1 Genuai Bidigo Moses de Aron sibolo te po wai, 2 “Te Livai genuai bidi hani bugulama, tama te Kohat hani bidi dabego nogi sao. 3 Dagego te e tobage Kohat hani bidi dabego nogi sao, te augwaligo kibu be te 30 dąį gagalasa, tama te kibu be 50 te dąįba usu nagasobo bage, te augwaligo nogi sao. Te gesi ogwa bidi dali, te monu dabe dali si, te tagalao. Te nogi sali bidi augwali te eno name ugwa bede sę yabo usu yai bidi dabe dao. 4 Augwaligo sę te Tedali Gasagi Yai Mu Be Habu tomode elalubo doado bage dabe tonalubo sę ebo dao,” wali. 5 Tama Genuai Bidigo te po Mosesbolo mani. Agai te po wali, “Te Israel dabego te bidibo pesage taga peyu, gasaba painogo da, teda Aron aga ogwa dabe dali augwali eno ugwa be tomoba tula pelama, tama augwaligo te eno Dąų Wali Bomai Po kontrak elalubo halobage pąde walobo moni ugwa name selama, tama te halobage halumainao. 6 Tama me augwaligo te wiegi yai tamu węde bidibo sikau sabeago belama, tama me augwaligo wiegi yai sisi name ugwa belama, te halobage haluao. Te tigidali tama mesegeliyu, tama te ni dage si te gol ring dedage si elalubo tedu palama, tolabo nigilao.”

7 “Tama augwaligo enabolo mani bret mubo tebol sai te sisi dagalu yai name ugwago halumainao, te ena Genuai Bidibolo mani nai. Tama augwaligo te pou me, plet me, te wiegi yai denami holobo hano nai dabe augwaligo somainao, me te gasa ofa ebo nai me, tama te nai dabe sese te sisi name ugwa daide muao. Tama tigidali sogo bret name te name ugwade munalumainao. 8 Tama augwaligo te nai dabe sese te bedeba name ugwa me deligo belemainao. Tama tamu węde sikau sabea wiegi yaigo te bedeba ugwa name belemainao, tama te tebol tolabo ni dage si te ring tomoba mumainao.”

9 “Tama augwaligo te lam dabe tolalubo nai me, te lam dabe me, te lam wik me, te sisi dulu bulubo dwasianu plet me, te oliv wel bubo botol, te sisi dagalu yai name ugwago belao. 10 Tama augwaligo te tamu węde bidibo sikau sabea wiegi yai me selama, tego tomagelama, tama tolabo naiba me muao.”

11 “Nosali augwaligo gol alta sisi dagalu yai name ugwago tomagelao, tama te ugwa te tamu węde sikau sabea wiegi yaigo tomagelao, tama te alta tolabo te ring dedagede te ni dage muao, te alta tolabo.”

12 “Tama augwaligo te dis pou dabe te pris bidi dabe te Tedali Gasagi Yai Be Habu badu elalubo te pou doado bage dabe selama, tama sisi dagalu yai ugwago belama, tama tamu węde sikau sabea wiegi yaigo belama, tama tolabo nai tomoba muao.”

13 “Tama augwaligo te brasgo nigai alta saide munalubo te sisi dulu dabe sela sąnama, tama te alta te bedeba name ugwa belao. 14 Tama augwaligo te pris bidi dabego te alta saide sę eyu sabilibo nai dabe sese sao. Te e tama nai dabe, te pou dabe te isi mubo dabe me, te mi enebo yaga dabe me, dwasianu savol dabe me, te dwasianu ofa ebo nai kaneme sabo dwasianu plet dabe sao. Tama augwaligo te nai dabe te tamu węde bidibo sikau sabeago belama, tama te alta saiba munama, tama te alta tolabo ni dage si tolabo muao.”

15 “Te Kohat hanigo te nai dabe tolobo sę elalubao, te eno name ugwa be tomode elalubo nai dabe. Tiali goli, augwaligo te nai dabe nogo toumainu elamo. Ma, augwaligo nogo tuali da, teda eno augwali ela isilaibao. Tialima, Aron aga ogomani dali augwaligo te ugwa be tomode mubo doado bage bugagia tomagelama, tama te gasaba gudasa peyu yao. Tama nosali te Kohat dabego sagaselama, tolasa peyu emainao. Te da, te Kohat dabego sę dao. Te sę augwaligo tigidali sogo gasaba gudasa painogo, te sę naga eyu emainao,” wali.

16 “Te pris bidi Arongo ogwa Eleasargo te name ugwa be, me lam wel, me te pris bidi sa mubo te wel me, te wiegi yai denami ebo pauda me, te wit ofa nai dabe, tama agai tonalumainao. Me agai eno bede munalubo nai dabe sese me agai tonalumainao,” te po wai.

