1 Te bidi dabe augwaligo te Josuago yali tigidali sę po sela bilali po te Hasor tǫ tuni bidi Jabinba sabolali. Tama agai te po te Jobapbolo ola tolali, te Madon hanuba, tama te Simron hanu tuni bidibolo me, te Aksap hanu tuni bidiba me, te po ola tolali. 2 Tama te tǫ bogo badu te bulu du elalubo badu bidali tuni bidibolo me, tama te Jordan wę odogo malu tǫde, te Kineret, te tǫ bogo badu bidali tuni bidibolo me, tama te dolo elalubo tǫde bidali tuni bidibolo badi, tama te Dor hanude te ąį sane pąde bidali tuni bidibolo badi, te tama hanu tuni bidi dabe augwalibolo te po ola tolalio. 3 Tama agai te Jordan wę pąde bidaluali te Kenan dabebolo me po ola tolobadi, tama te bulu du bagede bidaluali hani, augwalibolo me wai. Te augwali Amor dabe, me te Hit dabe, me te Peres dabe, me te Jebus dabe, te augwalibolo po tolai. Tama agai te Hivi dabe augwali te Hermon bulu du pąde, te Mispa dabego tǫde bidalubo bage augwalibolo me te po ola tolai dao. 4 Augwaligo te po odama, tama augwali te augwa ami bidi dabe tigidali augwali dali asai. Tama augwali te bidi hauwa umabo mu elaluali, augwaligo ami bidi dabe te nabis masigi sane usu tiwai. Tama augwaligo hwįbo nai hos me karis hauwa mu elaluai. 5 Te tuni bidi dabego te augwa ami bidi dabe hauwa sisinama, tama augwali bidabo pesage te sigi ąį Meromde nigilama, te Israel dabe augwali dali hwįainogo yali.

6 Tialima, Genuai Bidigo Josuabolo te po wai, “Nage augwalide wi munu me elamuo. Do te tobage sogo ebode da, teda eno digi te Israel dabe augwali tau selama, tama augwaligo te boi bidi dabe tigidali ela muaibao. Tama dagego te hos dabe sągą genuai kigibili togolama, tama augwa te karis dabe dali siaba ulao,” wali.

7 Tama te boi bidi dabego hwįabo sisi isąbadi, tialima polo mu tama Josua dali, aga ami bidi dali, tigidaligo augwali dali te wę Meromde te hwįani. 8 Tama Genuai Bidigo te Israel dabe augwali tau selama, tama augwaligo te boi bidi dabe aiyaba elaluai. Te Israel dabe augwaligo hwįyu, tama te boi bidi dabe pobeasa peyu, te tǫ bogo badu te genuai bulu Saidon teba usu nama, te Misrefot Maim dąį igi pelama, tama te giliga pedalubo badu, te odogo bulu Mispa, te badu saboligi pali. Augwaligo hwį hwį pali, te boi bidi dabe tigidali siliboba usu nai dao. 9 Tama Josuago augwaligo hwįbo nai hos sągą genuai kigibili togobadi, te augwaligo karis dabe me siaba ulubadi yali, te Genuai Bidigo agabolo wali gilama tama tiai.

10 Te silama, nosali Josua ma begasa asiyu, tama te hanu Hasor selama, tama te hanude bidali tuni bidi ela muai. Te sogo te Hasor hanu te tigidali tǫde elaluali hanu dabego te polaluali hanu elaluai. 11 Te Israel dabe augwaligo te Hasor hanude bidali bidi tigidali ela munama, tama deli me bidibeo. Tama augwaligo te hanu siago ulai dao.

12 Josuago te tigidali tuni bidi pageabi elama, tama augwaligo hanu tigidali sai. Tama agai te bidi tigidali elibadi yali, te Genuai Bidigo sę yali bidi Mosesgo wali tiwai gilama yalio. 13 Tiali goli, te Israel dabe augwaligo te bidi dabe augwaligo te dwasianu bulu dude nigali hanu te me siago ulubeo. Josuago te Hasor hanu naga siago ulai dao. 14 Te Israel dabe augwaligo te hanude tigidali mone, me te tigidali bulmakau me selama, te augwa digi te augwa nai da olama, tolaluai. Tama augwaligo te bidi me deli sula tagalobeo. Te augwaligo tigidali ela silai dao. 15 Hasia bolo Genuai Bidigo po te aga sę bidi Mosesbolo mawai. Tama Mosesgo te po dabe te Josuabolo menama, tama Josuago te po tigidali wali pai. Josuago tigidali sę yali, te Genuai Bidigo Godigo Mosesbolo wali po tiwai gilama tama tiai.

16 Josuago te tǫ tigidali pedai badu sai. Agai te bulu dude elaluali tigidali bulu me, te tigidali Negev hanu tǫ badu me, te tigidali Gosen bulu badu me, tama te dolo tǫ elaluali bulu me, te Jordan wę odogo bulu elaluali me, tama te malu tǫ bulu me, te nosali nogi yali te Israel dabego bulu du elaluali bulu me, te tigidali Josuago sela silai. 17-18 Te tǫ dąį te Halak bulu dude gagalali, te Seir pąde, tama pelama, te bulu Balgat te Lebanon odogode elalubo, teba dąį igi pelama, te bulu du Hermon te tǫ bogo badu dao. Josuago te bobobage sogo mu te tuni bidi dabe dali hwįnama, tama agai te tigidali bidi ela silai dao. 19 Te hanu me deligo te Israel dabe augwali dali nogo menama, tama augwali dali me bidibeo. Gibeon te Hivi dabego page bulu, te bulu deligo te Israel dabe dali nogo mawai. Tigidali te gasa hanu dabe te hwįanigo dolai dao. 20 Magi baso meni, Genuai Bidigo digi te hani dabe homu hodolubo sę ilama, te Israel hani dali hwįmainogo ilali. Agai homugo te Israel dabego augwali te homu dene eyu, olo tau sabo homu kolesaga wiegi yai yabo homu munu me egobeo. Menio. Te augwaligo tigidali ela silaibao. Augwaligo te Genuai Bidigo te Mosesbolo polobadu mani po wali palio. [a]

21 Tama te sogo Josua pelama, tama te Anak bidi dabe mu dolai. Augwali te Hebron bulu du bagede me, te Debir bulude me, me te Anap bulude me, te tigidali gasa Juda me Israel dabego bulu du bagede bidaluali. Josuago te bidi dabe tigidali mu ela siyu, te augwaligo tigidali hanu me mu dolai. 22 Te Anak dabe me dedeli te Israelde me bidibeo. Te dwasianu hani naga te Gasade me, Gatde me, te Asdot, tede bidaluai. 23 Josuago te moni tǫ pedai tigidali badu sela silali, te Genuai Bidigo Mosesbolo wali gilama te tiwai yali. Tama Josuago te Israel dabe augwalibolo te moni tǫ te augwa page bulu tiwai ilama mawai. Tama te tǫ te tigidali Israel hani deli delibolo dobayali. Tama tilama, te we bidi augwaligo hwįbo sę ebo sogo silama, tama augwaligo hwįbode te toma tuyu bidali.

<- Hetman Josuago Po Elalubo Buku 10Hetman Josuago Po Elalubo Buku 12 ->