1 Te sogo Nadap dali Abihu, te Arongo ogwa si, te augwa si plet digi selama, te wiegi yai denami ebo pauda ulali. Tama augwa si te sia dage me pauda te wiegi yai denami hano ebo te plet pou dabeba munama, tama augwali sigo te isi te Genuai Bidiba te ofa eyu sela pali. Tiali goli, Genuai Bidigo augwali sibolo te tiwai isi sesao po me wabeo. Tama te sia te Godigo nai da wasiąyu, te Godigo homu godolo me ebeo. 2 Te polo mu tama Genuai Bidigo te isi tagala palama, augwali si ulama, te augwali si Genuai Bidi gedude isai dao. 3 Tama Mosesgo Aronbolo te po wai, “Polobadu Genuai Bidigo te tiwai po wali, ‘Te eno sę eyu pąba asobo bidi dabe, ena te olo bidi tiwai meni augwaligo te tiwai koneabo elalubao, ena God mu dao. Augwaligo te tama homu bugagia konebaso da, teda eno genuai bomo me ula te we bidi augwaliba ola mawaibao.’ Agai te tama po wai, tiali goli te bidi sigo te po wali me pisąbaso, tama Genuai Bidigo augwali si dolali,” Mosesgo te po wai. Tama Arongo te tiali po odama, agai po me wabeo.

4 Te Mosesgo Misael me Elsafan i obaso augwali si asali. Augwali si te Usielgo ogwa si, te Arongo aya sabi bidi dao. Mosesgo augwali siba te tiwai po wali, “Dage sigo te duga si amago tigi sagasao, te Godigo sel Ugwa Be tagalama, augwali si te Godigo pesagede buluba sela peyu, pubaligi pao,” te po wali. 5 Tialima, te bidi si pelama, te isali bidi si selama, te bidibo pesage tagalama, buluba soali, te Mosesgo wali po tiwai gilama yali. Tiali goli, augwali sigo te isali bidigo gudali ugwa me peda sąbeo. Menio. Augwali si ugwa dali te tigi tolasa palio.

6 Megi da Mosesgo po Aronba mayu, te aga gasa ogwa sibolo te po wali, Eleasar dali Itamar si. Agai augwaliba te tiwai po wali, “Dagego te isali bidi side homu dene ebo kolesaga wali me pigio. Te dagego tobolu nisi yaga tigidali side sao. Te dagego olo elalumainogo me elamuo. Te dagego homu dene ebo dąį iliyu, te duga ugwa me pisągio. Dagego te homu dene ebo kolesaga wali pobaso da, teda Genuai Bidigo dage tigidali ela silama, te Genuai Bidigo te da Israel we bidi tigidaliba wado po dwai mu waibao. Te gasa Israel dabe, te duga deli hani, te Genuai Bidigo isi tagala palama, te elali bidi side augwali gasa Israel dabego naga homu dene emainao. 7 Dagego te Godigo sel Ugwa Be me tagaligio. Dage te buluba sobaso da, te dage isaibao, magi baso meni, eno te Genuai Bidigo wel dageba muani, tama dage te Genuai Bidigo bidi dolo mu bidibao,” wali. Tialima, augwaligo te Mosesgo po odama, augwaligo te tama tiwai yai dao.

8 Genuai Bidigo Aronba te tiwai po wali, 9 “Te nage me nago ogwa dabego te bomai ąį wain me bia tulama, dage eno sel Ugwa Be tomoba me pelamuo. Te habu mu dao. Te dagego sel Ugwa Be tomode sę yabo sogo ąį tulama, te Ugwa Be tomoba pobaso da, te dage isaibao. Te dagego bulai wąį nǫų dabe nosali pedalubo hani, augwaligo me te bomai po wali pomainao. 10 Te dagego bomai ąį tusąbaso da, teda dagego bugagia dagaliyu, te mena nai eno nai ma te olo we bidigo nai mena elalubo bugagia dagalaibao. Te dagego eno gedude mena nai te meda menisąyu, te mena nai meda elalubo te bugagia mu dagalaibao. 11 Tama dagego te Israel we bidi te bomai po tigidali eno dagebolo te Mosesgo pedauwalide mabo te ola mobaso usu yaibao,” te po wai.