17 Tama Genuai Bidigo Moses de Aron sibolo e tama tiwai po wali, 18-19 “Te Kohat hani augwali eno doado bage munaluboba pąba asobo si da, dagego augwali bugagia tonaluao. Tiyu, augwaligo dwasianu sę me geda muai digi, eno augwali ela muidalio. Tama tialima, Aron aga ogwa dabe dali augwali te be tomoba bolo pelama, tama te Kohat hani dabe deli deligo sę bolo yao, tama augwalibolo mena nai dabe augwaligo tolabo po walao. 20 Tiali goli, te Kohat dabe augwali te tomoba odolali pelama, te pris dabego eno doado bage dabe dodolodubadi sugi pali da, teda eno augwali elama isilaibao,” te po wai.

21 Genuai Bidigo Mosesbolo wali, 22 “Te Gerson dabe augwa hani dabe nogi sao,” po wali, “te Livai hani dabego deli kaneme bugwai dabe. 23 Dagego te e tobage Gerson hani bidi dabego nogi sao, te augwaligo kibu be te 30 dąį gagalasa, tama te kibu be 50 teba usu nagasobo bage, te augwaligo nogi sao. Te gesi bidi dali, monu dabe dali si te tagalao. Tama te nogi sai bidi dabe te augwali eno name ugwa be tomode sę yabo usu yai bidi dabe dao.”

24 “Augwaligo e tama nai dabe tolabo sę elalubao. 25 Te da te name ugwa bego name ugwa dabe me, te namba wan walobo haluali genuai ugwa, me namba 2 walobo haluali genuai name ugwa me, te me augwaligo wiegi yai tamu węde sikau sabeago haluali te me, me te sunumi palibo te genuai name ugwa me, 26 me te obo nigabo name ugwa me, me te name ugwa be bagulali baklain bono me, alta me, obo ebo genuai name ugwa, te sunumi paibo name ugwa me, te ugwa be dąų walobo te dwasianu nai dabe me, te obo ebo nai dabe me, augwaligo somainao. Te Gerson dabego te doado bage dabe dodolama, tolobo sę tigidali elalubao. 27 Aron aga ogwa dabe dali augwaligo te Gerson dabego ebo sę me tonaluyu, me te Gerson dabego tolabo doado bage dabe ola mayu yao. 28 Te Gerson hani bage augwaligo te sę te ugwa bede emainao. Tama te pris Arongo ogwa Itamargo augwaligo te sę tonalumainao,” wali.

29 Genuai Bidigo Mosesbolo “Te Livai hanide Merari hanigo deli kaneme dabe me nogi sao,” po wali. 30 “Tama dagego te e tobage Merari hani bidi dabego nogi sao, te augwaligo kibu be te 30 dąį gagalasa, tama te kibu be 50 teba usu nagasobo bage, te augwaligo nogi sao. Te gesi bidi dali monu dabe dali si te tagalao. Te nogi sali bidi augwali te eno ugwa lotu be tomode sę yabo usu yai bidi dabe dao. 31 Augwaligo te ugwa be pos ni tolabo sę elalubao, me te be paibo ni name dabe me, me ugwa be te pos ni tulubo halobage dabe me, 32 me te ugwa be mesalo bagualubo pos ni dabe, me te pos ni dąų walobo halobage dabe me, te bobobage brasgo nigai nil dabe, te obo dąų walobo te nil dabe, me baklain te obo ni dąų walobo me, te meba obo dąų walobo nai dabe me, tama te pris dabego deli deli bidi dabe augwaligo tolabo nai dabe ola mayu yao. 33 Te Merari hani augwaligo te ugwa be augwaligo te sę emainao. Tama pris Arongo ogwa Itamargo augwaligo te sę tonalumainao,” wali.

34-48 Moses me Aron me te we bidigo tobolu bidi dabe augwaligo Genuai Bidigo po wali peyu, tama augwaligo te Livai hani selade bidi dabego nogi sali. Augwali te Kohat dabe, me Gerson dabe, me Merari dabe, tama dao. Tama augwaligo augwa hani me augwa deli kaneme bagego nogi selama, lista nigali. Augwaligo te bidi dabe te kibu be 30 elama 50 kibu be tama yai bidi dabego nogi augwaligo sali, te augwali te Godigo ugwa bede sę yabo usu yai bidi dabe. Augwaligo namba e tama tiwai dao, te Kohat dabego te 2,750 bidi elaluali, me te Gerson dabe te 2,630 bidi elaluali, me te Merari dabe te 3,200 bidi tama elaluali. Te bidi dabe sesego namba te 8,580 tama dao. 49 Augwaligo te Genuai Bidigo Mosesbolo te wali yali gilama, augwaligo tigidali bidigo nogi sali. Tama Genuai Bidigo deli deli Livai dabego sę Mosesbolo magi ilao po wali. Augwaligo te Godigo ugwa bede sę eyu, me augwaligo te ugwa bede nai dabe tolobo sę yao, Mosesgo te po polo odama, te Godigo wali po wali pali, te agabolo wali yali gilama.

<- Israel Hanigo Namba 3Israel Hanigo Namba 5 ->