1-2 Te Kora, te Ishargo ogwa, te Kohat hani bidi, te Livai bidi, aga dali me te Ruben hani bidi sela augwaligo Moses dali dobo kolesaga yali. Te bidi selago nogi te e dao: Datan me Abiram, te Eliapgo ogwa si, me On te Peletgo ogwa. Te me si me si bidigo te Israel dabe tobolu bidi te 250 selama, augwali hodobo tama te dwai tobolu gagea pabo kolesaga yali. Te Israel dabe augwaligo te tobolu bidi dabe sa muai, te tigidali we bidigo gedude nogi elaluai dao. *Jut 11 3 Tama te bidi dabe augwali sisinagaselama, Moses de Aron si pageba sisinagaselama, tama augwali sibolo e tama po wali, “Odao, da tigidali tama te Genuai Bidigo dao, te dage si naga menio. Tama Genuai Bidi da tigidali dali bidibao. Tama tialima, dage sigo magi baso duga nogi ugwaba selama, da tonalubawe? Dage sigo kolesaga dolo menio,” tama po wali.

4 Teda Mosesgo te po odama, tǫba degasa dulama, gedu haluasa po wali. 5 Tama nosali aga hodaluama, aga Kora dali me Kora wali pabo bidibolo e tama po wali, “Odao. Do kigamu Genuai Bidigo ola mawaibao, te mena bidi te agai mu dawe, te dago suaibao. Te mena bidi te agai sa muaniwe, te suaibao. Te agai augwali naga te alta pageba pąba mu pomainu ebowe, te suaibao. 6 Teda Kora, nage dali, naga hani dali, dagego e tama tiao. Te do kigamu dagego te dwasianu plet selama, te denami ebo te pauda ulabo selama, 7 tama te dwasianu isi dage munama, tama te wiegi yai denami ebo pauda te pletide munama, sesao. Tama dagego altaba sela pelama, Genuai Bidigo geduba dolalugi pao. Tama Genuai Bidigo da tomode mena bidi agai sa muai yaliwe sueibao, te agai sę emainogo. Dage Livai dabe, dagego naga te dolo isąwai kolesaga ebo,” wali.

8 Tama Mosesgo Korabolo po geninama weyu, e tama po wali, “Livai dabe, dagego odao. 9-10 God, da Israel dabego Genuai Bidigo da, te dago we bidi tomode dage dįą sai dao. Tama dage naga agai sę eyu, tama agai be pąba pomainu yai dao. Me te we bidigo gedude dolaluyu, augwaligo ofa sę tau siyu dolalumainu yai dao. Godigo dage me te gasa Livai dabe dagego agai sę emainogo sa muyu, tedali gasagi yai muai dao, te nogi elalubo sę emainogo. Tama, mena tama tiali te duga gedude te sę te olo nai tiwai dawe? Tama tialima, dage me te pris me nigainu ebawe? 11 Tama Aron ma mena tiwai bidi da weyu, dagego aga dali wado ebawe? Aga te olo bidi dao. Tialima, nage dali, naga hani dali, dagego Aron dali wado ebeo. Menio. Dagego God dali wado ebao, Genuai Bidi dali.” Mosesgo te po wali.

12 Tama Mosesgo te Datan de Abiram si asao wabo po ola tolali. Tiali goli, augwali sigo po wei ponoyu, e tama po wali, “Da si asogobeo,” po wali. 13 “Nago da wiegi yai bulu Isipdu odasa e nai meni yai buluba odasa aselama, da ela isilainu asai dao. Tama nago homugo te da, te olo sę dawe? Tama megi me nago da tonaluainuwe? 14 Nago da te wiegi yai buluba me odasa pai menio, te dago nai gi dabe elaluyu, me wain gi dabe elalu emainu odasa pai menio. Nago homugo da te kolesaga meni yai, tama nago da ili po ola mawaibawe? Nago usu egobe, tama tibaso da si me asogobeo,” te bidi sigo te po ola tolali.

15 Mosesgo te po odama, aga sębę elama, tama Genuai Bidibolo e tama po walali, “Nago te bidi hani dabego sesali ofa nago selamu dao. Augwaligo te po wali, eno augwali subigila tolalubo po wali. Tiali goli, eno augwaligo kibu donki deli me wi siyu, me augwali dali dwai kolesaga me eyu me ebeo. Mu menio,” wali.

