1 Tama Godigo Mosesbolo walama, te Israel dabebolo e tiwai po walao po wali, “Te bidi me deligo te Genuai Bidiba te wit ofa yabo homu ebaso da, teda agai te wit wale bo sela sąnama, te aga nai ge naga selama, te wiegi yai plaua mu nigilama, te plaua sela asao. Tama agai te ni oliv wel te plauaba gelama, tama te wiegi yai denami ebo pauda me te plaua ugwadu daiba munama, 2 te Arongo hani dabe, te pris dabeba sela pao. Te pris me deligo nogo te plauaba munama, te plaua dali wel dali si te dwasianu pedai siyu, tama te denami pedalubo pauda tigidali me selama, te altaba ulao. Te dwasianu plauago tigidali plaua te bidigo Genuai Bidiba dąį ilibo ofa mu ebo ofa tiwai dao. Te wit ulubo ofa denami Genuai Bidigo odama, te agai godolo homu elama, bugai haliga yaibao. 3 Te me badu elaluali plaua te pris dabego dao. Te plaua te pris dabego witde sali te bidi dabego Genuai Bidiba ofa yali nai, tama te pris sę isąwai bidigo sabo te habu mu yai dao,” wali.

4 “Dagego te nai ulubo be nogi aven tede te bret ulama, te Genuai Bidiba ofa yabo bret dage saiba wida, teda te bret dagego te yis dali nigilamuo. Dagego te plaua selama, te oliv ni wel dali taluama nigao, te dagego bret nigilama ofa yao. Te dagego bret nigibo hagela homu ebaso da, teda dagego te bisket naga nigilama, te ni oliv welgo piligilao. 5 Dagego te ofa yabo plaua praipende praim eyu da, dagego te yis meni yai wiegi yai plaua mu siyąo. Te dagego te ni oliv wel te plaua dali talu bolo elama, te praim yao. 6 Te dagego te plaua dwasianu dwasianu miminama teba wel gelama, te Genuai Bidiba ofa yao,” te po wai. 7 “Te dagego ofa yabo bret nigilama, te genuai sospen senede dagego ulainogo da, teda dagego wiegi yai plaua mu te yis meni yai selama, te ni oliv wel dali belegelama ulao,” wali. 8 “Ulama, silama da, teda dagego te bret ma plaua te ofa tiwai Genuai Bidiba selasa pelama, te pris me deliba mao. Tama prisgo te altaba sela paibao,” wai. 9 “Nosali prisgo te dwasianu pedai bret ma plaua te dagego Genuai Bidiba ofa yali nai tigidali dąį ebo ofa mao, agai te alta siaba ulaibao. Tialima Genuai Bidigo te ofa denami ebo odama, te agai godolo eyu, bugai haliga mu yaibao,” wai dao. 10 “Te bret ma plaua me, badu elaluali da, te pris dabe augwa nai dao. Te bret ma plaua te pris dabe augwa tueinu saibao, te Genuai Bidiba ofa yali nai. Tialima, te pris sę isąwai olo bidi dabede te habu mu selai dao.”

11 “Dagego ofa ebo bret ma plauaba te yis munama, te Genuai Bidiba me selasa pigio, magi baso meni, te yis ma hani te ofa dabeba musįama, te Genuai Bidiba ofa mayu, te siaba ulubo ofa, te habu mu selai dao,” wai.

12 “Dagego te yis ma hani te hasia polasa gide sabo wit dali munama, te Genuai Bidiba ofa igi peyu selasa pao. Te usu dao,” wali. “Tiali goli te yis ma hani elalubo nai yai baso da, teda dagego te Genuai Bidiba wiegi yai denami iliyu, isiba domainogo ulubo altaba me ulamo dao. 13 Te dagego wit ulubo ofa ebo side tigidali sogo tamu muao, magi baso meni, tamugo dagego te God dali dąų walali bomai po dąį ebo tiwai ebao. Te dagego te duga God dali dąų wali bomai po gegeda pidali weyu, te tigidali ofade dagego tamu naga mudao. Dagego te ofa me delide tamu mubo me gegeda paligio. Mu menio,” wali.

14 “Te dagego gide polasa ina yani wit selama, te Genuai Bidiba ofa yainogo da, teda dagego te nai ulubo madi avende bolo ulama, te mimia sanama, te dwasianu kakali ilama, nosali te Genuai Bidiba selasa pabo usu dao. 15 Te wit ulubo ofade dagego te oliv wel me te wiegi yai denami ebo pauda me muao,” te po wali. 16 “Tama prisgo te wit pedai dwasianu me wel me selama, te wiegi yai denami pedalubo pauda te tigidali selama, te dagego ofa dąį ilama te ulao. Te Genuai Bidibolo mabo ofa eyu isiba ulubo nai dao.”

<- Pris Sę Ebo Bomai Po 1Pris Sę Ebo Bomai Po 3 ->