1 Nba, lon do rɔ, Rɔmu mansa ba Ɔjusiti ka a fɔ ko a la mansaya yɔrɔ bɛɛ mɔɔilu bɛɛ ye wa tɔɔ sɛbɛli diya. 2 Kirinisi le tɛrɛ ye jamanatiiya la Siri waati wo la, wo tɔɔ sɛbɛli fɔlɔ. 3 Ka bɛn tɔɔ sɛbɛ ko ma, mɔɔ bɛɛ wara a fa so kɔndɔ. 4 Wo rɔ, Yusufu bɔra Nasarɛti, mɛn ye Kalile mara rɔ, ka wa Jude mara rɔ. A wara Bɛtilɛhɛmu, Mansa Dawuda la so kɔnin, ka a masɔrɔn ale ye Mansa Dawuda bɔnsɔn de ri. 5 Mariyamu wara a kɔfɛ, mɛn mamirani a bolo la. Alu fila wara ie tɔɔ sɛbɛli diya Bɛtilɛhɛmu. Wo tuma, Mariyamu kɔnɔma le tɛrɛ.
6 Ka ie to Bɛtilɛhɛmu, Mariyamu moyi lon sera. 7 A moyira a dencɛ fɔlɔ la. A ka faanin miniminin den ɲɛrɛnni ma ka a la kolofen na damunun kɛ fen kɔndɔ, baa alu tun ma jiya diya sɔrɔn lɔndan jiya bon na.
Mɛlɛka ka Isa sɔrɔn ko fɔ saagbɛngbɛnna doilu yɛ
8 Wo tuma, saagbɛngbɛnna doilu tɛrɛ ye Bɛtilɛhɛmu so da la. Alu tɛrɛ ye sila ie ɲana waa rɔ ye, ka ie janto ie la saa kuruilu rɔ. 9 Su wo rɔ, Maari Alla la mɛlɛka do ka a jɛrɛ yiraka woilu la. Maari Alla nɔɔrɔ mɛlɛnda ka ie laminin, ka ie masilan kojuuya. 10 Kɔni mɛlɛka ka a fɔ ie yɛ ko: «Ai kana silan, baa n nani kibaro ɲuma fɔla ai yɛ, mɛn di ai la jamana mɔɔilu bɛɛ lasewa kosɛbɛ. 11 Kisiba ra sɔrɔn ai yɛ bi, Mansa Dawuda la so kɔndɔ. Ale le Maari ri, Alla la Mɔɔ Ɲenematɔmɔnin kɔnin. 12 N ye tɔɔmasere mɛn yirakala ai la: Ai ye wa den ɲɛrɛnni sɔrɔn, a mamini faanin dɔ, a lani soboilu la damunun kɛ fen kɔndɔ.» 13 I kɔrɔkɔrɔ wo rɔ, wo yɔrɔ kelen dɔ, mɛlɛka siyaman ba bɔra ka na la mɛlɛka fɔlɔman wo kan. Alu bɛɛ ladɛnni ka Alla tando ko: 14 «Gbiliya ye kɛ Alla yɛ mɛn ye sankolo rɔ. Jusu suma ye kɛ mɔɔilu yɛ duukolo kan, mɔɔ mɛnilu duman a yɛ kɔnin.»
Saagbɛngbɛnnailu wara den ɲɛrɛnni mafɛnɛ diya
15 Mɛlɛkailu koseyi mɛn kɛni sankolo rɔ, saagbɛngbɛnnailu ka a fɔ iɲɔɔn yɛ ko: «An ye wa Bɛtilɛhɛmu. Alla ra ko mɛn lase an ma, an ye wa wo lakɔrɔsi.» 16 Alu ka ikaliya ka wa Mariyamu ni Yusufu tɛrɛn. Alu ka den ɲɛrɛnni lani tɛrɛn kolofenilu la damunun kɛ fen kɔndɔ. 17 Alu ka den wo yen ɲa mɛn ma, alu ka wo bɛɛ dantɛɛli kɛ mɔɔilu yɛ. 18 Mɛnilu ka ie la dantɛɛli kan namɛn, woilu bɛɛ kabannakoyara. 19 Kɔni Mariyamu ka wo bɛɛ to a jusu rɔ ka imiri wo ma kosɛbɛ. 20 Saagbɛngbɛnnailu wo ka ie kɔseyi waati mɛn na, alu bɛɛ ka Alla gbiliya ka a tando, alu ka mɛn bɛɛ lamɛn a ni alu ka mɛn bɛɛ yen, a bɛɛ kɛra ikɔ mɛlɛka ka a fɔ ie yɛ ɲa mɛn ma.
