Dwagi Yai Gesi Po Jongo Asęani 11

Lasarus isai

1 Bidi me deli nogi Lasarus, te bidi gasi yai. Te Lasarus aga bulu Betani, te bulude te we si bidali, we me nogi Maria, we me nogi Marta, augwali si ama name si dao. 2 Te we Mariago Jisas sągąde denami yai wel nosali pilama, tama aga moni bobobage tobolu nisigo ma holai. Te Maria aga abe Lasarus gasi yai. 3 Tama tibaso, aga abe sigo Jisas bidibo digi po ola tolai. Augwali sigo te po wai, “Genuai Bidi, nago godolo mu yali bidi aga gasi salio,” te po wai.

4 Jisasgo te po odama, te po aga wali pabo bidi dabebolo wai, “Te gasi page tama telalubuo. Te gasigo sę te bidi Lasarus isibo gasi naga menio. We bidi augwaligo Godigo ula yai bomo sumainogo eyu te bidi gasi yai. We bidi augwaligo Godigo Ogwa me nogi ugwaba somainogo eyu, te gasigo Lasarus sai,” Jisasgo te po wai.

5 Jisasgo te Marta dali, aga ama dali, Lasarus dali augwali Jisasgo godolo mu yai goli, 6 agai te Lasarus gasi ebo po odama digi, tama Jisas aga polo pisąbadi, si sogo te bidibo bulude ma bidai. 7 Nosali si sogo silama, Jisas aga wali pabo bidi dabebolo te po wai, “Da Judia tǫba ma pebelainao,” wai.

8 Aga wali asobo bage augwali noma selama, tama te po wai, “Po ola mabo bidi, polobadu gana Juda bagego nage masigi sąnama elai hagede te homu yai. Nage teba ma pelamuo,” te po wai.

9 Jisasgo te Godigo bodolu mani sogo naga te aga isaibao po augwalibolo ola momainogo agai po nogo habu sugunama te po wali, “Te giliga nanobadi yaide, te ula elalubao. Tama siade bilibo bidi tulamubo menio. Magi basowe? Te ulade dao, agai aga pabo tų bugagia suagameo. 10 Tiali ma, bidi hulide bilibo bidi, aga tulamubo dao. Magi basowe? Ula menio, te aga te pabo tų hulia sai elalubo,” Jisasgo te po wai.

11 Jisasgo te po ma wadolama, te po wai, “Dago abagi Lasarus godege pibao. Tialima, eno aga hodoligi paibao,” Jisasgo te po aga wali pabo bidi dabe dali wai. 12 Augwaligo te po wai, “Genuai Bidi, aga piyu da, te aga usu ma yaibao.” 13 Jisasgo wali po “Lasarus godege pibao,” te po page aga isai dao wali. Tialima, geda muyu, augwaligo homugo aga olo godege piali, te homu yai. 14 Tama tibaso, Jisasgo augwalibolo hanilama, te po wai, “Lasarus mu isalio,” te po wai. 15 “Aga isali sogode ena aga dali bidibeo. Dage tobade ena agaba pabeo. Magi basowe? Nosali dagego enaba duga homu mumainogo ena tama tiwai. Te sę ebode eno dwagi yai homu ebao. Megi da aga bidibo digi pinao,” Jisasgo te po wai. 16 Tomas, augwaligo aga nogi me Didimus wabo, te nogi page aga ama name dali deli sogo ame nai bidi, te bidi te Jisas wali pabo bidi me deli dao. Agai te Jisas wali pabo bidi mebabolo te po wai, “Da aga dali pinao, da me aga dali isimainogo pinao,” Tomasgo te po wai.

Isai bidi hodalobo bomo dali, bidabo bomo dali si Jisasde elalubo dao

17 Te augwali pelama, pelama, tama Betani be naniba sabolali. Bidi mego Jisasbolo “Lasarus pubulama, me si me si sogo bidali,” te po wai. 18 Te dwasianu be nani Betani te moni hanu Jerusalem pąde digi tamao, usu ni kilomita sela tamao. 19 Tama Juda we bidi hauwa augwali Jerusalemdu aselama, Marta dali Maria dali si bidibo digi asai, augwali si dali mumonani po omainogo, augwa si abe isali sogo tiwai. 20 Tama Martago Jisas asobo po odai, tama agai te be nani tagalama, tama Jisas tiąba pai. Tialima, Maria aga te be tomode bidai. 21 Martago Jisasbolo te po wai, “Genuai Bidi, nage ede bidigi sogo da, eno abe isigi menio,” Martago te po Jisasbolo wai. 22 “Tialima, megi eno koneai, nago Godibolo magi nai me hanaluyu da, agai nagebolo mawaibao,” Martago Jisas dali te po wai.

