Inoke Deibid ge wana boda hi gagasisi nawa. (puna 1)

Hebiloni elana Deibid natunau bolau hi abil alaliya Amnon, Kiliyab, Absalom, Adonaiya, Sepataiya ge Itlim. He tomaha hinaliyau. (puna 2-5)

Isboset Abna i wole i ba, “Hauna kaiwena alom ge nam lagona al etega ku kenu toyawa?” Yaka Abna i huga nabi ge i baek Isboset elana i ba, “Nasi Deibid na labe, inoke iya wam abalogugui ni ahe ni tologugui Isileli ge Yuda gegewel elal.” (puna 6-11)

Yaka elopapatuna i patunal Deibid elana ge hi ba, “Alou owa ta pebabateli-agila, inoke na labewa Isileli gegewel nu ahel nihi olawa elam.” Yaka Deibid i ba, “I waisi, yaa nuwau lagou Mikal nu pasikal elau.” Inoke Abna i ginol ola Deibid wana baaba ge abwe i liwaliwan Isileli wali tonowakau elal binimala Deibid te nihi ahe wali kin. (puna 12-18)

Yaka Abna i na Hebiloni Deibid elana Isileli wali yaliyaya i wasaan. Ge i ba, “Na na ga Isileli gegewel na pamigogo-agil yaka alomwau nuku pebabateli-agimiu.” Inoke nuwa laumwal eliyana Deibid Abna i patuna i egon. (puna 19-21)

Abna i egon ga, abwe Yowab i vin Hebiloni, i neem haveyan etega elana. Inoke elopapatuna enuna i patunal Abna enaa ge hi ba ni sikal ni na Hebiloni. Yaka panuwa ana abatuktuk bebenaa Yowab Abna i en ge hi mimwaumwau, yaka i howaa tinenaa ge i aliga. He i ginol ola o, kaiwena nuwana ni tagalahi talina Asahel wana yaomal kaiwena. (puna 22-27)

Deibid i ba Yowab alonau wana tolohaveyan gegewel kaliko toto bwasumu pupunona elana hi ginoliya hi galoi ge hi lonuwanak, yaka hi nawaa bolo Abna tuwana hi kalivai awoliyaa. Ge Deibid i nawaa tuwan enaa, yaka hi na hi teli salaiya Hebiloni elana. Yaka Deibid ge alonau hi kahin nabi Abna kaiwena. I ola al Deibid nige aanan etega i an ana siga sabwelu i lobek. Inoke Yuda ge Isileli gegewel hi atena te nige iya wana nuwatu kaiwena i oola ge Abna hi lolol. (puna 28-39)

<- 2 SAMUWELA 22 SAMUWELA 4 ->