Dwagi Yai Gesi Po Jongo Asęani 13

Jisasgo aga wali pabo bidi dabe sągą ąį telawai

1 Te olo bidibo si nogi Pasova pedalisiąbadi, deli sogo naga elalubadi, tama Jisasgo koneai, aga e tǫ tagalama, Aya pageba pabo sogo te pąba yagasai. Tama Jisas agai aga te tǫde bidibo we bidi tigidali sogo godolo mu eyu bidai. Megi agai te godolo mu ebo sę tagalobeo. Agai augwali godolo mu ela pidubadi te aga isibo sogoba usu nai dao.

2 Te dwai haubo mobo bidi Satan agai dwai homu kolesaga te bidi Judas homuba hasia muai dao, agai Jisas te boi bidigo nogoba muabo po Judasgo homude muai dao. Judas aga aya nogi Saimon, tama aga bulu nogi Keriot. Te pio hulide Jisas dali, aga wali pabo bidi dabe dali, augwaligo nai tuyu bidali. 3 Tama Jisasgo koneai, ‘God agai tigidali bomo enabolo mawai dao. God agai ena tǫba tagala palai, te ena God aga pageba ma paibao,’ te me aga koneai. 4 Tama tibaso, Jisas aga nai tubo tagalama, hodaluama, tama aga bulu badu muani ugwa te pedela muani. Tama tigi holobo ugwa selama, tabide bea sai. 5 Tama tilama, agai ąį moni pouba gelama, tama agai wali pabo bidi dabego sągą ąį telabo gagalama, tama aga tigi holobo ugwago sągą ma holai. 6 Tama te sę gagalama, tama Saimon Pita pageba asai. Pitago te po wai, “Genuai Bidi, nago ena sągą ąį telawainogowe?”

7 Jisasgo wei ponoyu, te po wai, “Eno ebo sę page nago megi kuna konebeo. Tialima tamadi digi te nago te sę page koneaibao,” Jisasgo te po wai.

8 Pitago agabolo te po wai, “Nago eno sągą ąį munu me telagobeo. Te menio,” te po wai. Tama Jisasgo te po wai, “Eno nago sągą ąį telasiąyu da, teda nage ena wali pabo bidi bidigobeo,” te po wai.

9 Po wei ponoyu, Pitago te po wai, “Genuai Bidi, eno sągą naga ąį telagio. Nago eno tobolu me, nogo me ąį telayao,” te po wai, Pitago.

10 Jisasgo te po wai, “Bidi aga ąį mu pauwai bidi te meda menio. Aga tigi ma ąį paugobeo, sągą naga ąį telaibao. Tama te tiwai dage meda meni yai bidi dabe da. Tiali goli, dage tomode te bidi me deli digi aga te meda yai bidi bidibo,” Jisasgo te po wai. 11 Jisas aga boi bidi nogoba muabo bidi aga polo koneai. Tama tibaso, agai te po wai, “Dage tomode te bidi me deli digi te meda yai bidi bidibo.”

12 Te Jisasgo augwaligo sągą ąį tedela silama, tama aga holobo ugwa ma tigide ma munama, tama aga augwali dali ma duayali. Tama agai augwali dali te po hanalu wai, “Eno dage dali megi tama yali sę sulama, tama te sę page dagego koneaniwe? 13 Dagego enabolo po ola mabo bidi da weyu, tama Genuai Bidi dao wabo dao. Ao, dagego te po mu po dao. Ena te bidi tama dao. 14 Ena te po ola mabo bidi, Genuai Bidi da. Te eno dagego sągą ąį megi tama tela yali. Tama tibaso, dagego me duga ama dabego sągą ąį telabo sę tama yao. 15 Tama eno dagebolo ola mobao, dage me te sę ebo sulama, wali pomainogo yai. 16 Tama te sę page ola mayu, eno dagebolo mu po obao, sę ebo bidi agai aga genuai bidigo nogi aiyaba elalugobeo. Tama te po sela pabo bidigo aga tagala palali bidigo nogi aiyaba elalugobeo. 17 Dagego te po page koneyu da, te sę yao. Tama te sę eyu da, teda dage dwagi yai homu yagameo,” Jisasgo te po wai.

18 Te agai po me weyu, te po wai, “Dage tigidali dali eno te po wabeo. Ena digi te ena sa muai bidi dabe, te eno konealubao. Tialima, te Godigo po bukude polobadu wali po te nai egilama, mu pedalaibao. Te polobadu asęani po te dao, ‘Ena dali nai tuali bidi te bidi agai megi ena dali boi bidi yaibao.’ 19 Te age dolobo sę pedalisiąbadi, megi eno dagebolo te obao. Tama tibaso, nosali te sę pedalobaso da, teda dagego te mu koneaibao, te ena da Godigo tagala palai bidi dao. 20 Eno dagebolo mu po obao, eno sę bidi tagala palobao. Tama gasa bidigo te eno tagala palai bidide dwagi yai kolesaga ebaso da, te agai enade me te dwagi yai kolesaga ebo tiwai dao. Te kolesaga me ela pabo. Te bidigo te dwagi yai sę te ena tagala palali bidibolo me te sę ebo tiwai dao, te Godibolo,” Jisasgo te po wai.

