Dwagi Yai Gesi Po Jongo Asęani 19

1 Te gavman tuni bidi Pailat agai po olama, tama te ami bidi dabe augwaligo Jisas selama, tama aga tudide elali, te kibu waligo nigai dila pai bįgo. 2 Tama augwaligo aga dali gisugu omainogo, augwaligo sesani yai bono selama, tobolu madi nigilama, tama Jisasgo tobolude muai. Tama augwaligo te mama yai nami ugwa selama, aga tigide muai. 3 Tama augwaligo Jisas dali tibo posobo po weyu, “Siade dao, Juda we bidigo tuni bidi da” olama, tama augwaligo nogo sawaligo aga nabo gede elali. Augwaligo aga dolobo sę yainogo, te tiwai te ami bidi hauwago aga elidu geai.

4 Te Pailat te Juda bage bidibo digi buluba ma aselama, te po wai, “Dagego suao, eno Jisas aga buluba odasa asobao, tama dagego konemainogo, eno agade magi dwai sę yali sęgę me subeo,” Pailatgo te po wai. 5 Tama Jisas buluba asai, augwaligo te sesani yai bonogo nigali madi aga tobolude munaluai. Tama te mama yai nami ugwa me agai tigide me elaluai. Tama Pailatgo augwali dali te po wai, “Te olo bidi dagego suao,” te po wai.

6 Te tama tialima, te pris tobolu bidi dabe dali, te enesigi bidi dali augwaligo Jisas sulama, tama augwaligo po dagą weyu, te po wai, “Te bidi ni pedaide elao, te bidi ni pedaide elao,” te Juda bage augwaligo te po wai. Tama Pailatgo augwali dali te po wai, “Duga digi aga selama, ni pedaide elao,” te po wai. “Eno agade magi sęgę me subeo,” te Pailatgo Juda bage dali te po wai. 7 Juda bage augwaligo te gavman tuni bidi Pailat agai po wei ponoyu, te po wai, “Dago bomo yai po me deli tama telalubo. Niwai bidi agai ‘Ena da Godigo Ogwa dao’ obaso da, te bidi ela muao. Te bomo yai po agai bolobaso, aga isao,” augwaligo te po wai.

8 Te Pailat agai te po odolama, tama aga wi genuai mu yai. 9 Tama tibaso aga te gavman moni be tomoba ma pai. Tama agai Jisasbolo te po wai, “Nage mena badu bidi nage asai dawe?” Tiali goli, Jisas agai te Pailatgo po wei ponobeo. 10 Tialima, Pailatgo Jisas dali te po wai, “Magi baso nago ena dali po wabewe? Eno nage olo tagala palabo bomo elalubao. Ma, eno nage ni pedaide elabo bomo me, te eno elalubao. Tama nago te konesiąyu ebawe?” te Pailatgo Jisas dali te po wai.

11 Te Jisasgo agai po wei ponoyu, te po wai, “Tialima, God dagalu ugwadu bidibo bidi agai bomo nagebolo magi menigi sogo da, te nago bomogo ena aiyaba elalugi menio. Tama tibaso, ena nago nogoba muani bidi, te bidi agai sęgę genuai mu eyu, tama nago sęgę aiyaba elaluaibao,” Jisasgo te po wai.

12 Te Pailat agai Jisasgo te po odolama, tama agai Jisas olo tagala palabo tų gegai yai. Tiali goli te Juda bage augwaligo bomo elama po dagą weyu, te po wai, “Niwai bidi aga digi ‘Ena tuni bidi da’ weyu da, te bidi agai te Rom gavman tuni bidi Sisar dali boi bidi dao. Tama e bidi Jisas agai te tobage po wai dao. Tama tibaso, nago te bidi Jisas olo tagala palu da, te nage te Rom gavman tuni bidi Sisargo abagi menio, boi bidi tiwai bidaibao,” Juda bagego Pailat dali te po wai. 13 Pailatgo te po odolama, tama agai te gavman moni be tomoba ma pelama, tama Jisas buluba sela asai. Tama Jisas buluba sela aselama, tama Pailat aga po tų odainogo duabo digi duawai, te bulu augwaligo nogi masigigo bidabo sai nigai digi dao wai. Tama te Hibru pogo te nogi tama wai, Gabata, te nogi tama wai. 14 Te tebo sogo te bo disąwai nai tuabo si nogi Pasova te nai dodolobo side dao. Tama belo nai tubo te giliga tomo ebode tamao. Tama Pailatgo Juda bagebolo te po wai, “Duga tuni bidi suiyąo,” wai.

