Dwagi Yai Gesi Po Matyugo Asęani 18

De te Godigo we bidi tonalubo madide genuai bidi dawe?

(Mak 9:33-37; Luk 9:46-48)

1 Tama te takis mabo po wali sogo aga wali pabo bidi dabe augwali Jisas pageba pelama, te po wai, “De mu te Godigo we bidi tonalubo madi genuai bidi mu dawe?”

2 Tama Jisas agai te wai bǫų me deli i olama asobo si, te wai bǫų agai augwali tomoba sela aselama dodolali. 3 Tama agai te po wai, “Eno mu po dagebolo obao, te dage e wai bǫų tiwai pedelama hasegelesiąbaso da, ta dage te Godigo we bidi tonalubo bomo tomoba munu me pogobeo. 4 Te mena bidi aga digi te aga ebo kolesaga dabe dali aga aiyaba elaluama aga nagamea homu eyu, e wai bǫų tiwai gagawali da, te tiwai kolesaga ebo bidi agai te gasa Godigo tonalubo we bidi dabe augwaligo yali kolesaga aiyaba elaluaibao. 5 Tama mena bidigo enade homu beagasu wiegi yai homu eyu, tama e tiwai wai bǫų me tau sobaso da, teda agai te wai bǫų naga tau siyu ebeo. Te ena agai tau siyu ebao. 6 Tiali goli bidi mego e tiwai wai pulubago enaba homu begagaselama, te konealubo po dąų wali te aga dwai sę ebo tomoba kegeyu tulaluyu da, tebo bidigo dwai sęgę mu saibao. Tama aga te dwai sę idali weyu, te bidi dabe augwaligo aga magede moni sęgę yai masigi te bonogo kęnama, te bidi te tamu ąį moni ge tomoba sela sąyu aga tede wę tuyu poma peyu elama isigi sogo da, teda te usugi dao. Te sę agaba pedaligi sogo da, aga te moni dene sigi menigi da.”

7 “Magi baso meni. Te tǫde bidi dabe augwaligo te bidi meba te dwai sę ebo kolesaga tomoba kegelama, te bidi meba tulalubo dao. Te augwali kegali bidi dabego moni dene mu saibao. Mu dao, te tobage haniani dwai kolesaga pedalaibao. Tiali goli te dwai sę ebo kolesaga tomoba gasa bidi kegebo bage, augwalide hobede mu yao, augwaligo moni dene mu saibao. 8 Me ma, te naga nogo ma sągągo te nage dwai sę eboba kegeyu tama nage te kolesagaba tulaluainogo idali weyu, tama nago te nogo ma sągą te togwa sąyao. Tama tiyu te nago nogo me deli naga elaluyu, ma nago sągą me te me deli naga elaluyu, tama nago te sesemane sogo bidada pabo ula sabo te usu dao. Tiali goli nago nogo si ma te nago sągą si me elaludu da tama augwaligo dwai sę eyu, nage te genuai dene mu siyu bidada pabo te isisąbo sia dabo madi teba peyu da, te dwai mu dao. 9 Tama me ma, naga gedu mego nage te dwai sę eboba kegeyu, tama nage tulaluainogo ebaso da, teda nago te gedu guda sąyao. Tama nago gedu deli naga elaluyu, te naga sesemane sogo bidada pabo ula sabo, te usu dao. Tiali goli nago gedu si elaluyu, tama augwaligo nage te dedage page sia dabo madiba sąyu da, te dwai mu dao. 10 Dage dua bugagia dao. Tiyu dagego te homu eyu, e dwasianu we bidi tomode me deli te olo nai tiwai da wagimio, augwalide tagala wagimio. Menio. Eno dagebolo te po obao, te Godigo bidibo madide bidibo ensel te mobo bidi dabe augwaligo sesemane sogo te eno Aya dagalude bidibo subo dao. Tama tiyu, te ensel mobo bidi dabego e tiwai dwasianu we bidi hani tonalubo dao. 11 [Magi baso meni. Te Godigo Bidi Mu agai te hagawai we bidi dabe augwali ma sagasu asai dao.]” Jisasgo te po wai.

Te po digi po begelama, te kibu sipsip hagawali po wai

(Luk 15:3-7)

12 Jisasgo te po wai, “Dagego magi homu ebowe? Ma, te bidi me deligo kibu sipsip te 100 sipsip elaluai baso da, tama te sipsip me deli hagabaso da, teda te bidigo magi yaibawe? Te agai te 99 sipsip te bulu dude nai tuyu bidibadi tagalama, tama agai te hagawali sipsip me deli gegebo sę gagalaibawe? 13 Awe, eno mu po dagebolo obao, te agai gegali sipsip subaso da, teda agai te hagasiąwani bidibo sipsip dali wiegi yai homu yai goli, agai te hagawai sipsip ma sali te sipsip delide wiegi yai homu pemene mu yaibao. 14 Tama te tiwai naga duga Aya dagalude bidibo bidi agai e dwasianu wai puluba me deli hagaidali homu ebo dao,” Jisasgo te po wai.

Amago ebo dwai kolesaga dodolobo po

15 “Te nago ama agai dwai kolesaga nage dali ebaso da, teda nage pelama dugaduba si digi bidiyu, tama nago aga dwai sę yali kolesaga te agabolo haninama ola mao. Tama agai nago po odobaso da, teda naga ama te dwai sęba kegali te nago aga ma oda sabo tiwai ebo dao, te dage si deli homu naga yaibao. 16 Me ma, agai nago po wabo odobo hagela ebaso da, teda nago te gasa bidi deli ma bidi si selama, tama agaba ma pao. Magi baso meni. Te Mosesgo asęani bomo yai pogo te tama po wabo da, ‘Te dwai kolesaga dodolobo po te bidi si selago odiąo, augwaligo “Te mu po dao” nosali omainogo te tama yao.’ [a] 17 Tiali goli agai augwaligo po odobo me hagela ebaso da, teda dagego te Godigo po odobo we bidi hanibolo te po pusao. Tama agai te Godigo po odobo we bidigo po me odisąbaso da, teda dagego homugo aga te Godigo po odisąbo bidi, ma te takis mone sabo sę ebo dwai bidi tiwai da homu eyu, aga sula tagalao,” Jisasgo te po wai.

