1 Kaling mgo suun ku no tinawag dow inabin to Diyus, ibotang yagboy duon to hona-hona now si Jesus no iyan pigsugu to Diyus to pagtuman to pagboot din. Sikandin isab to kinayabawan no magdudumaya to tinuuhan no pigtagonan ta. 2 Matinumanon sikandin to Diyus no iyan migbogoy kandin to sikan no katongdanan, angod isab to pagkamatinumanon ni Moises no migdumaya to kaotawan to Diyus to diya una no og-ilingon to panimayoy to Diyus. 3 Di si Jesus iyan angajan no ogpasidonggan yabow ki Moises. Su ko igpananglit ta to bayoy no oghinangon, sikan oghinang iyan ogkapasidonggan, kona no sikan bayoy. 4 Kada bayoy meyduon mighinang, di to Diyus iyan yabow no ogkapasidonggan su sikandin man to mighinang to tibo. 5 Na, si Moises matinumanon no suguonon duon to panimayoy to Diyus, aw to ingnawnangon din yambung puli to sikan igmaan to Diyus diya to umaabut no panahon.*Ingmaan on sikan pinaagi ki Jesus. Basaha to Hibru 1:1,2.6 Di si Cristo yabow pad ki Moises su Anak man yagboy sikandin no matinumanon no ogdumaya duon to panimayoy to Diyus no Amoy din. Sikita sikan og-ilingon to panimayoy din ko masaligon ki no ogpaabut to sikan insaad ni Cristo no iyan isab igpanghimantug ta.
Kona Ki Ogsupak to Diyus
7 Kaling ogligdongan ta to kagi to Ispiritu Santu bahin to diya masinupakon no mgo Hibru no pig-iling,
“Kuntoon no aedow, ko meyduon igpadinog iyu to Diyus,
8-9 kona kow ogpadoson-doson
angod to diya mgo kaaw-apuan now
no migsupak to Diyus diya to matahay no banwa.
Su kagi to Diyus,
‘Inggad naaha dan on to mgo milagru no pighinang ku sed to kap-atan no tuig,
migpadajun gihapun sikandan to pag-anti kanay.
10 Kaling hilabi a naboyu kandan
aw nakaikagi a to,
Kanunoy ogsuwoy to hona-hona dan,
aw kona sikandan og-unug kanay.
11 Tongod to hilabi no kayangot ku,
nanapa a no konad sikandan ogpakased duon to sikan banwa
no pighinaat ku no ogkapahuwajan dan podom.’ ”†Salmo 95:7-11
12 Kaling mgo suun, susiha to ginhawa now su unu ko meyduon duma duon iyu no ogpakasae aw og-ojow to pagtuu. Su pinaagi to sikan, ogkatalikudan dan to buhi no Diyus. 13 Nasi no kotob mey pad panahon, ogdinasigay kinow agun kona ki malimbungan to sae no iyan ogpakailing to pagdoson to uyu ta. 14 Su ogkatawag ki no mgo duma ni Cristo ko padajunon ta to madigon no pagsalig kandin angod to diya bag-u ki pad tuu. 15 Ibotang duon to ginhawa now sikan pig-iling,
“Kuntoon no aedow, ko meyduon igpadinog iyu to Diyus,
kona kow ogpadoson-doson
angod to diya mgo kaaw-apuan now
no migsupak to Diyus diya to matahay no banwa.”‡Salmo 95:7,8
16 Na, hintawa man to diya namakadinog to kagi to Diyus di migsupak gihapun? To diya mgo Hibru no pigdaya ni Moises likat to Ehipto. 17 Aw hintawa man to diya migpayangot to Diyus sed to kap-atan no tuig? To diya da gihapun mgo Hibru no namakasae. Kaling pigpahamtangan sikandan to kastigu aw kangkamatoy duon to sikan matahay no banwa. 18 Sikandan gihapun no masinupakon no mgo otow to pig-igu to sapa to Diyus no pig-iling,
“Konad sikandan ogpakased duon to sikan banwa
no pighinaat ku no ogkapahuwajan dan podom.ӤSalmo 95:11
19 Kaling namaan ki no iyan wada dan ikased duon to sikan no banwa su wada sikandan tuu to diya pig-ikagi to Diyus.
<- Hibru 2Hibru 4 ->
aIngmaan on sikan pinaagi ki Jesus. Basaha to Hibru 1:1,2.