16 Tama Mosesgo Korabolo e tama po walali, “Do nage me te nage wali pabo 250 bidi, dage te Godigo name ugwa beba asiąo. Tama Aron me tama asaibao. 17 Tama dage deli deligo isi dabo nogobo plet te wiegi yai denami ilibo pauda tede munama, tama Genuai Bidibolo agai altaba aselama, ofa yagasao.” Te po wai. 18 Tama te sogo kigamu te bidi dabe augwa te wiegi yai denami ilibo te pauda ulubo te plet sesali. Tama augwaligo te plet dabede te isi dage munama, tama te wiegi yai denami ebo te pauda te isi daide muani. Tama augwali te Moses de Aron si dali te Godigo ugwa be sunumiba doligi pali. 19 Nosali Korago te we bidi sese sisinama, tama augwali te Moses de Aron si bidiboba hobolu gelama, augwali si tonaluali. Augwali si me te ugwa be sunumide dolaluali. Augwali polo sina silibo si, Genuai Bidigo agai ula te Israel dabe tigidaligo sumainogo haninama pebili dilide mu yali, tama tigidali Israel dabego suali. 20 Tama Genuai Bidigo Moses de Aron sibolo e tama po wali, 21 “Dage si gedao. Te we bidi taga pao. Megi tama eno te we bidi ela silaibao,” wali.

22 Tiali goli, Moses de Aron si gesabidi tǫba elama, degasa duliyu, augwali sigo Genuai Bidibolo e tama po wali, “God, nago deli naga te tigidali tǫde bidibo we bidi nigilama, augwali te bidibao. Te bidi deligo dwai sęgę sai madi, tama nago tigidali Israel we bidi ela silaibawe?”

23 Tama Genuai Bidigo Mosesbolo e tama po wali, 24 “Te we bidibolo te Kora, me Datan, me Abiram, augwaligo ugwa be tagalama, digibulu obanu gana pao po wao.”

25 Tama Moses de Israel dabe tuni bidi dabe augwali te Datan de Abiram si sugi pali. 26 Tama Mosesgo tigidali we bidibolo e tama po walali, “Dage tigidali ugwanu kila sesa piąo, te dwai bidi dabego ugwa be pąde, tama augwaligo nai dabeba me dagana selama me elamuo. Tiyu, dage augwa pąde bidiyu da, augwaligo sęgę dage me isabuo.” 27 Tama te we bidi augwaligo odama, augwali ugwaba kila selama, Kora, me Datan, me Abiramgo ugwa be dabe taga pali. Tiali goli, te Datan de Abiram si augwa ugwa be buluba aselama, augwa be sunumiba dolaluagasali. Tama augwa we wai dabe me augwali dali dolaluali.

28 Tama Mosesgo te we bidibolo e tama po wali, “Te megi magi nai me pedalainu ebo dagego megi sueibao, tama dagego koneaibao, Genuai Bidigo digi ena taga palama, dage tonalumainu yai dao. Eno ena homu kolesagago me ebeo. Mu menio. 29 Megi da, te bidi dabe isaibao. Ma, Godigo augwali elisąma ebaso da, tama augwali olo dwai isibaso da, teda dagego koneagameo, te Genuai Bidigo agai sę emainogo ena tagala palobe, te homu yaibao. 30 Tiali goli, Genuai Bidigo gasa sunumi medu te bidi dabe isilibaso da, te e tiwai elama, te tǫ tomode mu peda pelama, tama te bidi dabe augwa doado bage dali te tǫ dedageba gealubaso da, tama augwali bidibadi te isai bidigo buluba pobaso da, teda dagego koneaibao, te bidi dabe augwaligo te Genuai Bidi tudi ola menama, agai po sela sąwali dao,” te po wali.

31 Mosesgo po ola silibo si, polo tama te Datan de Abiram si dolaluali te tǫ tomode peda pelama, genuai tǫ dedage mu yali. 32 Tama te Datan, me Abiram, me Kora, me aga dali bidali bidi dabe, augwa we wai puluba, me augwa doado bage sese tama, te tǫ dedageba tula pelama, tama te tǫ ma madua sali, tama te bage mesega sali. 33 Tialima, augwali isisąbadi augwali augwa we wai, me augwa doado bage dali te isai bidigo buluba pali, tama te tǫ ma madua selama, augwali mesega sali, tama te we bidi dabego augwali munu me ma subeo. 34 Te augwali te dedageba tulaluali sogo, augwali hǫą dwai mu wali, tama te Israel we bidi te pąde bidali we bidi augwaligo te po wali, “Da wi polo pinao, tiyu da te tǫ peda peyu, da me te tǫ dedageba tola pelama, da me hagayabuo.” Tama tibaso, augwali wi polo pali. 35 Tama Genuai Bidigo isi tagala palama, te 250 bidi dela silali, te denami wiegi yai ebo pauda ulama ofa yali bidi dabe.