15 Te augwaligo po dagą weyu, te po wai, “Te bidi sela sąyao, te bidi sela sąyao,” tama po wai, “Te bidi ni pedaide elao,” te po wai. Pailat tuni bidigo augwali Juda bage dali te po wai, “Dagego homugo eno duga tuni bidi ni pedaide elao, te homu ebawe?” Te pris hani tobolu bidi dabe augwaligo po wei ponoyu, te po wai, “Dago tuni bidi me menio, te dago tuni bidi te Sisar deli tama dao,” te bidi dabego tama po wai. 16-17 Tama tialima, Pailatgo te Jisas augwali Juda bidigo nogoba munama, tama augwaligo Jisas ni pedaide elamainogo yali.

Augwaligo Jisas ni pedaide elama daganai

(Mat 27:32-44; Mak 15:21-32; Luk 23:26-43)

Tama tiwai, tama te ami bidi dabe te Jisas augwa nogoba sai. Tama selama, tama Jisas aga digi te aga elabo ni pedai tolai, tama aga te Jerusalem hanu tagalama, tǫ me nogi Tobolu Dili te tǫba pai. Tama te Hibru pogo te bulu du nogi Golgota wai. 18 Te bulu dude augwaligo Jisas ni pedaide elama daganai. Tama augwaligo gasa bidi me si me Jisas dali elai. Tama me bidi Jisas agai dolo nogo badu eleyu, me bidi agai pobase nogo badu eleyu yai. Tama Jisas aga tomode elai. 19 Tama gavman tuni bidi Pailat agai po me deli asęnama, tama augwaligo te Jisas elali ni pedaide muai. Te asęani pode te po wai, ‘Jisas Nasaret bidi te Juda we bidigo tuni bidi dao,’ te po te ni pedaide asęna muai. 20 Augwaligo te Jisas ni pedaide elama daganani, te Jerusalem hanu pąde tamao. Tama tibaso, Juda bidi hauwa augwaligo te asęani po nedai te Hibru pogo. Tama Pailatgo te po Hibru pogo asęyu, te Rom pogo asęyu, te Grik pogo asęyu yai, te Jisasgo ni pedaide tama po asęai. 21 Tama te pris tobolu bidi dabe augwaligo Pailatbolo te po wai, “Nago te po tama asęgio, ‘Juda bidigo tuni bidi dao,’ te po wagio. Nago tama po asęąo, ‘Te bidi Jisas agai te po wai, “Ena te Juda we bidigo tuni bidi dao,” ’ te po agai wai dao,” augwaligo te po wai. 22 Pailatgo augwaligo po wei ponoyu, te po wai, “Eno asęani po te eno polo asęai dao. Te po tama elalumainao,” te po wai.

23 Te ami bidi dabe augwaligo Jisas ni pedaide elama daganai. Tama te sę elama, tama augwaligo Jisas aga ugwa dabe sai. Aga ugwa dabe selama, tama ami bidi me si me si augwa hasi te ugwa dabe dobola sai, tama te ami bidi deli deligo Jisas agai te ugwa me deli sai. Tialima agai holobo ugwa hobolisiąwani bobobage mu nigai ugwa dao. 24 Tama tibaso, te ami bidi dabe augwa hasi po miyu te po wai, “Dago te ugwa pedegobeo. Dago satu gagali elama, tama te ugwa sabo bidi nigilaibao.” Augwaligo tama tiwai tama tiyu, te bukude polobadu wali po usu nanio. Te bukude te po wai, “Augwaligo eno ugwa dabe dobola sai. Tama augwaligo eno holobo ugwa sabo bidi nigilainogo, te satu gagali yai,” te bukude te po polobadu asęani. Tama te po usu nanio. Te ami bidi dabe augwaligo tama tiwai. *Tib 22:18

25 Te Jisasgo ni pedai pąde Jisas aga ida tede dolaluai. Te Jisas aga ida aga ama dede me tede dolaluai. Te gasa we me, aga nogi Maria, aga bidi nogi Klopas, te we me Jisas aga ida dali dolaluai. Tama gasa we te Makdala bulu we nogi Maria, aga tede dolaluali. Te we dabe me si me si augwali Jisas elali ni pedai pąde dolaluyu bidali. 26 Tama Jisas aga ida dali, te sę bidi me agai godola pali bidi me, augwali si te pąde dolaluai. Tama Jisasgo augwali si tede dolalubo sulama, tama aga ida dali te po wai, “Te nage dali dolalubo bidi te naga ogwa dao,” Jisasgo te po aga ida dali wai. 27 Tama Jisas agai te sę bidibolo te po wai, “Te naga ida dao.” Tama te sogo te bidigo Maria aga beba odasa pelama, tama Maria aga dali bidai.