23 Jisasgo Martabolo te po wai, “Naga abe ma hodaluama, bidaibao.”

24 Martago te po wai, “Eno koneai, aga nosali tǫ dagalu dali silibo side hodaluama, ma bidaibao. Te sogo tigidali we bidi ma hodaluaibao,” Martago te po wai.

25 Jisasgo te po wai, “Isai bidi hodalobo bomo dali, bidabo bomo dali, te ena digi eno tonalubo dao. Bidigo enabolo homu dąų olama, muani bidi isali, te aga bidabo bomo selama, ma bidaibao. 26 Bidibo bidi me agai enaba aga homu mu mubo bidi, aga munu me isigobeo. Nago homu te po waboba mubawe?” Jisasgo te po wai.

27 Martago Jisasbolo te po wai, “Ao, Genuai Bidi. Nage da Krais dao. Nage Godigo Ogwa dao. Nage te bidi polobadu Godigo po weyu, e tǫba asaibao wali bidi da. Ena homu dąų olama, nageba muai dao,” Martago te po wai.

Jisas aga gela wai

28 Te we Martago te po olama, aga ama Maria i wagi pai. Te po dua digi wai, “Po ola mabo bidi aselama, bidibao, agai nage i wai dao,” te po wai. 29-31 Tama te Juda dabe Maria dali be tomode bidai. Augwaligo Mariabolo mumanobo po weyu bidai. Mariago te Martago pusali po odolama, aga polo hodaluama, Jisas bidibo digi pabo gagalai. Jisas te be nani Betani sabalisiąbadi, aga Martago hasia tiąba aselama, suali madigi me bidai. Tama te Juda bage augwaligo Maria polo hodaluama, buluba pabo suyu, tama augwaligo te homu yai, ‘Aga gų pageba gela wainogo pabo,’ te homu yai. Tama augwali aga wali pai.

32 Te Maria Jisas bidibo digi sabolai. Agai Jisas suyu, polo tama Maria aga tigi tǫba pigilubo tiwai yai, Jisasgo sągą pagede. “Genuai Bidi, nage ede bidigi sogo da, eno abe isigi menio,” Mariago te po Jisas dali wai. 33 Jisasgo suai, Maria gela wabo. Tama agai suali, Juda bage aga dali asali bage, augwali me gela wabo suali. Tama Jisas agai me homu dene mu eyu, tama aga pąde gela wabo homu yai, homu hę wai. 34 Jisasgo te po wai, “Dagego aga menade muaniwe?” Augwaligo Jisasbolo te po wai, “Nago suagasao.” 35 Jisas gela wai. 36 Tama tibaso Juda bage augwaligo augwa hasi te po wai, “Suao. Agai te bidi godolo genuai mu yai dao,” te po wai. 37 Tialima, meba bidigo e po wai, “Te bidi agai gedu widai bidi gedu ma pedalai. Agai te isai bidi me tau sigi sogo da, aga isigi menio. Agai magi baso aga tau sabewe?” Juda bagego Jisasde te po wai.

Jisasgo Lasarus ma hodolai

38 Homu hę ma weyu, Jisas te gų pageba pai. Te gų page augwaligo moni masigi tomode nigai dao. Tama moni sawali masigi me deli selama, tama sunumi paliali. 39 Jisasgo te po wai, “Dagego te masigi sela sąyao.” Te isai bidigo abe nogi Marta, te wego Jisasbolo te po wai, “Genuai Bidi, aga isilama, me si me si tama sogo piai dao. Tama dwai kugumini ebo,” Martago te po wai. 40 Tama Jisasgo Martabolo te po wai, “Magi yaliwe? Hasia nagebolo eno wai dao, nago enabolo homu muyu da, nago Godigo bomo nago sueibao,” Jisasgo te po wai. 41 Te agai te masigi sela sąyao te po obaso, augwaligo te masigi sela sąwai. Tama Jisasgo dagaluba tonaluyu, te po wai, “Aya, eno nagebolo nage usu dao obao. Nago eno hanalu wali po nago odai dao. 42 Eno koneai, tigidali sogo nago eno hanalubo po wabo odobo dao. Tiali eno e dolalubo we bidi tobade e po megi nagebolo obao, augwaligo nago ena tagala palali bidibolo homu mumainogo ebao.” 43 Jisasgo te po olama, tama agai i bomo elama wai, “Lasarus, nage buluba asao,” Jisasgo te po wai. 44 Tama tilama, isai bidi hodaluama, buluba asai. Aga sągą dali nogo dali augwaligo nami ugwago bebe pai dao. Augwaligo dwasianu nami ugwago aga gesabidide haluama tama kęani. Te kęani tama elalubadi, buluba soai. Jisasgo augwalibolo te po wai, “Pisigina sąyao, aga pomainao.” Tama augwaligo te ugwa dabe pisigina sąnama, tama aga beba pai.

