1 Ogwao, te gasa bidigo me negeli sai madi, tama nago te negeli elalubo te wei ponaiba po dąų walama, te aga digi te wei ponabo usu isąbaso teyu da, teda nago te kolesaga te wiegi yai me ebeo. 2 Nago te dąų walali pogo te naga digi kalabus ilibao, te naga digi kekelama, te muani wago te naga ma tola sabo tiwai gilama ebao. 3 Ogwao, nage te kalabus elalubo polo tama tagalao. Tiyu, nage te bidi dologode bidabuo. Nago te dąų walali po sela sąwainu te agaba hanalugi pao. Te kolesagago nage nogi elaluama, te nage hale elalubo te tagalao, nage peyu naga yao. 4 Nage me pila mudigio, nage asesa elama pao. 5 Nage te kalabus elalubo tagalao, te uni hasago ma te bago te wa tagalama, wi pabo tiwai yao.

6 Dage hagela bidi dabe, eno te tama po dagede elalubao. Dage pelama, te sagado dabego kolesaga bugagia sugi pobaso da, tama teda dage te kolesaga konea pai bidi pedelaibao. 7 Te sagado dabe da, te augwa tonalubo polalubo tobolu bidi, ma genuai bidi, ma te ofisa, te me elalubeo. 8 Te nai hauwa elalubo sogo, te sagado dabego te nai sǫą pabo sogo tuabo nai sisinama, te sabobo dao. 9 Tiali goli, dage hagela bidi dabe, te dage sesabi gana elama, pila mudabo homu eba, agawe? Mena sogo te dage duga betde pila muani te hogodaluaibawe? 10 Dagego te tama po wai, “Tagalao, da dwasianu gana godege manu piaibao,” wai. “Da te dwasianu sogo naga tama te toma tulama, tama te da hogodaluaibao,” wali. 11 Dagego te tiwai ebaso da, teda polo tama te dagego doado bage tigidali silama, tama dage te magi nai doado bage meni yai bidi tiwai pedelaibao, te nai wi sabo bidigo te dagego doado bage tigidali wi sela pabo tiwai yaibao. [a]

12 Te dwai bidi mu dabego te tibo po wabo dao. 13 Augwaligo te tama po geme dualama wali. Augwaligo te gedu aluama, tama te nogogo po miyu, tama sągągo te usu sabo sę ebo dao. 14 Sesemane sogo augwaligo te dwai sę yabo homu kolesaga kone paludu, tama augwaligo te bidi dabego te gasa bidi dabeba dwai haliga yabo sę eyu ebo dao. 15 Tiali digi, polo mu tama te dolobo genuai sęgęgo te augwaliba pedalubaso da, teda augwali te usu ma ilabo sunumi me elalugobeo.

16 Genuai Bidigo te bidi dabego te e 7 kolesaga dabe ebo da te godolo homu mu meni isąwanio, agai tede sębę ebo dao. Augwali e dao. 17 Te hagoma ebo kolesagago te gasa bidi dabe tonobo te olo bage tiwai ebo kolesaga. Me te tibo po wabo kolesaga. Me te gasa bidi dabe olo dali ela mubo kolesaga ebo. 18 Te dwai sę yabo homu ebo kolesaga. Tama me te dwai sę asesa polo ebo kolesaga. 19 Te tibo po tų yainu ebo kolesaga. Me, te bidi dabego te augwa ama hasi te dwai haliga ilibo kolesaga ebo dao.

20 Ogwao, nago te naga ayago po wali pao, tama nago idago po me sela sągio. 21 Nago te augwaligo po te naga homude munama, tama sesemane bugagia wali pobaso da, tama teda te nago tobolude me magede te wiegi yai au tiwai te pedelabo dao. 22 Te nage bilibo sogo, te pogo te nageba sunumi ola mawaibao. Tama nage te pibo sogo, teda te pogo te nage tonaluaibao. Tama nage hodalubo sogo da, teda te pogo te nageba wiegi yai homu kolesaga mawaibao.

23 Magi baso meni. Te aya idago po te lam ula me deli te wiegi yai eyu, te nageba sunumi ola mabo tiwai ebao. Tama augwaligo te nage dodolobo sogo, te nage bidibo ula elalubo tau sabo wiegi yai kolesaga wali pomainu yaibao. 24 Te augwaligo te pogo nage tau siyu, tama te dwai sę ebo we dabego te nage tibo po me ola masiąbo po me wasiąyu, tama nago te gasa bidigo wego pusai po wabo me odogobeo. 25 Nago te wego te sawi yai tigi subaso, te nago pesą ebo homu me igio. Tama agai te nage kekainu te nageba tonono ebaso da, teda nage te agaba me pigio. 26 Te bidi te penani we dali bidibaso da, te dwasianu monego naga abelebo dao. Tiali goli, bidigo te gasa bidigo we dali pagela pibaso da, te genuai sęgę mu ebao. Te aga bidabo ula tede tagalainu te ebao.

27 Te nago te sia dage te hobolu badu pąde tolalubaso da, teda te naga holobo ugwa te siago dogobe da, agawe? 28 Ma, nage te sia dobadi te daidu bilali da, te siago nago sągą dogobe da, agawe? 29 Te tama tiwai gilama naga, te nage gasa bidigo we dali pigi pali da, te augwaligo nageba te genuai dene me sęgę mabo te nago me geda mugobeo.

30 Te bidi me deli aga nasi ebaso, te nai meba wi sali da, teda te bidi dabego te agaba dwai po me wagobeo. 31 Tiali digi, augwaligo agai te yali sę augwaligo te pepeli deliba hanilani da, teda augwaligo aga te po tų ilama, tama agai te nai hauwa mu wei ponomainu yaibao, te aga bede elaluali doado bage te tigidali te mu siliboba usu naibao. 32 Tiali goli, te bidigo gasa bidigo we dali pibaso da, te mu geda munama, tama te esela peyu, te mu umuna pabo bidi tiwai ebao. Te kolesaga ebo bidi aga digi aga dolobo dao. 33 Te bidi dabego aga eliyu, te agaba po dwai weyu ebaso, te aga sesemane sogo hale dwai mu yaibao. 34 Te haliga sębę dwai mu ebo bidi dabe, te augwaligo we dali te gasa bidigo me pagela piali. Te tama tiwai naga te wego bidigo haliga te dwai sębę mu elama, tama te bidigo yali te dwai sę wei ponoyu, tama agaba te dwai dene mu mawaibao. Te wego bidigo sębę te dęą sogobeo. Agai te agaba wiegi yai homu eyu, te sabo homu ebo kolesaga yabo homu me egobeo. Mu menio. 35 Tama agai te haliga sębę ebo sia somainu te genuai mone menama, te sia somainu ebaso, te usu me egobeo. Te sębę me elalubo dao.

<- Bugagia Bidibo Kolesagade Po Asęai Buku 5Bugagia Bidibo Kolesagade Po Asęai Buku 7 ->