12 Tama Mosesgo Aron dali aga bidibo ogwa si daliba te po wali, Eleasar me Itamar. Agai te tama po wali, “Dagego te me badu pedai plaua te wit ulubo ofago te Genuai Bidiba ofa yali me badu munalubo sao. Tama te plauago, dagego te yis meni yai bret nigao. Tama dagego te alta pąde te bret tuiyąo, magi baso meni, te nai te olo nai menio, te God aga ofago digi dagebolo mabo dao. 13 Dagego te bret te Godigo sel Ugwa Be obo tomode bididu tuiyąo. Te witgo ebo ofa pedai tigidali te duga dali te duga hani ogwa dabego dali me dao. Dagego te we bidigo Genuai Bidiba ofa yali plauago siyąo. Genuai Bidigo enabolo te sęde po walai dao,” wali. [a] 14 “Te dage dali, te duga we bidi hanigo dali, te kibu bau me kibu dolo sągą te deli haliga pedaliyu ofa yali nai siyąo. Te kibu bau augwa te Genuai Bidigo gedude nogo tolaluyu, ugwa eda ebo dao. Te pesage me deli God gedude wiegi yai me elalubaso da, teda dage te me badu pelama, te kibu dage tuiyąo. Godigo te ofa yali kibu mi te dage me duga ogwa dabe dali tumainogo mawai dao. 15 Te we bidigo te ofa yabo ili me te kibu kau me sipsip sągą me bau te sela asobaso, te dagego nogo tulaluyu, te Genuai Bidi gedude iba eda yao. Tama nosali dagego te ili alta isiba ulao. Tiali goli, dagego te kibu sągą me kibu bau selama, tuiyąo. Sesemane sogo te kibu pedai dage si dage dali, duga wai dabe daligo nai siyąo. Genuai Bidigo te tama po wai dao,” wali. [b]

16 Nosali Mosesgo augwaliba po bomonama weyu, te tiwai po wali, “Dagego te sęgę sela sąbo ofa ebo memede mena sę yaliwe?” Tialima, augwaligo te po agabolo wali, “Dago te isiba sese ulama, dela silalio.” Tialima, Mosesgo te po odama, tama agai te Eleasar me Itamar augwali siba wado po wai. Tama agai te po wai, 17 “Magi baso dage te Godigo sel Ugwa Be tomode bidama, te sęgę sela sąwani kibu tubewe? Te God aga ofa me deli da olama, sa muyu, te agai dageba menama, te dagego te we bidi dabego yali sęgę sela sąmainogo ebo ofa dao. [c] 18 Dagego te ofa yali kibu kaneme te Tedali Gasagi Yai Be Habuba me sela pisąwai, tama tialima, magi baso dagego te kibu dage te eno dagebolo wali po gilama te Tedali Gasagi Yai Be Habude tuai meniwe?”

19 Tialima, Arongo Mosesbolo te tiwai po wai, “Odao. Megi tama naga te we bidi dabego te augwa sęgę sela sąyabo ofa te Genuai Bidiba mayu, te augwaligo te isiba tigidali ulama dabo ofa yabo sesalio. Tiali goli, te dwai sę enaba pedelai dao. Tialima, te megi tama eno te sęgę sela sąbo ofa ebo kibu mi tubaso da, teda Genuai Bidigo homugo te ebaso godolo yaiba, agawe? Eno homugo te menio,” wali. 20 Mosesgo te wabo odama, tama agai te Arongo po wiegi yai da homu yali. Tama aga haliga dua nagame igulama bidalio.

<- Pris Sę Ebo Bomai Po 9Pris Sę Ebo Bomai Po 11 ->