Juda bage tobolu bidi augwaligo Jisas elabo po miai

(Mat 26:1-5; Mak 14:1-2; Luk 22:1-2)

45 Te Juda bage augwali Maria bidibo digi asai dao. Augwaligo Jisas agai te ebo sę suai. Tama augwali hauwago homu agaba muai. 46 Tialima, bidi meba pelama, Jerusalem be naniba sabolama, tama Jisasgo te yali sę po te Farisi bagebolo wagi pai. 47 Tama tibaso, te Farisi hani bage me, te pris hani tobolu bage me, augwaligo te kaunsil bage dali sisinama, Jisasde te po wai, “Dago te bidide magi yaibawe? Agai bomai sę hauwa mu ebo dao. 48 Tama tibaso, dago aga gogolama, agai te sę me ela peyu da, tigidali we bidigo agabolo homu munama, tama augwali aga wali paibao. Tama tiyu da, te da tonalubo Rom gavman bagego te ebo sę sulama, sębę elama, tama dago Moni Lotu Be tempel dali, da bidi hani dali, augwaligo dolagasaibao,” Juda bagego te po wai.

49 Tialima, augwali tomode bidi me nogi Kaiafas, aga bidai. Te kibu bede aga te pris bage tuni bidi nigai. Agai augwali dali te po wai, “Dage umunalubo bidi dabe tiwai dao. 50 Dago hani tigidali dolidali weyu, bidi me deli isilama, tama aga isibogo te we bidi tau siyu da, te usu yaibao. Dagego te konebewe?” Kaiafasgo te po wai. 51 Agai po aga homugo digi wabeo. Te menio. Me ma, te kibu bede aga te pris hani bage tuni bidi bidiyu, agai te Jisasde nosali pedalabo sę po, te Juda we bidi tau siyu, aga nosali isabo sę pedalisiąbadi te agai te po wai. 52 Tama Jisas aga isiyu, Juda we bidi naga tau sogobeo, te Godigo we bidi gasa bulude bidada pali we bidi deliba sisinama, agai hani deli naga yaibao.

53 Te sogo te Juda bagego tobolu bidi dabe augwaligo po gagalama, Jisas elabo po miai. 54 Tama tibaso, Jisas te Judia tǫ tomode hania bilibeo. Agai te bulu tagalama, tama te moni tǫ me nogi Efraim, teba pai, te bidi meni yai tǫ sesegeba. Tama Jisas te bulude aga wali pabo bidi dabe dali bidai.

55 Te Juda bagego bo disąwai nai bret tubo si te pąde dao, te si nogi Pasova. Tama tibaso, we bidi hauwa te haniani bulu bidi hani augwali Jerusalem te buluba hodali, augwa yali dwai sęgę hasia sela sąmainogo yai. Nosali te Pasova nai augwaligo tueibao. 56 Tama Jerusalemde augwaligo Jisas gegainogo yai. Tama augwali te Moni Lotu Be tempel tomode augwa hasi deliba sisinama, tama po miyu, te po hanalu wai, “Dagego magi homu ebowe? Jisas aga e nai tubo si eba asogowe?” Juda bagego augwa hasi te po wai. 57 Te pris tobolu bage me, te Farisi hani bage me, augwaligo bomo elama, te po wai, “Bidi mego Jisas menade bidibo sulama, te bidi dabolo wagasao, tama dago aga kalabus yaibao,” te po wai.

<- Dwagi Yai Gesi Po Jongo Asęani 10 Dwagi Yai Gesi Po Jongo Asęani 12 ->