1 Te dwai po ola mabo bage augwali te tiwai bidibo dao. Tiali goli nage, nago te Godigo wiegi yai po wali pabo we bidigo yabo kolesaga ola mabo po nago bugagia ola mao. 2 Tama tiyu, nago augwalibolo e tobo wao: monu dabe yai bidi augwaligo te bomai ąį hauwa tulamuo, augwaligo augwa tigigo ebo kolesaga bugagia tonaluao. Augwaligo doloba pai homu kolesaga naga koneyu, tama augwa homu kolesaga bugagia tonaluao, te po wao. Tama te God dali konealubo pode augwaligo te po page kuna koneyu bidao. Tama tiyu, augwaligo God dali, gasa we bidi dali dwagi yai homu ebo kolesaga eyu, tama tigidali sęgę yai sę asobadi bomo elama dolalubo kolesaga selama bidao, te po te monu dabebolo ola mao. 3 Te mosi dabe yai we augwalibolo me te po wao, augwaligo te dwai sę isiąbo wego ebo kolesaga dolo wali pao. Tama tiyu augwaligo te we bidi nogi posobo po wagio, augwali bomai ąį tubo sę te dologode bidigio, te po wao. Tama augwaligo te gesi we dabe sibibolo dwagi yai kolesaga ola mao. 4 Tama tiyu augwaligo te gesi we dabebolo te po wao, “Dagego duga bidi dali, wai dabe dali dwagi yai homu eyu godolo yao.” 5 Gasa we bidi augwaligo te gesi we dabego ebo kolesaga sulama, tama augwaligo Godigo po dali dwai posobo po waidali weyu, tama te mosi dabe yai we augwaligo te gesi we dabebolo e po me ola mao: “Dagego duga digi bidibo homu kolesaga bugagia tonaluao, tama dwai penane sę ebo homu egimio, tama dagego bidibo be tonalubo sę bugagia yao, tama dagego duga bidi dali wai dabe dali dwagi yai sę eyu bidao. Dage duga bidi dologode bidao,” te tobage po te augwaligo te gesi we dabebolo ola mao wao.

6 Te gesi bidi dabe augwalibolo me ola mayu, tama augwalibolo wao, “Dagego duga tigigo ebo kolesaga bugagia tonaluao,” te po wao. 7 Tama naga digi nago ebo kolesaga tigidali ebogo te nago te gesi bidi dabebolo dwagi yai kolesaga naga tama ola mao. Tama tiyu, nago homu mu eyu, tama ‘E po sęgę yai po dao,’ te homu eyu elama, tama Godigo po ola mao. 8 Tama nago agai po ola mabo si te dolo po naga augwali dali wao. Tama tiyu da, teda nage dali boi bidi homu ebo bage augwaligo da dali, te nago ola mabo po dali, tede augwaligo dwai po me wabo usu sąbaso, tama augwali hale yaibao.

9 Nago te masigi sisąwai olo sę bidi augwalibolo te po wao: augwaligo tigidali sę ebode te augwa tonalubo bidigo augwali dali dwagi yai homu emainogo tama augwaligo augwa tonalubo bidigo po odolama, tama augwali dologode naga bidao. Tama augwaligo augwa tonalubo bidi dabebolo po wei ponoyu te dwai po me olamuo. 10 Te tonalubo bidigo nai dabe me wi selamuo. Te menio. Te doloba pai kolesaga naga eyu, tama augwa tonalubo bidi dabe dali homu kęą pai bidigo ebo kolesaga te tonalubo bagebolo augwaligo tama yao ola mao. Te sę ebo bidi dabebolo te po wao. Tama tiyu da, teda augwaligo tigidali sę ebogo te da ma dobola sabo bidi God agade ola mabo po augwaligo te gasa bidigo gedude ugwaba siyu au eyu yaibao.

11 Magi baso meni. Tigidali we bidi agai ma dobola somainogo eyu, tama Godigo agai da olo tau sabo wiegi yai kolesaga hania waselai dao. 12 Tama da tǫde we bidi dago Godigo bomai po tudiba muyu, tama te dwai dwai kolesaga eyu bidai dao. Tiali goli agai olo tau sabo wiegi yai kolesaga tego da e tiwai ola mabo dao: “Dagego te dwai sę tudiba muao, te doloba pai kolesaga naga yao, tama dage e tǫde bidibadi te Godigo gedude dwagi yai we bidi bidao.” 13 Tama dago te ola mani po odolama, tama te tiwai kolesaga eyu bidibadi, tama dwagi yai homu eyu, te wiegi yai sogo asobo dago tonalubo dao. Tama te sogo asobo si, teda dago genuai God te da ma dobola sali bidi Jisas Krais agai bomo yai ula dali, genuai nogi dali, te hania ulaba pedalaibao. 14 Aga digi aga bidibo ula tagalai dao, tama agai te bidibo ulago da ma abelama, tama dago te tigidali bomo yai po sela sąbo te kolesaga agai sela sąwainogo tama yai dao. Agai da penama, tama da we bidi aga hani mu pedalainogo te sę yai, tama dago tigidali dwagi yai kolesaga bomo elama te sę naga emainogo agai aga bidibo ula tagalai dao. [a]

15 Nago eno megi wali ola mabo po te po te we bidi dabe dali nago te po ola mao. Nago augwali te pogo hodolama, tama augwaligo te po wali pomainao. Tama nago te po sela sąnama wali pisąbo bidi augwaligo homu begelemainu nago augwali dali po bomo elama wao. Te bidi dabe augwaligo nage olo bidi yaliwe te homu idali weyu tama nago te ola mabo po bugagia bomonama augwalibolo ola mao.

<- Polgo Pas Taitusbolo Asęani 1Polgo Pas Taitusbolo Asęani 3 ->