1 Nba, Rɔmu mansaba Tiberi la mansaya san tan ni looluna, Ponse Pilate tɛrɛ ye Jude mara kun na, ni Herodi tɛrɛ ye Kalile mara kun na, ni a kɔrɔcɛ Filipe tɛrɛ ye Iture ni Tirakoniti marailu kun na, a ni Lisaniyasi tɛrɛ ye Abilɛni mara kun na. 2 Anasi ni Kayifasi tɛrɛ ye sarakalasela kuntiibaya la.
Wo tuma, Alla ka a la kuma lase Sakariya dencɛ Yaya ma wula kɔndɔ. 3 Yaya wulira wo rɔ, ka wa kawandili kɛ Juridɛn Ba fan dɔ. A ka a fɔ mɔɔilu yɛ ko ii ye sun ji rɔ tubi kanma, sa Alla ri yafa ii julumun dɔ. 4 Wo kɛra ikomin Nabi Esayi ka a sɛbɛ ɲa mɛn ma ko:
«Mɔɔ do ri na a kan nabɔ wula kɔndɔ
ka a fɔ mɔɔilu yɛ ko ii ye sila ba rabɛn Maari yɛ,
ka ban ka sila denni bɛɛ latelen a yɛ.
5 Dinban kɔndɔla bɛɛ ye lafa.
Koyinkɛ ni tindi bɛɛ ye rakanya.
Sila rakundunilu ye latelen.
Sila juu ye rabɛn ka nunku.
6 Wo wa kɛ, adamadenilu bɛɛ ri Alla la kisi ko yen.»
7 Jama tɛrɛ ye nala Yaya ma sun ji rɔ kanma. A ka a fɔ doilu yɛ ko: «Aileilu fɔnfɔnni, yon ka Alla la kititɛɛ ɲafɔ ai yɛ? 8 Ai ye kɛwali kɛ ikomin jiri den mɛn da yiraka ko ai tubini. Ai kana a fɔ ai jɛrɛ yɛ ko ‹Iburahima ye an fa le ri.› Baa n ye fɔla ai yɛ ko Alla ri se kaba ɲin kɛla Iburahima denilu di. 9 Sisen, tɛɛran da wuli jiri lulu tɛɛ kanma. Jiri mɛnilu tɛ den ɲuma kɛla, woilu ri tɛɛ ka lafili ta rɔ.»
10 Mɔɔilu ka Yaya maɲininka ko: «An ye nfen de kɛ wo rɔ?» 11 Yaya ka ii jabi: «Duruki kɔrɔbila fila ye mɛn bolo, wo ye fɛriyatɔ sɔ duruki kelen na. Dɔɔnin fen tii, wo fanan ye mɔɔ sɔ wo ɲa ma.» 12 Niisankɔmirala doilu fanan nani sun ji rɔ kanma. Ii ka Yaya maɲininka ko: «Karanmɔɔ, an ye nfen de kɛ wo rɔ?» 13 A ka a fɔ ii yɛ ko: «Ai ka kan ka jate mɛn mira mansa yɛ, ai ye dan wo ma. Ai kana foyi la wo kan.» 14 Kɛlɛden doilu fanan nara a maɲininka ko: «Andeilu don? Andeilu ka kan ka nfen de kɛ wo rɔ?» A ka ii jabi: «Ai kana mɔɔ bolofen si mira a la fanka la. Ai kana maborili kɛ wuya la fanan. Ai ye ai wasa don ai sara rɔ.»
15 Ii bɛɛ tɛrɛ ye imirila ii jusu rɔ ko: «Mɔɔ Ɲenematɔmɔnin mɛn ko fɔni, Yaya le wo ri wo rɔ wa?» Baa, mɔɔilu tɛrɛ ye wo kisiba makɔnɔla. 16 Ka bɛn ii miriya wo ma, Yaya ka a fɔ ii yɛ ko: «Nde ye ai sunna ji rɔ, kɔni dogbɛrɛ natɔ n kɔ, mɛn fanka ka bon n ta ri. Hali ka n birin ka a la sanbara julu fulɛn a yɛ, wo ka bon nde ma. Ale natɔ ai sunna Alla la Nii Sɛniman dɔ, a ni ta! 17 A la fɛrɛ ye a bolo, a ri a la sɛnɛ suman bu ni a fofo ni a kisɛ bɔ a ɲɔɔn dɔ fɛrɛ mɛn na. A wa wuli wo baara kanma, a ri suman kisɛ ni a bu bɔ ɲɔɔn dɔ. A ri suman kisɛ kɛ bondon kɔndɔ, ka ban ka bu bɛɛ janin ta la. Ta wo ye ta sabali ri, mɛn tɛ ban habadan.» 18 Yaya ka fen siyaman fɔ ii yɛ, ka ii kawandi, ka Alla la kibaro ɲuma lase ii ma.
19 Yaya ka jamanatii Herodi jalaki fanan, ka a masɔrɔn a tun da a kɔrɔcɛ muso Herodiyasi mira a la. Yaya ka Herodi jalaki kojuu siyaman dɔ. 20 Jalakili wo gbara Herodi la, fɔɔ ka Yaya mira ka a bila kaso la. Herodi ka kojuu kɛ wo rɔ, ka wo fanan la a la kojuu tɔilu bɛɛ kan.
Isa sun ji rɔ ko
21 Mɔɔilu ye nala sun ji rɔ kanma tuma mɛn na, Isa fanan nara a sun diya ji rɔ[a]. Ka Isa to Alla matarala sun ji rɔ diya ye, sankolo lakara. 22 Alla la Nii Sɛniman ka kanba fari ɲɔɔn ta ka jii Isa kan. Kumakan do bɔra sankolo rɔ ka a fɔ ko: «N niikan dencɛ le i ri. I duman n yɛ kosɛbɛ!»
Isa buruju
23 Isa bɔra sun ji rɔ diya ka a la baara damira. Wo ka a tɛrɛn a ra san bisawa ɲɔɔn sɔrɔn. Mɔɔilu tɛrɛ a jatela Yusufu dencɛ le ri.
