Israel Hanigo Namba 20

Te we bidigo Genuai Bidi dali po hauwa wali

(Sai 17:1-7)

1 Te hasia wabo poluade te Israel we bidi sese te masigi kemi sane buluba saboligi pelama, tama augwali te bulu Kadesba bidigi pali. Augwali te bulu Kadesde bidibadi, te Miriam, te Aron Moses sigo abe, tede isali, tama augwaligo tede pubulali. 2 Te bulude wę mu meni yai. Tama tibaso, te we bidi augwali Moses de Aron si pageba sisinigi pali. 3 Tama augwaligo Moses dali wado po hauwa weyu, e tama po wali, “Te usu igi dao, da te Genuai Bidigo ugwa be mesalode dena abagi dali isigi sogo da, usu igi dao. 4 Magi baso nago da e wa pai buluba odasa asaliwe? Nago homugo da me dago hasa dabe e bulude isimainogo yaliwe? 5 Tama me nago magi baso da Isip bulude odasa e dwai buluba odasa asaliwe? Dago te nai bulubo usu isąma yabo digi? Te bulude te wiegi yai wit me te wiegi yai ni du dabe me menio. Me te ni wain me menio, me te tuabo ąį me menio,” te po wali.

6 Moses de Aron sigo te po odama, tama te we bidi taga pelama, tama augwali si te Godigo ugwa be sunumiba doligi pali. Tama augwali si gesabidi aiyaba elama, degasa dulali. Augwali sigo te tama tibo si, Genuai Bidigo ula augwali siba pedelali. 7 Tama Genuai Bidigo Mosesbolo te po wali, 8 “Te Dąų Wali Bomai Po Munolubo Halobage pąde munalubo te dono selama, tama nage dali Aron dage sigo te we bidi sisinama, tama augwali gedude nago te u genuai masigi dali po walama, tama wę tedu asaibao. Nago te tama tibo kolesagago te wę te masigidu asobadi, te we bidigo, me kau kibu, me sipsip, augwaligo te wę tumainao,” wali.

9 Tama Mosesgo Genuai Bidigo po wali pelama, tama te dono sigi pali. 10 Tama Moses de Aron sigo te we bidi te moni genuai masigi pageba sisinigi pali, tama Mosesgo augwalibolo te tama po walali, “Odao, dage te po sela sąbo we bidi dao. Te dago dagego wę te masigide saibawe?” 11 Tama te Mosesgo te masigi dali po wabe. Menio. Agai te dono selama, si sogo te masigi elali. Tama moni ąį te masigide pedalali, tama te we bidi, me augwa kau me sipsip dabego te wę tuali.

12 Tiali goli, Genuai Bidigo Moses de Aron sibolo e tama po wali, “Megi da e sogo dage sigo eno po sela sąnama, tama dage sigo enaba homu dąų wabeo. Tama dage sigo eno bomo te Israel we bidibolo ola mabeo. Tialima, duga si digi te Israel we bidi eno augwali te mawainogo po dąų wali te buluba odasa pogobeo,” te po wai.

13 Te sę te bulu Meribade pedelai dao, te da te Mosesgo te wę pedalumainogo yali te bulu dao. Te Meribade te Israel we bidigo Genuai Bidi dali te po hauwa mu wali, tama Genuai Bidigo te Israel dabebolo aga te holi, tedali gasagi yai, te magi meni yai mu dao olama te ola mayu, tama agai te po sela sąbo kolesaga hagela ebo dao olama ola mani. *Sai 17:1-7

Te Israel dabe augwaligo te Kades bulu tagalama, augwali te Jordan węba pali

(Dąį 20:14–21:35)

Te Idom tuni bidigo Israel dabete Idom bulude bilibo habu selali

14 Te Israel dabe te Kadesde bidibadi, Mosesgo Idom tuni bidiba po sela pabo bidi meba taga palali. Augwaligo agabolo e tama po wagi pali, “Dago naga deli hanigo po sesebao. Te augwali te Israel dabe dao. Augwaligo nagebolo e tama tiwai po walali, ‘Nago koneani, dade te haniani sę pedalali nago koneani. 15 Tama nago koneani, dago wąį dabe te Isip bulude kibu be hauwa mu bidai dao. Tama te Isip dabego da dali dwai sę eyu, augwali dali me dwai sę eyu yai dao. 16 Tama tibaso, dago Genuai Bidibolo i olama, da tau sao po wai dao. Tama agai dago i wabo odama, tama agai ensel bidi me taga palali. Tama ensel bidigo da Isip bulude selama, odasa asai dao. Tama megi da Kadesde bidibao, te nago kantri bogo badu elalubo bulu. 17 Tama tialima, nago da nago bulude bilabo usu dao waibawe? Da te wit gidu me wain giba da me, dago kau kibu dabe me, bogi pogobeo, me dago dagego tǫ dedage wę me me tugobeo. Da te moni sunumidu naga pelama, te nago kantri edelaibao,’ te Israel bage augwaligo te po ola tolali,” te Mosesgo tagala palali bidi dabego te Idom bagebolo te po wai. 18 Tiali goli, te Idom dabego Israel dabebolo e tama po wali, “Mu menio,” po wali. “Dage dago buludu me solamu dao,” po wali. “Ma, dage asali da, dago dage dali hwįaibao,” te po wai.

19 Tama te Israel dabego augwalibolo te po walali, “Da te moni sunumidu naga soaio. Tama ma, dago me dago kau kibu dabego dagego wę tubaso da, teda dago abelaibao. Da dagego kantridu soaio, te tama dao,” wali.

20 Tiali goli, Idom dabego po bomo elama ma weyu, e tama po wali, “Mu menio. Dage me solamuo.” Tama augwaligo ami bidi hauwa me selama, te Israel dabe dali hwįainogo asali. 21 Te Idom dabego Israel dabe augwaligo buludu solamu dama habu selali. Tama tibaso, Israel dabego Idom bulu tagalama, gasa sunumidu pali.

Aron isali

22 Te Israel we bidi augwali Kades bulu taga pelama, tama Hor bulu duba pali, 23 te Idom bulu sesege badu. Augwali te bulu dude bidibadi, Genuai Bidigo Moses de Aron sibolo e tama po wali, 24 “Aron, nage eno te Israel dabebolo mawaibao wali te tǫba nage pogobeo, nage isaibao. Magi baso meni, dage sigo eno po te bulu Meribade sela sąwai dao. 25 Tialima, Moses, nago Aron de aga ogwa Eleasar si oda selama, tama dage te Hor bulu duba holao. 26 Tama nago Arongo pris ugwa dinama, Eleasar tigiba bulao. Magi baso meni, Aron aga te bulu dude tede isaibao,” te po wali.

27 Tama Mosesgo Genuai Bidigo po wali pali. Tama agai te Aron de Eleasar si te bulu duba odasa peyu, tama holali. Tama te Israel dabe augwaligo te bage augwali pabo suali. 28 Augwali saboligi pelama, Mosesgo te Arongo pris ugwa pedama, aga ogwa Eleasargo tigiba gudulali. Tama Aron te bulu dude bidama isali. Tama nosali Moses de Eleasar si te bulu du taga solama, dulali. *Sai 29:29; Nam 33:38; Bom 10:6 29 Tama augwali sigo tigidali we bidibolo e tama po wali, “Aron polo isalio,” po wali. Tama augwali sese agade gela odubadi, polua deli usu nani.

<- Israel Hanigo Namba 19 Israel Hanigo Namba 21 ->