8
1 Te eno idago nage ame neyu,
te nage ame manigi sogo da, te wiegi yai igi da.
Te tiwai ebaso da, teda eno nage te genuai sunumide
deliba gesabidi unulubo sogo,
eno nage dali nono nobaso,
te niwai bidi me deligo
tede dwai homu me ebo usugobeo.
2 Te eno nage selama,
te dena si idago beba pobaso usu da,
tama nago ena bugagia ola magameo.
Te eno wain selama, eno te wiegi yai wain nedu dugo
te gasa pusu yai pauda dali taluama,
nage mawaibao.
3 Nago pobase nogo eno tobolu dologo badu muao.
Tama nago dolo nogogo, te nago eno tigi tola sao.
4 Te Jerusalem we dabe, dagego bomai po ena dali
dąų walobaso da,
te dagego da sigo haliga hodolobo po me olamuo.
Te sę dena side digi elalubao.
Te nogo kibisa deli wabo balia po
Te we dabego balia po te tiwai wali
5 Te wa pai bulude bidali tagalama
asali, te mena we dawe?
Agai aga abagi wali bidi nogo tolasa, augwa si asobao.
Gesi bidigo balia po te tiwai wali
Da te ni laulau tįwai madi dologode bidalu,
tama eno nage hodolali.
Naga idago nage te ni dologode ame nai dao.
Gesi wegigo balia po te tiwai wali
6 Nago ena deli naga godolo homu yao,
te nago gasa we godolo homu me elamuo.
Nago nogogo te gasa we nogo me me diągio.
Nago ena naga nogo diąyąo.
Magi baso meni.
Eno godolo homu ebo nagede bomo mu eyu,
tama eno haliga nagede bomonama hogodu,
te isibogo bomogo bidi aiyaba elalubo tiwai ebao.
Eno godolo homu ebo, te umabo digi mu yali,
te isi bogoli dabo genuai mu ebo tiwai ebao.
7 Aįgo te tobage isi sula sawainu ebaso, usu me egobeo.
Te bidi me deligo aga mone tigidali te
wego aga godolo emaina homu elama mobaso da,
te aga nai mu meniama,
tama te wego aga dwai mu bidabo sę ilaibao.
Te gesi wegi aga ama dabego balia po te tiwai walio
8 Dago ama dwasianu weginu bidibaso,
te aga ame pedalubeo.
Te aga genuai ebo si da, te dago mena sę agade egowe,
te gesi ogwa bidi me deligo aga saiba homu ebawe?
9 Te ama bugagia bidu, te taun bagulali obo tiwai
elalubaso da,
teda dago te taua silva te bagulali obode nigaibao.
Tialima, aga te taun sunumi tiwai elalubaso da,
teda dago aga te dila pai
ni sida ni namego paliaibao.
Gesi wegigo balia po te tiwai wali
10 Ena te obo me deli tiwai da,
tama eno ame te taua si tiwai da.
Eno abagi wali bidigo
te tiwai tama koneani,
te ena aga dali bidali sogo
ena bugagia mu bidu,
te eno haliga dua tegaluama bidalio.
Gesi bidigo balia po te tiwai wali
11 King Solomongo wain gi
te bulu Balhamonde elaluali.
Te bidi dabe augwaligo te gi sę yabo homu ebaso da,
te mone hauwa tausen te umabo 1,000 kina silva
te kingbolo mobaso usu dao.
12 Solomongo aga te mone 1,000 kina somainao.
Tama te gi sę ebo bidi dabego
te mone bidi sese nogo si 200 kina somainao.
Tialima, eno augwalide moni homu hauwa me ebeo.
Ena da, te ena wain gi elalubao.
13 Eno abagi, nage gide bidibaso,
eno homugo nago po omainu homu ebao,
tama eno hai namu dabego te nago dogonigo po
wabo odomainao wali.
Gesi wegigo balia po te tiwai wali
14 Eno wiegi yai abagi da,
eno homugo nage polo ma asomainu homu yali,
te wiegi yai bulu uni hasa me deli tiwai
te bulu du dabeba eda udada holu,
te wiegi yai nai dabe denami pągąną