Jisas isai

(Mat 27:45-56; Mak 15:33-44; Luk 23:44-49)

28 Te silama, Jisas agai koneai, eno sę tigidali megi tama siliyu te ebao, te homu yai. Tialima, Godigo polobadu asęani po me usu numainogo, agai te po wai, “Ena ąį nogonego sobao,” te po wai. *Tib 69:21; 22:15 29 Ąį tubo nai me deli tede munaluai, tede gasagi yai ąį pągąnaluai. Tama augwaligo te wawi yai bola tiwai nai selama, tama te ugwa te ąįde munama, tama augwaligo te ąį sali ugwa awi dilide kęnama, tama augwaligo Jisas agai te ąį tumainogo te ugwaba selama, mawai. 30 Jisas agai te ąį tulama, tama agai te po wai, “Eno yabo sę tigidali te silali,” Jisasgo te po wai. Agai tama po olama, tama aga mage basi gulu, aga noma bidi tagala palama, tama Jisas aga isai.

31 Te Jisas ni pedaide elali sogo augwaligo te Pasova bo disąwai nai sisi ebo side dao wai. Te do me te Sabat yabo sogo dao, tama te Pasova olo bidibo si te do gagalaibao, te genuai sogo mu dao. Tama tibaso, Juda bage augwaligo homugo te Sabatde te isai bidigo tigi te ni pedaide me daganalubo hagelabo wai. Tama augwaligo Pailat tuni bidibolo te po olama, tama augwaligo te bidi dabe sągą dili togolama, tama megi augwali polo isimainogo yao. Tama isai digi, augwaligo tigi te ni pedaide sao, te po wai. 32 Tama tibaso, te ami bidi dabe pelama, augwaligo te Jisas dali elali bidi si sągą dili togogi pai. 33 Te bidi si sągą dili togolama, tama augwali Jisas munalubo digi aselama suai, tama augwaligo Jisas aga isai digi suai. Tama tibaso, augwaligo Jisas aga sągą dili togobeo. 34 Tialima ami bidi me deligo Jisas punali badu sesemonego enai. Tama polo kaneme dali ąį dali geasa dulai, tǫba. 35 (Te tebo eno suali, eno po polo wai dao, tama tiyu, dagego duga homu Jisas agaba mumainogo yai. Tama eno te wali po te mu po tama dao. Tama ena digi koneyu, tama eno mu po wabo dao.) 36 Te sę tama pedalai, tama Godigo bukude wali po usu numainogo yai. Te bukude asęani po tama wai, “Augwaligo agai dili me deli togogobeo,” te po asęani. *Sai 12:46; Nam 9:12; Tib 34:20 37 Tama gasa po me te Godigo bukude asęyu te po wai, “Tama augwaligo te enani bidi teba gedugo tonaluaibao,” te po me asęani. *Sek 12:10; Ped 1:7

Augwaligo Jisas tigi ola be tomoba muai

(Mat 27:57-61; Mak 15:42-47; Luk 23:50-56)

38 Te augwaligo Jisasgo tigide yali sę silama, tama gasa bidi me nogi Josep, Arimatea bulu bidi, agai te gavman tuni bidi Pailatbolo olama, “Jisas tigi eno saio,” te po wai. Te bidi Josep aga Jisas wali pabo bidi dao. Tialima aga te Juda tuni bidi dabe dali wi eyu, tama agai ‘Ena da Jisas wali pabo bidi da,’ po hania wabe. Tama Pailatgo “Usu dao, nago sa,” te po wai. Tama tilama Josep pelama, Jisas tigi sigi pai. 39 Te bidi me, agai nogi Nikodemus, te bidi polobadu hasia Jisas bidibo digi hulide asali bidi, aga me asai. Agai te ni kaneme si taluama sesai, te dwagi yai denami ebo nai dao. Tama te nai dila pai nai mu dao, abelabo mone genuai mu dao. 40 Tama te bidi si augwali sigo Jisas tigi selama, tama augwali sigo te denami yai nai aga tigiba muyu, te pedai ugwago aga tigi bebe peyu yai. Te Juda bidi dabego isai bidi pubulainogo ebo tiwai gilama yai. 41 Te ami bidi dabe augwaligo Jisas te elali digi tede gi me deli elaluai. Tama te gide isai bidi musiąwai gų page ola be elalualio. 42 Do te Sabat sogo dao. Megi da te Juda we bidi augwaligo Pasova bo disąwai bret nai sisi ebo side dao. Te ola be pąde elalubaso, te bidi sigo Jisas tigi teba muai.

<- Dwagi Yai Gesi Po Jongo Asęani 18 Dwagi Yai Gesi Po Jongo Asęani 20 ->