Judasgo Jisas boi bidigo nogoba muabo po

(Mat 26:20-25; Mak 14:17-21; Luk 22:21-23)

21 Te Jisasgo te po olama, tama aga homu sęgę mu yai. Tama agai po hanilama pusuyu, te po wai, “Eno mu po dagebolo obao, dage tomode me deligo ena boi bidi nogoba muaibao,” Jisasgo te po wai. 22 Jisas agai te po obaso, te aga wali pabo bidi augwa hasi deli deligo augwa hasi tonono pai. Augwaligo konebeo, Jisas agai debolo wabowe, te homu yai. 23 Te augwali tomode bidi me deli te Jisasgo aga dali dwagi yai homu eyu tama mu godola pabo, te bidi aga pąde bidai. 24 Te bidibolo Saimon Pita agai “Nago agabolo hanalu wao, agai debolo te po waliwe?” te po wabo tiwai Pitago te bidibolo guni midigilali. 25 Tibaso, te bidi me Jisas tigiba kisa sagaselama, Jisas dali te po hanalu wai, “Genuai Bidi, nago mena bidide te po obawe?” wali.

26 Tama Jisasgo po wei ponoyu, te po wai, “Eno e tubo nai bret dagego te poude elalubo tubo nai meba selama, tama bidi me deli mawaibao. Te bidi te tama dao.” Tilama, Jisasgo bret naigo te poude elalubo nai meba selama, tama Judasbolo mawai. Te bidi Judas, aga aya nogi Saimon, aga bulu nogi Keriot dao. 27 Judasgo te nai sai, tama tamadi tama te dwai haubo mobo bidi nogi Satan agai Judasgo homude dwai po mu muai. Jisasgo agabolo te po wai, “Nago te sę yai wida, te nago polo yao,” Jisasgo te po Judas dali wai. 28 Te nai tuyu dulaluali bidi dabe augwaligo Jisasgo Judasbolo wali po page konebeo. 29 Judas agai augwaligo masigi bubo honoli tonalubo bidi dao. Tama tibaso, mebago te homu yai, Jisasgo Judasbolo olo bidibo side tubo nai abelabo po agabolo wabo, te homu yai. Mebago te nai meni yai bidi dabe maiabo nai po wabo, te homu yai. 30 Tialima, Judas Jisasgo mani nai agai sai, tama polo Judas aga te be buluba pai. Tama bulu hulia sai.

Gesi bomo yai po

31 Te Judas te be buluba pai digi, tama Jisasgo te po wai, “Megi tama te Godigo Bidi Mu aga genuai bomo dali genuai nogi dali te we bidi augwaligo koneaibao. Tama Godigo Bidi Mu agai Godigo genuai bomo dali genuai nogi dali augwalibolo ola mawaibao. 32 Tama Godigo nogi te Godigo Bidi Mude siyu da, teda Godigo te Bidi Mu nogi ugwaba saibao, tamadi tama te sę yaibao. 33 Abagi dede, dwasianu sogo ena dage dali bidaibao. Tama dagego ena gegebo sę yaibao. Tama eno Juda bagebolo wali po gilama, tama megi eno dagebolo me obao, dage ena pabo buluba me pogobeo. 34 Eno dagebolo gesi bomo yai po mobao, dagego duga hasi dali dwagi yai homu eyu, augwali godolo mu yao. Eno dage dali dwagi yai homu eyu, godolo mu yali gilama, tilama duga hasi dali me dwagi yai homu eyu, augwali godolo mu yao. 35 Tama dagego duga hasi dali dwagi yai homu eyu, augwali godolo mu eyu da, teda tigidali we bidigo sulama, koneaibao, dage da ena wali pabo bidi da waibao,” Jisasgo te po aga bidi dabe dali wai.

Jisasgo te po wai, “Pitago eno nogi dualaibao”

(Mat 26:31-35; Mak 14:27-31; Luk 22:31-34)

36 Te Jisasgo te po augwalibolo olama, tama Saimon Pitago agabolo te po wai, “Genuai Bidi, nage mena paiwe?” Jisasgo Pitabolo po wei ponoyu, te po wai, “Ena pabo bulu nago ena wali megi pogobeo. Tialima, nosali da, nago ena wali asaibao,” wali.

37 Pitago agabolo te po wai, “Genuai Bidi, magi baso eno nage megi wali pogobewe? Eno nage tau somainogo ena isiyu da, te usu yaibao,” Pitago te po wai. 38 Jisasgo po wei ponoyu, te po wai, “Mu dawe? Ena tobade nage ena tau siyu, isabo sisi ebawe? Menio. Eno mu po nagebolo obao, be posisiąbadi, te ba kakaruk po wasiąbadi, sela sogo nago eno nogi dualaibao,” Jisasgo te po wai.

<- Dwagi Yai Gesi Po Jongo Asęani 12 Dwagi Yai Gesi Po Jongo Asęani 14 ->