36 Nosali Genuai Bidigo Mosesbolo e tama po wali, 37 “Te pris bidi Arongo ogwa Eleasarbolo te isigo dali te bidi dabego bras plet sao, tama nage pageba sesao, te po agabolo wao. Tama nosali nago selama, digibulu gana ma pelama, tama te pletide elalubo isi dabe buluba sąsąyao. Magi baso meni, te plet dabe te eno nai dabe mu dao, tama habu selai nai mu dao. 38 Te plet dabe te bidi dabe te Genuai Bidi eno altaba pali sogo habu selai nai pedelai dao. Tama augwaligo te wiegi yai denami hano holobo ofa yai dao. Tama tialima, te dwai sęgę selama, isai bidi dabego plet seselama, tama elama, tama olo kapa dage tiwai pedalumainao. Tama te bras kapago te alta mesegelao. Te Israel dabego te brasgo te alta halualubaso, augwaligo koneaibao. Tama augwaligo te bidi dabego yali kolesaga tiwai egobeo,” te po wai.

39 Tama Mosesgo te pris Eleasarbolo te po wabo si, te Eleasargo te plet dabe sali. Tama bidi mebago te plet halubo si, te plet te bras kapa sawali dage tiwai pedelali, te alta haluabo kapa tiwai pedelali. 40 Te halubo nai te Israel dabego homu dąų walabo dao. Tama augwaligo koneaibao, te Arongo hanigo naga te altaba pelama, te wiegi yai denami hano holobo pauda te Genuai Bidigo gedude uluyu yaibao. Ma, te gasa olo bidi dabego te tobage ofa ebaso da, Genuai Bidigo aga te Kora aga hani dali dolali tiwai aga hani dali dolaibao. Tama Eleasargo te Genuai Bidigo Mosesgo penanedu wali po wali pelama, te sę dabe dolo tama yali.

41 Te sogo bidama me sogo bubugade, tigidali we bidigo Moses de Aron si dali wado po wali. Augwaligo e tama po wali, “Dage sigo Genuai Bidigo we bidi meba elalio.” 42 Augwali sese polo sisinani, te Moses de Aron si dali wado po wainogo. Tama augwali begelama, Godigo ugwa beba tonani, tama augwaligo suali, pǫgo te ugwa be mesega sai suali. Tama Genuai Bidigo ula haninama mu ebo suali. 43 Tama te Moses de Aron si te ugwa be sunumiba doligi pali. 44 Tama Genuai Bidigo Mosesbolo e tama po wali, 45 “Dage si te we bidi pagede gediąo, pelama, te we bidi taga pelama, digibulu gana doligi piąo. Tama polo tama eno augwali dolaibao,” wali. Augwali sigo te po odama, augwali si gesabidi aiyaba begelama, tǫba degasa dulali.

46 Tama Mosesgo Aronbolo e tama po walali, “Te wiegi yai denami yai pauda ulubo plet sao. Tama te altade isi dage me selama, nago te pletiba muao. Tama wiegi yai denami ebo pauda selama, tama te isi daide muao. Tama te we bidi pageba polo sela pelama, sęgę sela sąbo ofa igi pao, tama augwali Godigo gedude wiegi yai pedalaibao. Magi baso meni, Genuai Bidigo augwali dali sębę me elama, genuai gasi dwaigo te we bidi dolobo gagalali,” wali. 47 Tama Arongo Mosesgo po wali pali, tama agai te wiegi yai denami hano ebo ofa ulubo plet sali, tama aga te we bidi sisąlubo tomoba udayali. Tama agai suali, te gasi dwai te we bidi tigiba polo pedalai suali. Tama tibaso, agai te wiegi yai denami hano holobo te pauda te pletide munama ofa yali. 48 Tama Aron te we bidi isali, me bidibo we bidi tomode dolaluyu, te ofa yali. Agai te tama tibo si, te gasi silali. 49 Te 14,700 we bidi te gasigo isali. Tiali goli, augwaligo te Kora dali isali te we bidi dali nedebeo, te 14,700 we bidi dali nedebeo. 50 Te gasi silibo si, Aron aga te Godigo ugwa be sunumiba Moses pageba ma asali.

<- Israel Hanigo Namba 15Israel Hanigo Namba 17 ->