Den sɔrɔnbailu wara a ri Allabatobonba kɔndɔ
21 Den sɔrɔn ka tele seyin bɔ tuma mɛn, alu ka a la kojii kɛ. A tɔɔ lara ko Isa, mɛlɛka ka tɔɔ mɛn fɔ Mariyamu yɛ, ka a tɛrɛn a tun ma kɔnɔ ta burun. 22 Alu sɛniya waati dafara tuma mɛn, sɛniya waati mɛn sɛbɛni Nabi Musa la sariya rɔ kɔnin, Yusufu ni Mariyamu wara den di Jerusalɛmu. Alu wara a yiraka kanma Maari Alla la, 23 baa a sɛbɛni Maari Alla la sariya rɔ ko: «Ni i den fɔlɔ kɛra cɛman di, den wo ye a bila a dan na Maari Alla yɛ.» 24 Maari Alla la sariya ka saraka mɛn fɔ, ko kanba fila wala so kɔndɔ kanba fila, Yusufu ni Mariyamu ka wo bɔ.
Simeyɔn ni Ana ka den ɲɛrɛnni yen
25 Wo tuma, cɛ do tɛrɛ ye Jerusalɛmu ye, mɛn tɔɔ ko Simeyɔn. Mɔɔ ɲuma le tɛrɛ; a silanni Alla yɛ a ɲa jɛrɛ jɛrɛ ma. Alla tun ka kisiba lahidi mɛn ta Isirayɛli mɔɔilu yɛ, Simeyɔn tɛrɛ ye wo dafa makɔnɔla. Alla la Nin Sɛniman tɛrɛ ye Simeyɔn kan. 26 Alla la Nin Sɛniman tun da a yiraka a la ko a tɛ sa fewu foo a ɲa wa ban lala Maari la Ɲenematɔmɔnin kan.
27 Nba, Alla la Nin Sɛniman ka Simeyɔn nana Allabatobonba kɔndɔ. Wo waati kelen, Yusufu ni Mariyamu nara den di ye ka sariya ko ɲanabɔ. Alu don mɛn kɛni Allabatobonba la, alu bɛnda Simeyɔn na. 28 Simeyɔn ka den ɲɛrɛnni ta ka Alla tando. A kan ko:
29 «Sisen, n Maari Alla,
i ri i la jɔn boloka ka wa jususuma rɔ
ka bɛn i la kumakan ma.
30 N jɛrɛ ɲa ra la i la kisiba kan bi,
31 i ka mɛn dabɛn adamadenilu bɛɛ ɲana.
32 A kɛtɔ kɛnɛbɔlan di,
mɛn di i la sila yiraka siya gbɛrɛilu la.
A ri bonya di i la mɔɔilu Isirayɛli ma.»
33 Mɛn fɔni Isa ma Simeyɔn bolo, wo ka a fa ni a na kabannakoya. 34 Simeyɔn duwara ie yɛ, ka ban ka a fɔ Isa na Mariyamu yɛ ko: «I tolo malɔ! Den ɲin di Isirayɛli mɔɔilu siyaman nabe, ka siyaman fanan kɔrɔta. A ri kɛ Alla la tɔɔmasere ri, mɔɔ siyaman di iban mɛn dɔ kɔnin. 35 Wo rɔ, miriya mɛnilu ye mɔɔ siyaman kɔndɔ, woilu ri bila gbɛ rɔ. Kɔni ile, i ri dunin ba sɔrɔn i jusu rɔ. A ri kɛ iko fan wa i sɔɔ.»
