Sauga nau Esila iyoho ya awaawanun ge gegi ya lolopapit, inoke boda bwabwatana hi nogogo ge heliya al hi kahin nabinabi. Yaka abwe Yehiyel natuna Sekanaiya i baem elau i ba, “Wama bateli Yabowaine elana ha leke, kaiwena boda getogal yowauiliyau ha alolonagil. He binimala bateli etega naha ginol te lagomeyau o avaliyau ge natuliyau naha patuna owaowa-agil. Inoke nu lut. Ama aloma owa, inoke atem ni matuwa ge nu ginol.” (puna 1-4)

Yaka ya lut ge ya ba topowon wali tohouwa ge un Libai, avaliyau ge gamagalau gegewel, hi papasila te nihi ginol ni ola Sekanaiya wana baaba. He bulin o nige bugul etega ya aan o ebo ya iim, kaiwena no nuwanak iyoho ya Isileli wali gegi kaiwena. (puna 5-6)

Yaka baaba hi patuna gamagalau gegewel bolo hi minaa Yuda ge Yelusalema nihi migogowa Yelusalema lan eton gamwanaa. (puna 7-8)

Lan eton o gamwaliyaa gamagalau gegewel hi nowanim Yelusalema, inoke hi migogo ge hi misiyowa Yabowaine wana Limi awonaa. Inoke ya baek elal ya ba, “Wami bateli Yabowaine elana iyaka ku leke, kaiwena boda getogal yowauiliyau ku alolonagil. Wami gegi nuku lopapit Yehoba elana ge yowau bolo o nuku patuna owaowa-agil.” (puna 9-11)

Yaka gegewel anau hi lahe hi ba, “Wam baaba i tunahot! Naha ginol ni ola to. Yaa nige bosowaina etimwawa bugul ya naha ginol, kaiwena ha gewi. Binimala wama tohouwa nihi tuwalali kaiwema. Inoke bolo boda getogal yowauiliyau hi alolonagil nihi nem tohouwa wali yoga ana sauga elana.” Gegewel hi talam, yaa bolau esopali nuwatu ya hi awa nanakan. (puna 12-15)

Yaka tini ona wali tohouwa ya hilel, inoke hi telipuna pulowan nihi abubun ge sapu nihi loyaan. Inoke waikena eton gamwanaa hi tuwalali, yaka abwe bolau bolo boda getogal yowauiliyau hi alolonagil, gegewel ali logugui hi pasapu. (puna 16-17)

Bolo boda getogal yowauiliyau hi alolonagil, heliya hi noem tini tomaha ona elal. Topowon, un Libai, towonawona maisena, nog ana tomatahikan ge Isileli enuna al, he lagoliyau avaliyau ge natuliyau hi patuna owaowa-agil. (puna 18-44)

<- ESILA 9