1 Te Genuai Bidigo Mosesbolo 2 te bomai po te Israel dabebolo mao po wali. Tama agai te po wali, “ ‘Dage Israel dabego te enabolo digi ofa eyu, te ulubo te haniani nai dabe sao. Tama eyu, wiegi yai denami ebo ofa ulao. Eno te tobage ofa godolo ebo dao. Dagego te tobage ofa te eno bodolu muani te tigidali sogo uluyu yao.’ 3 Moses, nago te Israel dabebolo tama wao, ‘Dagego te ofa Genuai Bidibolo mao,’ po wao. ‘Te tigidali sogo dagego sipsip kibu te kibu be deli yai, tama keni dabego agai tigi me dolisąma yai, si selama, ofa eyu yao. Te si te isigo mu dela silabo ofa dao. 4 Tama dagego me deli kigamu ofa eyu, me pio ofa eyu yao. 5 Tama te kigamu ebo ofade te kilo deli yai plaua augwaligo te witgo nigilama, tama lita deli te oliv wel dali begelai, te nai te sipsip dali ofa yao. 6 Dagego te ofa tigidali sogo yao, te isigo tigidali mu dela silama, tama sisi dulu naga tede elaluaibao. Polobadu dage te Sainai bulu dude bidibadi, eno te tobage ofa yao wai dao. Te wiegi yai hasa dabego te wiegi yai denami ebo tiwai te ofa ulubo te ena Genuai Bidigo godolo elama, wiegi yai homu ebo dao. 7 Tama dagego lita deli wain wę selama, te sipsip dali ofa yao, tama nosali te wain te alta sesegede gelao. 8 Tama pio te sipsip te wit ulubo ofa me wain gelebo ofa me ulao. Te dagego kigamu ulali ofa tiwai tama yao. Te me te isigo sese ula mu dela silibo ofa dao, tama te wiegi yai denami elama, ena Genuai Bidigo godolo elama, wiegi yai homu ebo ofa dao,’ te po augwalibolo pusao,” te po wai.

16 Tama Genuai Bidigo Mosesbolo te we bidi dabebolo te po wao wali, “ ‘Dagego te namba wan poluago dei 14 te e tiwai sogo, te Pasova sogo sa muao. Tama te sogo dagego genuai nogi Genuai Bidibolo mao. [b] 17 Tama te dei namba 15 te genuai lotu wabo gagalabo sogo dao. Tama dagego te yis meni yai bret te a naga olama me badu nogo si sogo dabe tuiąo. 18 Te hasia wabo sogo, te tedali gasagi yai sogo wabo, te we bidi te lotu wainogo sisiniąo. Tama augwaligo te sogo sę me elamuo. 19 Tama dagego Genuai Bidibolo ofa iyąo. Te ogwa bidi kau kibu omai si selama, tama sipsip kibu omai deli me, te 7 sipsip kibu omai gǫų te kibu be deli yai, te keni meni yai dabe selama, ofa yao. Tama dagego te isigo sese dela silibo ofa tama ulao. 20 Tama dagego te hasa dabe dali te wit ulubo ofa me yao. Dagego te plaua te oliv wel dali taluao. Te plaua kilo sela te omai kau kibu deli deli dali ofa yao, tama te plaua kilo si te sipsip kibu omai dali ofa yao. 21 Tama te kilo deli te sipsip kibu gǫų deli deli dali ofa yao. 22 Tama me dagego te sęgę sela sąbo ofa te meme kibu omai te ofa yao. Tama te ofago te we bidi tigidali eno gedude wiegi yai pedalaibao. 23 Dagego te ofa te tigidali sogo kigamu ebo ofa dali tiwai tama yao. 24 Dagego deli kolesaga naga elama, te ofa a naga sogo olama me badu nogo si wabo sogoba usu nigi pao. Tama agai te ofa ebo denami godolo yaibao. Tama me dagego te isigo sese mu dela silibo ofa, me te wain gelebo ofa tigidali sogo yao. 25 Tama te dei namba 7, te genuai tedali gasagi yai sogo da, tede dage ma sisinama lotu po ma wao. Tama te sogo te sę ebo te habu mu dao,’ te po pusao,” te po wali. [c]

26 Tama Genuai Bidigo Mosesbolo te we bidibolo e tama po wao po wali, “ ‘Te gide nai siyu, wiegi yai homu ebo genuai sogo da, teda dagego te nai hasia inayali te selama, Genuai Bidibolo mao. Tama dage sisinama, lotu po wao. Tama te tedali gasagi yai sogo dagego sę me elamu dao. 27 Tama dagego te kau kibu omai si selama, te sipsip kibu omai deli me, te 7 sipsip kibu gǫų, te keni dabego augwaligo tigi me dolisąma yai sao. Tama dagego te nai dabe te isigo sese mu dela silibo ofa tiwai ulao. Te tobage ofa te Genuai Bidi agai godolo elama, tama wiegi yai homu ebo dao. 28 Tama dagego wiegi yai plaua augwaligo witgo nigai sao, tama dagego te plaua te oliv wel dali taluao. Tama dagego te plaua kilo sela te deli deli kau kibu omai dali ofa yao. Tama te kilo si plaua te sipsip kibu omai dali ofa yao. 29 Tama deli deli omai sipsip kibu gǫų dali, te kilo deli plaua dali ofa yao. 30 Tama me ma, dagego te meme kibu omai te sęgę sela sąbo ofa yao, tama te we bidi Genuai Bidigo gedude wiegi yai pedalabo ofa yao. 31 Tama dagego te ofa ebo sogo dagego bugagia suao, te kenigo augwaligo tigi me dolisąma yai suao. Tama me ma, dagego te wain gelebo ofa me yao, me te isigo sese mu dela silibo ofa me yao, me te wit ulubo ofa me yao. Te dagego tigidali sogo ebo ofa tiwai tama yao,’ augwalibolo te po wao,” Genuai Bidigo te po wali. [d]