36 Wo ka Alla la nabiɲuma muso do fanan tɛrɛn Allabatobonba kɔndɔ, mɛn tɔɔ ko Ana. A fa, mɛn bɔni Asɛri bɔnsɔn dɔ, a tɔɔ tɛrɛ ye ko Fanuyɛli. Ana ra kɔrɔya bakɛ. A sunkurunya waati, a furura a cɛ bolo ka san wɔrɔnwula kɛ. 37 A furu san wɔrɔnwula, a cɛ sara ka a kelen to ye. Sisen, a sɔrɔn tun da san biseyin a ni san naanin bɔ. A ye Allabatobonba kɔndɔ tuma bɛɛ, ka Alla bato su ni tele. A la baara ye sun don di, a ni Alla matara. 38 Ana nara se Yusufu ni Mariyamu kɔfɛ. A ka baraka bila Alla yɛ kosɛbɛ, ka ban ka wo den na ko fɔ mɔɔilu yɛ, mɛnilu jii lani Alla kan ko a ri Jerusalɛmukailu hɔrɔya ka bɔ ie la tɔrɔya rɔ.
Yusufu ni Mariyamu wara Isa ri Nasarɛti so kɔndɔ
39 Fen fen fɔni Alla la sariya rɔ, Yusufu ni Mariyamu ka wo bɛɛ kɛ, ka ban ka ikɔseyi Kalile mara rɔ. Alu wara isii ie jɛrɛ la so la, Nasarɛti kɔnin. 40 Denni kunbayara, ka fanka sɔrɔn a fari rɔ. A walijiyara. Alla la ɲumaya ye a kan.
Isa wara Taminkunna Sali rɔ
41 San san Isa sɔrɔnbailu tun di wa Taminkunna Sali kɛ Jerusalɛmu. 42 Ka bɛn Isirayɛli mɔɔilu la namun ma, Isa ka san tan ni fila sɔrɔn san mɛn na, a fanan wara sali rɔ a sɔrɔnbailu kɔfɛ. 43 Sali ban mɛn kɛni, Isa sɔrɔnbailu ka sila ta ka wa so. Jaa, Isa ra to ie kɔma Jerusalɛmu ye, kɔni alu ma wo lɔn. 44 Iko alu mɔɔ siyaman ba tɛrɛ ye sila kan ka wa so, alu lara a la ko Isa ye ie taama ɲɔɔn do bolo jama tɛma ye. Wo bolo ma, alu ka tele wo muumɛ kɛ taamala. Kɔni fitiri waati seni, alu ma Isa yen fewu! Alu ka a ɲinin ie wara mɔɔilu tɛma, a ni ie taama ɲɔɔnilu. 45 Alu ma a yen. Wo rɔ, alu ka ikɔseyi ka wa a ɲinin Jerusalɛmu. 46 A tele sawanan lon, alu donda Allabatobonba kɔndɔ ka Isa siini tɛrɛn dina karanmɔɔilu tɛma. A tɛrɛ ye a tolo malɔla ie la ka ɲininkali kɛ ie kun ma. 47 A la hankilimaya ni a la jabili ka woilu bɛɛ kabannakoya. 48 A sɔrɔnbailu ka a yen tuma mɛn, alu fanan kabannakoyara. A na ka a maɲininka ko: «N dencɛ, nfenna i ra ko su ɲin kɛ an na? An haminni tɛrɛ kojuuya. An tun da i ɲinin fan bɛɛ ka kaɲa.» 49 Isa ka a jabi: «Nfenna ai tɛrɛ ye n ɲininna ten? Ai ma a lɔn ko n ye n fa la bon na wa?» 50 Kɔni a sɔrɔnbailu ma wo kɔrɔ lɔn.
51 Isa wara ie kɔfɛ Nasarɛti, ka to ie bolo ye. A tɛrɛ ye ie kan mirala tuma bɛɛ ka bonya di ie ma. Ko mɛnilu bɛɛ taminni, a na kɔnin ka woilu bɛɛ to a jusu rɔ. 52 Isa tora kunbayala a fari rɔ. A walijiyara. A diyara Alla yɛ, a ni mɔɔilu fanan yɛ.
