1 Te Mosesgo Godigo name ugwa lotu be dodoloyu sę yani, tama agai te sę silali sogode agai Godigo doado bage dabe sa muainogo wel selama, tama agai te name be wel meba muyu, me alta, me aga tigidali nai dabe wel muna muna peyu silali. Tama agai te doado bage dabe te Godigo doado bage magi ilali. 2 Tama te Israel dabego deli deli tobolu bidi dabego doado bage dabe seselama, Godibolo magasali, te Israel wąį hanigo tobolu bidi dabe. Te bidi dabe augwaligo naga tama te bidi dabe nogi asęyu nediyu ebo sę polobadu tonaluai dao. 3 Augwaligo te a naga olama me badu nogo deli karis, me nogo si olama, me badu sągą si kau kibu sela aselama, Genuai Bidigo name ugwa beba sela aselama, magasali. Te deli deli tobolu bidi dabego te karis te deli te bidi sigo sigo ela pelama, te deli deli tobolu bidigo te karis kegabo kau kibu deli deli sesali.

4 Augwaligo seselama silibo si, tama Genuai Bidigo Mosesbolo e tama po wali, 5 “Nago augwaligo te mani nai dabe sela, tama te Livai dabebolo mao. Tama te deli deligo te name ugwa bede doado bage tolasa bilibo sę emainu eyu, tama mao,” wali.

6 Tama te Mosesgo te karis me kau kibu selama, te Livai dabebolo mani. 7 Te karis si, me kau kibu me si me si selama, Gerson dabebolo mani, te augwaligo augwa sę emainogo. 8 Tama me agai te karis me si me si, me te kau kibu a naga olama, sela, te Merari dabebolo mani, te augwaligo augwa sę emainogo yai. Tama te Arongo ogwa Itamargo te Gerson hani dabe dali te Merari hani dabego sę dabe tonaluali. 9 Tiali goli, Mosesgo te karis me kau kibu dabe te Kohat dabebolo me mabeo. Magi baso meni, te Godigo nai dabe augwaligo tonalubo nai dabe te augwaligo olo nagede tolabo nai dabe naga dao.

10 Tama te alta sa mubo sogo te Godigo bubuga mu dao. Te tobolu bidi dabego te ofa yabo nai dabe sesali. Augwaligo te nai dabe seselama, altaba sabolama, tama augwaligo Godibolo mawainogo yali. 11 Magi baso meni, Genuai Bidigo Mosesbolo e tama po walali, “Te deli deli bidigo te ofa ebo te alta eno dao olama sa muao. Te deli bubugade te deli bidigo ofa eyu, tama nosali bubugade gasa bidi me deligo ofa eyu tama yao, tama te tiwai augwali tigidaligo te ofa tigidali siligi pao,” wali.

12-83 Tama te deli deli tobolu bidi dabego te augwa sa muani deli deli bubugade te ofa nai sesiyu yali. Te dei namba wande, te Juda dabego tobolu bidi Aminadapgo ogwa Nasongo ofa sesali. Te dei namba tu, tede te Isakar hanigo tobolu bidi Suargo ogwa Netanelgo ofa sesali. Te namba 3 deide, te Sebulun hanigo tobolu bidi Helongo ogwa Eliapgo ofa sesali. Te namba 4 deide, te Ruben hanigo tobolu bidi Sedeurgo ogwa Elisurgo ofa sesali. Te namba 5 deide, te Simeon hanigo tobolu bidi Surisadaigo ogwa Selumiel agai ofa sesali. Te namba 6 deide, te Gat hanigo tobolu bidi Duelgo ogwa Eliasapgo ofa sesali. Te namba 7 deide, te Efraim hanigo tobolu bidi Amihutgo ogwa Elisamago ofa sesali.

Te dei namba 8, tede te Manasę hanigo tobolu bidi Pedasurgo ogwa Gamalielgo ofa sesali. Te dei namba 9, tede te Benjamin hanigo tobolu bidi Gideongo ogwa Abidango ofa sesali. Te dei namba 10, tede te Dan hanigo tobolu bidi Amisadaigo ogwa Ahiesergo ofa sesali. Te dei namba 11, tede te Aser hanigo tobolu bidi Okrango ogwa Pagielgo ofa sesali. Te dei namba 12, te sogo te Naptali hanigo tobolu bidi Enango ogwa Ahirago ofa sesali.

Te tigidali tobolu bidi dabego te deli tigi poai ofa tiwai naga sesali, te silva pou te 1 kilogram elama hap deli sesiyu, me silva plet te sęgę 800 gram yai deli sesiyu yali. Augwali deli deligo te dis pou me plet te wiegi yai plaua te augwaligo te oliv wel dali begelai plaua pągąnama sesali, te witgo ofa yali. Tama te deli deli tobolu bidi dabego te gol plet te 110 gram tama sęgę yai nai sesali. Tama te plet dabede te wiegi yai denami pągąna pai paudago te plet pągąna pali. Tama te deli deli tobolu bidi dabego te deli deli omai kau kibu ogwa bidi siyu, me deli deli sipsip kibu omai, me sipsip kibu omai kibu be deli yai, tama yali, te iside sese ula silabo ofa nai dabe. Me augwaligo sęgę sela sąbo ofa yabo meme kibu omai me sesali. Me kau kibu si omai, me a naga sipsip kibu omai, me a naga meme kibu omai, me a naga sipsip kibu omai te kibu be deli yai me sesiyu yali, te God dali deli homu ilabo ofa sesali.

84-85 Tama te bage augwaligo te 12 tobolu bidi dabego seselama te Godigo alta sai mu sa muani, te nai dabe nedali. Tama te nai dabe namba te e tama dao. Augwaligo 12 silva dis pou sesiyu, me 12 silva plet sesiyu tama yali. Te pou dali plet sigo sęgę te 28 kilogram tama yali. 86 Augwaligo te gol plet 12 tama sesali. Augwa sęgę te 1,320 gram tama elaluali. Augwaligo te plet dabe te wiegi yai denami hano holobo paudago pągąnama sesali. 87 Tama me augwaligo te kau kibu omai te 12 sesiyu, me sipsip kibu 12 omai kibu sesiyu, me te kibu be deli polo yai omai sipsip kibu 12 kibu sesiyu tama yali, te iside sese dela silabo ofa yainogo. Tama augwaligo wit ulubo ofa te ofa dali deliba taluama ulali. Tama me augwaligo sęgę sela sąyabo ofa yainogo te 12 meme kibu omai me sesali. 88 Tama te tiwai eyu, augwaligo te 24 kibu kau omai sesiyu, me 60 omai sipsip kibu sesiyu, me 60 te meme kibu omai sesiyu, me te kibu be deli yai sipsip kibu omai gǫų te 60 sesiyu, tama yali. Te wiegi yai homu deli yabo ofa nai tama sesali. Augwaligo te alta te Godigo mu dolo sa muani, te hasia augwaligo tama bolo tiali. Tama nosali augwaligo te ofa dabe Godibolo mani.

89 Tama te Moses te Godigo ugwa beba te Genuai Bidi dali po miainogo tula pabo si da, teda agai te Genuai Bidigo penanedu po wabo agai te sęgę sela sąbo be tomode po wabo odali, te kontrak halobage ugwadu daide te ensel bidi piksa noma si tomode.

<- Israel Hanigo Namba 6Israel Hanigo Namba 8 ->