibar Gumazamizir nan ziamɨn itiba
bar uaghan na buriam.
18 Ekiam kamaghɨn mɨkeme.
A bizir kaba fomɨra gumazamizibar akazɨ
me dagh fo.’ ”
 
19 Jems ua kamaghɨn mɨgei, “Nan nɨghnɨzimra kara, Kantrin Igharazibar Gumazamiziba, me navibagh iragha God bagha zui. Eghtɨ e men tuaviba apɨran kogham. 20 [~26~]Jenesis 9:4; Ua Me Ini 34:15-17; Ofa Gami 17:10-16; 18:6-23; 1 Korin 6:9; 6:18; 8:1; Galesia 5:19; Efesus 5:3; Kolosi 3:5; 1 Pita 4:3E me bagh osir kamaghɨn me mɨkɨm suam, ia dagher me marvir guabagh anɨdibar aman markɨ. Ia dar amɨ kamaghɨn ia Godɨn damazimɨn mɨzegham. Ia dagher kabar aman markɨ. Ia uari isava akuir arazir kurabar amuan markɨ. Egha asɨzir me benibar fɨribagh afi ariaghɨriba, dar ghuziba darara iti, ia dar aman markɨ. Egh ia ghuzibar aman markɨ. 21 [~28~]Aposel 13:15E fo, Moses osirizir arazir kamnagh fomɨra iza datɨrɨghɨn, me an akam nguibar ekiabar aven bar anekura, egha Sabatba zurara God ko mɨgeir dɨpenibar aven a dɨbori.”‡Judaba, me Israelɨn nguazimra itir puvatɨ. Fomɨra me ghua kantrin igharazir Israelɨn nguazim boroghɨra itibar iti. Egha men God ko mɨgeir dɨpeniba, nguibar ekiamɨn uaghan nguazir kam iti. Nɨ akar Aposel 2:5-11ɨn itimɨn gan. Kamaghɨn, nguibar ekiar kabar itir gumazamiziba, me Moses Osirizir Arazibar akaba da baregha gɨfa.
Me Kantrin Igharazibar Gumazamizir God gɨfoziba bagha akɨnafarim amadi
22 Egha aposelba ko siosɨn gumazamizir dapaniba ko Jerusalemɨn itir Kraisɨn adarazi bar mɨkemegha, uarir tongɨn gumazir maba mɨsevegha me amadazɨ me Pol ko Barnabas ko Antioghɨn zui. Me gumazir dapanir pumuning uaghan aning amɨsefe: Sailas ko Judas, an ziar mam Barsabas. Gumazir kamning Kraisɨn adarazir faragha zui. 23 Egha me akɨnafarir kam me koma anemada:
 
E, aposelba ko siosɨn gumazamizir dapaniba, e ian adarasi.
Ia Kantrin Igharazimɨn itir nɨghnɨzir gavgavim Iesusɨn itir darasi, ia Antioghɨn nguibar ekiam ko Sirian Provins ko Silisian itiba. Akɨnafarir kam ia bagha izi. Dughiar aghuim.
24 [~31~]Aposel 15:1E kamaghɨn oraki, en tongɨn marazi me en azarazir puvatɨgha, ghua ia mɨgɨa ian nɨghnɨzibagh asɨghasɨki. Me ia gifarazɨ ia okam nɨghnɨsi. 25 Ezɨ e bar navir vamɨra inigha gumazir maba ko en namakar aghuimning Barnabas ko Pol a mɨsevegha me amada. 26 [~33~]Aposel 13:50; 14:19; 1 Korin 15:30; 2 Korin 11:23; 11:26Gumazir kamning, aning en Ekiam Krais Iesusɨn ziam bagha nguazir kamɨn ikɨrɨmɨrim ategha uaningɨn sa. 27 Kamaghɨn amizɨ, Judas ko Sailas uaghan akamɨn ia mɨkɨmasa, e aning amada. 28 [~35~]Matyu 23:4E Godɨn Duam ko navir vamɨra ikia kamaghɨn nɨghnɨgha ghaze, e osɨmtɨzitam ua ia darɨghan kogham. Bizir e ia mɨkemeziba, darara ia dar gɨn mangɨ. 29 [~37~]Ofa Gami 17:14; Aposel 15:20; 21:25; Akar Mogomem 2:14; 2:20Ia me marvir guabagh anɨdir daghebar aman markɨ, egh asɨzibar ghuzibar aman markɨ, egh me beniba fɨribagh afi ariaghirir asɨzibar aman markɨ, egh uari isava akuir arazir kurabar amuan markɨ. Ia bizir kaba ategh deragham. En akam kamaghɨra tu.
 
30 Egha Jerusalem itir Kraisɨn adarazi gumazir kaba amadazɨ, me Jerusalem ategha Antioghɨn iraghuegha Kraisɨn adarazi akuvagha akɨnafarim me ganɨngi. 31 Ezɨ Antioghɨn itir Kraisɨn adarazi akɨnafarir kam barazima, a gavgavim me ganɨga men navibagh ami da dera. Ezɨ me bizir kam bagha bar akonge. 32 [~39~]Aposel 11:27; 14:22Judas ko Sailas aning uaghan Godɨn akam inigha izir gumazimning. Egha aning mɨgɨrɨgɨar avɨribagh ami. Kamaghɨn, aning gavgavim Kraisɨn adarazi ganɨga mɨgɨrɨgɨar akurvazir avɨribar me gami. 33-34 Egha aning dughiar maba mong Antioghɨn me ko ike. Ezɨ gɨn Kraisɨn adarazi navir amɨrizim sara me amadazɨ, me Jerusalemɨn uamategha gumazir me amangiziba bagha zui.§Fofozir gumazir maba uaghan kamaghɨn nɨghnɨsi, mɨgɨrɨgɨar otevir mam uaghan kagh iti. Mɨgɨrɨgɨar kam kamaghɨn ghu, “Ezɨ Sailas uan nɨghnɨzim gɨn ghua Antioghɨn iti.” 35 Ezɨ Pol ko Barnabas Antioghɨn ikia gumazir avɨrir maba ko gumazamizibar sure gamua Ekiamɨn akam akuri.
Pol ko Barnabas uaning abɨki
36 Dughiar maba gɨvazɨ, gɨn Pol kamaghɨn Barnabas mɨgei, “Ga uamategh nguibar ekiar ga Ekiamɨn akam akuniziba, bar dar mangɨva uan adarazir ganam, me manmaghɨn iti.” 37 [~42~]Aposel 12:12; 12:25; Kolosi 4:10; 2 Timoti 4:11Ezɨ Barnabas kamaghɨn nɨghnɨsi, a Jon, an ziar mam Mak, an a inightɨma, a aningɨn gɨn mangam. 38 [~44~]Aposel 13:13; Kolosi 4:10Jon Mak Pamfilian purama aning ataki, egha aning ko ingangarim a gɨvazir puvatɨ. Kamaghɨn an aning ko mangan Pol aghua. 39 Egha aning odorozir dafam gamigha kamaghɨn aning uaning abɨki. Ezɨ Barnabas ko Mak kurim inigha arighatɨzim Saiprusɨn ghu. 40 Ezɨ Pol Sailas amɨsefe. Ezɨ Kraisɨn adarazi uari akuvagha aning isa Godɨn agharim gatɨgha kamaghɨn mɨgei, “Godɨn akurvazim gua ko ikɨ.” Ezɨ aning ghu. 41 Egha aning Sirian Provins ko Silisian moghɨn ghua Pol gavgavim Kraisɨn adarazigh anɨdi.

<- Aposel 14Aposel 16 ->