2 SAMUWELA 14

1 Seluwaiya natuna Yowab i atena te kin Deibid nuwana hot Absalom ni kite.

Inoke Yowab gamagalau enuna i patunal hi na panuwa Tekowa, yaka evenak tonuwa sapu etega hi en pwatanik elana. Yaka Yowab i baek elana ni kakawi tage iyoho i lolonuwanak yaomal etega kaiwena, yaka ni nok Deibid elana ge liwan etega ni liwanan. Inoke i na Deibid elana i ba, “Nu labeyau! Nau abuabul, natuwau bolau labui. He ali toto labui hi lohaveyan yaka etega alona i lol ge i aliga. Inoke tutunau nuwaliya nihi lopaaliga talina wana yaomal lahena. Ebo nihi ginol ola, inoke nasi ni ola no emwatugal iyaka hi pabolu ge nige no waisi puna al i gagan.” (puna 2-7)

Yaka Deibid i ba, “Nu sikal wam limiya. Nau logugui na ginol bahi gamagal etega ni lalahe ge nak etega ni giginol eliyana.” (puna 8-11)

Anana evenak i lahe i ba, “He u ba ola o, yaka totom wam gegi u pamasal, kaiwena natum ana bwaga i yapu nige bosowaina ni nem, yaa nige u aahe pasikal.” (puna 12-17)

Yaka Deibid i nel elana i ba, “Yowab wana nuwatu eliyana te u ginol i ola e, age?” Yaka evenak i talam. (puna 18-20)

21 Inoke abwe kin i baek Yowab elana i ba, “I waisi, na ginol ni ola wam nuwatu. He nu nok nu na heval Absalom nu en pasikalim.”

22 Yaka kin ana awatauwan kaiwena Yowab i kululu maninina i pahanalowanek bilibiliya. Inoke i ba, “No babala ge no kin, Yehoba ni mulolu-agiwa! Lan ebe nau wam totuwalali ya atena u yaliyaya-agau bubun, kaiwena no awanun eliyam iyaka u paolaolaek.”

23 Inoke Yowab i na panuwa Gesul Absalom i en pasikalim Yelusalema. 24 Yaa kin i ba, “Ni noek ya wana limiya ge ni miminaa to, bahi ni nenem ni kikiteyau.” Inoke i na wana limiya ge nige i nana kin i kikite.

Deibid abwe Absalom I Yaliyaya-an

25 Isileli gegewel gamwaliyaa, Absalom ana tobal i bwata te iya ana awa i waisi hot. He nige potpot etega i gagan tuwanaa, i telipunaa kokowanaa i lau i na aenaa. 26 Baliman maisena ge maisena pamaisena kokowana ni tomwa yoho, kaiwena i balu ge i pupulowan. Yaka ana pulowan ni luvi ni ola tu kiloglem (2 kg) ge pwatanaa al. He ana pulowan i sikeli eluviluvi toto kin i ba gamagalau nihi patuwalali elana.

27 Absalom natunau bolau ali gewi eton ge yovana maisena, lagona i abil. Toto yovana alana Tama, ge sauga i bwata ana awa i waisi hot.

28 Baliman labui Absalom i miminaa Yelusalema, yaa nige i nana kin i kikite. 29 Inoke baaba i patuna Yowab elana tage ni na eliyana yaka ni patuna kin elana, yaa Yowab i towa nige i nonok. He palabuina al baaba i patuna, yaa i towa nige i nonok. 30 Yaka Absalom i baek wana totuwalali elal i ba, “Ku atena te Yowab wana bali ana eyowa i minaa no eyowa bebenaa. He ku na ku ton.” Yaka hi ginol ola wana baaba.

31 Inoke Yowab i na Absalom wana limiya ge i neli i ba, “Hauna kaiwena wam totuwalali no bali ana eyowa hi ton?”

32 Yaka Absalom i baek elana i ba, “Am baaba ya patuna nu nem eliyau, yaa nige u nenem. Tage na patunawa nu na kin nu neli hauna kaiwena Gesul ya eguluwai ge ya nem e. Binimala na minek to. He sauga ya nuwau na na kin na kite. Ebo bugul etega kaiwena ni pwawaagau ya gegi, he ya talam ni tagapaaligau.”

33 Inoke Yowab i na kin wana wasa i pek Absalom ga i ba ola. Yaka kin Absalom i yogaan ni na eliyana. Sauga i vin, inoke i kululu maninina i pahanalowanek bilibiliya kin awonaa. Yaka abwe kin Absalom i nalo ge i yaliyaya-an.

<- 2 SAMUWELA 13 2 SAMUWELA 15 ->