18 “Eno mu po dagebolo obao, dagego e tǫde dąų weyu habu selali nai te nai tigidali te Godigo me te aga we bidi tonalubo madide me dąų weyu habu selaibao. Ma, dagego e tǫde pisigina sąbo nai te nai tigidali te Godigo me te aga we bidi tonalubo madide me pisigina sąwaibao. 19 Tama eno po me dagebolo obao, e tǫde dage tomode bidi me sigo deli homu kolesaga eyu, tama nai me deli sainogo augwali sigo gedu haluasa po obaso da, teda eno Aya dagalude bidibo bidi agai te nai te bidi sibolo mawaibao. 20 Awe, te bidi si ma selago eno nogide bulu me deliba sisinabaso da, teda ena augwali tomode bidaibao,” Jisasgo te po wai.

Te po digi po begelama bidi mego gasa bidigo negeli sela sąsiąbo po wai

21 Tama te sogo Pita Jisas pageba asama tama aga dali te po wai, “Genuai Bidi, nisu naga sogo ena amago dwai sę enabolo emainogo yai, tama agai enabolo dwai sę yali te sęgę eno nisu naga sogo sela sągowe? Ma a naga olama me badu nogo si tama sogo te sęgę sela sąbo usu egowe?” Pitago Jisas dali te po hanalu wai. 22 Tama Jisasgo Pita dali te po wai, “Eno nagebolo te a naga me badu nogo si tama sogo te po wabeo. Menio. Eno te po obao, nago naga amago dwai sę yali te nago sesemane sogo agai te dwai sęgę sela sąyao, eno te po nage dali obao. 23 Magi baso meni. Te God agai we bidi tonalubo sę e tiwai dao, te tǫde gavman tuni bidi me deligo aga sę tonalubo bidi dabego negeli sali nai dodolainogo yai. 24 Tama agai te nai negeli sali dodolobo sę ebo gagalama, tama augwaligo bidi me deli aga pageba sela asai, tama te sela asali bidigo negeli sali mone te genuai mu tama te mone nogi hauwa mu dao. 25 Tiali goli te bidi agai te negeli sali mone wei ponabo mone usu mu menio. Tama tibaso, te gavman tuni bidigo augwalibolo te po olama, ‘Te bidi me aga we wai dabe dali tama aga doado bage dali tigidali munama, tama gasa bidigo abelama, tama te negeli sali me badu ponabo mone sao. Aga gasa bidigo masigi sasiąbo sę ebo bidi bidaibao,’ te po wai. 26 Tama te sę tonalubo bidi aga te tuni bidigo sągą pagede tǫba kidu sugunama, tama te tuni bidigo homu bedegau iliyu, gonobo po weyu, te po widu geai, ‘Nago ena hobede elama, ena tonaluao. Tama eno nage dali negeli sali tigidali nagebolo wei ponaibao,’ wali. 27 Tama genuai bidigo te sę tonalubo bidi aga hobede ebaso tagalai, tama agai te olo negeli sali mone me tagalai.”

28 “Tama te sę tonalubo bidi buluba solama, tama aga te gasa sę tonalubo bidi me deli aga abagi me suali, tama agai te bidibolo negeli polobadu mane pololai masigi nogo si elaluai. Tama agai aga abagi te bidi dogoniba kęą sigi pelama, tama bomo eyu, te bidi poma peyu, tama agai agabolo te po wai, ‘Nago negeli sali mone tigidali wei enabolo ponao.’ 29 Tama aga abagi te bidi tǫba kidu sugunama, tama agabolo homu bedegau ilibo po weyu te po wai, ‘Nago ena hobede elama tonaluao. Eno nago mone negeli sali wei ponaibao,’ wali. 30 Tiali goli te bidi aga hagela yai. Tama agai aga abagi te bidi kalabusiba mugi pai, tama te bidi tede bidibadi agai negeli sali wei usu numainogo tiwaibao.”

31 “Tama te tuni bidigo sę ebo bidi meba augwaligo te kolesaga ebo sulama, tama augwali dwai homu mu yai. Tama augwali pelama, augwa genuai bidibolo te po tigidali pusigi pai. 32 Tama tibaso, te genuai bidigo te bidi i olama, tama aga dali te po wai, ‘Nage dwai kolesaga ebo sę tonalubo bidi dao. Hasia nage ena dali gela obaso, tama nago te negeli sali nai tigidali eno olo mu tagalao po wai dao,’ te genuai bidigo te sę bidi dali te po wai. 33 ‘Tama te sogo eno nage hobede yai dao. Tama magi baso nago me naga abagi te gasa sę tonalubo bidi hobede yai meniwe?’ wali. 34 Tama genuai bidigo aga te dene maiabo bidi dabego nogode muai, te kalabuside, tama te bidi tede bidibadi agai nai negeli sali tigidali usu numainogo tiwaibao. 35 Te tiwai me, dagego homu mu esiąyu, dagego duga ama dabego dage dali yali dwai sę sela sąsiąwani da, teda eno Aya dagalude bidibo bidi agai me te dagego dwai sę ebo te aga sela sągobeo,” Jisasgo te po wai.

<- Dwagi Yai Gesi Po Matyugo Asęani 17 Dwagi Yai Gesi Po Matyugo Asęani 19 ->