1 Te kibu be hauwa bidama, tama Genuai Bidigo te boi pilama wiegi yai pemene ebo sogo te Israel dabebolo mani. Tama augwaligo te bidalua pabo boi bidi dabe dali te boi me hwįbeo. Te megi da, te Josua monu dabe mu yali. 2 Tialima, agai te Israel dabe tigidali i olama, tama te tobolu bidi dabe me, te genuai bidi dabe me, tama te tonalubo bidi dabe me, te ofisa bidi me, augwali i olama, tama agai augwalibolo te po wali, “Megi da, ena monu dabe yalio. 3 Dagego digi te tigidali sę te God, dago Genuai Bidigo, te boi bidi hani dali te dage homugo koneama, te sę yali dagego suali. God, te dago Genuai Bidigo, te dagego boi hwįbadi tau sali. 4 Megi te dagego bugagia odiąo! Te gasa hani dali tama te elalubo tǫ, te eno dagebolo somainogo sa muani. Eno te boi hwįnama aiyaba elaluali hani dali te tiwai naga yali. Tama dagego tǫ te wę Jordan sesege badu gagalasa pali, te giliga pedalubo madi, te Mediterenian Tamu Ąį badu, te giliga dega sigilubo pedai badu dąį igi pali. 5 God, dago Genuai Bidigo, te boi bidi dabe ela gudulama, tama dagede wi eyu pomainogo ilaibao. Tama te dagego augwaligo tǫ saibao, te Godigo bomo yai po dąų wali tiwai gilama yaibao.”

6 “Tama dage bomo mu dolaluyu, tama bugagia dua tama elama, tama dagego te tigidali po te Mosesgo asęani bukude elalubo bomai po wali piąo. Dagego te agai po dwasianu me deli tagalamuo. 7 Tama te dage tomode bidalubo gasa we bidi hani dali deliba me sisinamuo, tama dagego te augwaligo tibo god nogi te me nogilamuo, tama dagego te mu po dąų walainu te augwali nogi me nogi igio. Tama dagego te kidu sugunama, tama te augwaligo tibo godiba lotu po me wagio. Menio! 8 Tialima, te dagego te Genuai Bidi dali bugagia kęą pelama, tama aga wali peyu, te megi tama dagego te ela asali tiwai gilama yao.”

9 “Genuai Bidigo te genuai bidi dabe me, te bomai we bidi hani me, sela sąyu ela gudulama, tama mena bidi me deli te aga bomo elama dolalu, te dage me sela sąbeo. 10 Te dage hani bidi me deligo te umabo bidi mu, te 1,000 bidi dabe te wi pomainu ilibo sę ebaso, te usu yai dao, magi baso meni, God, te dago Genuai Bidigo, te dage tau siyu, augwali dali hwįai dao, te agai polobadu po dąų wali tiwai gilama yaibao. [a] 11 Tama tibaso, dage te duga ebo kolesagade te bugagia dua yao. Dagego te dena Genuai Bidi, God, te godolo mu yao,” wali.

12 “Tiali goli, dagego te dena God tagaliyu, tama dage te hwįbode isiąwai gasa hani we bidi te dage tomode bidalubo bage dali sisinama, tama dagego augwali dali we si ebaso da, 13 teda dagego koneani, te Godigo te augwali munu me sela sągobeo. Menio. Te dagego boi bidi mu augwali pedelaibao. Te augwali te dage tulaluabo tǫ dedage tiwai elaluaibao. Tama augwaligo dage te keloago dene mayu, te bidi tudi badu elibo tiwai gilama dene mawaibao, tama te sesanigo bidi gedude enibo tiwai gilama yaibao. Tama te sęgę elalubadi, te dage tigidali te e wiegi yai tǫde polo isaibao, te dena Genuai Bidigo dagebolo mani tǫ.”

14 “Tialima, megi ena te tǫde bidibo sogo silainogo ebao. Dagego mu koneani, God, te dago Genuai Bidigo, te tigidali wiegi yai nai te po dąų wali nai mena silali. Te agai po dąų wali nai te tigidali pedela silali, te agai wali po me deli munu me tulalubeo. 15-16 Mu tama, God, te dago Genuai Bidigo, te agai po weyu, te sę yaibao wali te tigidali wiegi yai sę ela silali. Tiali goli, dagebolo te Godigo wali bomai dąų wali po, te dagego boloyu, bugagia wali me pisąyu, tama dagego te tibo godiba lotu weyu, tama dagego te augwaliba kidu sugunubaso da, teda Genuai Bidigo dagebolo wado po weyu, tama agai dageba dene ilama, te dage tigidali agai te mani wiegi yai tǫde polo isimainogo yaibao,” Josuago te po wali.

<- Hetman Josuago Po Elalubo Buku 22Hetman Josuago Po Elalubo Buku 24 ->