1 Anggammua' sa'do'dorangku, kuinawa-nawa anna kupa'sambayangan liu langngan Dewata kela ullambi' siapa duka' kasalamasan satondokku to Yahudi. 2 Kusa'bii kumua tontong liu duka' barring umpeang lalan la umpomasannang Puang Allata'alla, sapo tae' ummissanan tongan lalan pa'kuanna Puang Allata'alla. 3 Untumpu pala'mi pa'patantunna Puang Allata'alla la naola ummangga' malolo ma'rupa tau annu tae' naissanan lalanna, anna pa'palako kalenamo narannuan. 4 Annu sitonganna Kristusmo kasaeanna lako Pepa'guruanna Musa, napolalan mentu'na to ummoreanni la naangga' malolo Puang Allata'alla.*Kristusmo kasaeanna lako Pepa'guruanna Musa, Pikki' senga'na tau: Kristusmo umpatorro Pepa'guruanna Musa napolalan ta'mo dipake.
Kasalamasan ummolai kapangngoreanan
5 Mangka nauki' Musa umba la dikua malolo dio tingngayona Puang Allata'alla ke dituru' asanni issinna sura'na, nakua: “Benna-benna unturu' asan issinna Pepa'guruanna Musa la ullambi' katuoan mapia.”†Im. 18:5.6 Sapo la naangga' malolo Puang Allata'alla ummolai kapangngoreanan dengan tiuki' nakua:
“Tae' la mekutana illalan penawammua' kumua:
‘Benna la langngan suruga?’ ”
Kalembasanna la ussolaan Kristus turun tama lino.
7 “Battu' la mukua: ‘Bennamo la lu rokko linona to mate?’ ”
Kalembasanna la ussolaan Kristus dio mai alla'na to mate.
8 Sapo tae'koa' la mekutana susi annu dengan tiuki' illalan Buku Masero nakua:
“Battakadanna Puang Allata'alla sikadappi'koa',
annu dio siami pudukmu anna illalan siamoa' penawammu.”‡Ul. 30:12-14.
Iamo kareba kipalanda' diona kapangngoreanan: 9 Ianna lemba'mo dio pudukmua' kumua Dewata tongan Puang Yesus, anna mangngorean illalan penawammua' kumua Puang Allata'alla mangka umpatuo sule Puang Yesus dio mai alla'na to mate, manassa anna la ullambi'koa' kasalamasan. 10 Annu kapangngoreanan lako Puang Yesus illalan penawa napolalan naangga' malolo Puang Allata'alla, anna pangngakuanna tau lemba' dio pudukna napolalan ullolongan kasalamasan. 11 Annu dengan tiuki' illalan Buku Masero nakua: “Benna-benna mangngorean lako kalena tae' la napasalanduanan.”§Yes. 28:16.12 Inde battakadae umpatu asan tau annu ta'mo diissan dise'la, susi to Yahudi, tenni tau senga' salianna to Yahudi. Annu angga mesa Dewata umpuangngi angganna ma'rupa tau, anna untamba' to melau lako kalena. 13 Annu dengan tiuki' illalan Buku Masero nakua: “Benna-benna mengkamala' langngan Dewata, la salama'.”*Yl. 2:32.
14 Sapo umbamo la nakua mengkamala' langngan Dewata ke tae' mangngorean? Umbamo la nakua ummorean Dewata ke tae' dengan narangngi ditula'? Anna umbamo la nakua urrangngii ke tae' dengan umpalandasanni? 15 Anna umbamo la nakua tau umpalanda'i ke tae' disua? Susi tiuki' illalan Buku Masero nakua: “Tae' dengan pada maleke kasaeanna to umpalanda' Kareba Kadoresan.”†Yes. 52:7.16 Sapo Kareba Kadoresan iatoo tae' natarima asan to Israel, susi mangka nauki' nabi Yesaya nakua: “O Dewata, bennamo la ummorean inde tula' kipalanda'e?”‡Yes. 53:1.17 Dadi, kapangngoreanan lako Kristus mala kendek ke denganni dirangngi, anna iapi anna mane dirangngi ke denganni tau untetteran Kristus.
18 Sapo dengan pekutanangku: Tae' tongampaka dengan narangngi to Israel? Innang mangkamia narangngi. Annu dengan tiuki' illalan Buku Masero nakua:
“Narangngi asammi tau illalan lino oninna to umpalanda' inde karebae,
anna angganna tula'na saemi lako lili'na lino.ӤMzm. 19:5.
19 Dengan polepi pekutanangku: Napekalembasarrika to Israel? Manassa anna napekalembasan. Annu bunga'na natimang napokada Musa nakua: “Susi inde kadanna Puang Allata'alla lako to Israel-e:
‘La melolona' umpakendek kamangungngusan illalan penawammua' lako to tangngia petauangku,
anna la kupakendek ara'mua' lako to musangaia' to maro.’ ”*Ul. 32:21.
20 Anna makarra' pole ia kadanna Puang Allata'alla lako to Israel napalanda' nabi Yesaya nakua:
“Nalambi'mo' to tangngumpeangna',
anna umpa'paitaammo' kaleku lako to tae' umpengngissanannina'.ӠYes. 65:1.
21 Sapo nakua kadanna Puang Allata'alla untula' to Israel napalanda' nabi Yesaya:
