1 Jeremaiago te tigidali po God Genuai Bidigo agabolo weyu, te we bidi dabeba mao wali pusalio. Agai po ola silibo si da, 2 tialima, Asaria, te Hosaiago ogwa, me Johanan, Kareago ogwa dali, te gasa hagoma ebo bidi dabe dali, augwaligo Jeremaiabolo e tiwai po wali, “Nago tibo po obao. God, dago Genuai Bidigo dabolo te po wagasu, te da Isipba me pigio olama, te nage me tagala palobeo. Mu menio. 3 Te Baruk, Neriago ogwa naga te nago homu hodolobaso, te da aiyaba elalumainu ebao. Nago homugo te Babilon dabego da selama, da ela muyu, ma da Babilonba kalabus igi pomainogo odasa pomainogo ebo dao,” wali. 4 Augwaligo te tama po olama, te Johanan, me gasa ofisa dabego, me te tigidali we bidigo te Genuai Bidigo po sela sąnama, augwali te Juda tǫde bidibeo. Menio. 5-6 Johanan dali te ofisa dabego te Judade bidali we bidi tigidali selama, te augwali palio. Augwaligo te bidi, me we, me wai dabe, te polobadu te boi bidi dabego gasa tǫ kantriba ela gudulai, te augwali Juda tǫba ma bidagasai. Tama me, augwaligo te Juda kingo wegi dabe dali, te gasa we bidi dabe me, te Nebusaradan, te Babilon amigo polalubo ofisa bidigo, te Gedalia dąį ilama, augwali tonalumainogo yali. Tialima, Johanan me, gasa ofisa dabego dali, te tigidali Juda, me profet Jeremaia, me Baruk te Neriago ogwa dali selama, 7 tama augwa tigidali te Isipba odasa pali. Te tama tiali kolesagade augwaligo te Genuai Bidigo po sela sąwai. Tialima, augwali pelama, te taun Tapanesba sabolali, te tǫ kantri Isip dao. [a]

8 Augwali te Tapanesde bidibadi, te Genuai Bidigo Jeremaiabolo te tiwai po walio, 9 “Isip kingo be te taunde elalubao. Te Juda dabe mebago nage subo sogo, nago te genuai masigi dabe sigi pelama, tama augwali te tǫde elalubo brik dabe pagede pubulao, [b] te mama tǫde, te Isip dabego kingo be sunumi pąde tama tiao. 10 Tama te Juda dabeba nago te tiwai po wao, ‘Tigidali Bomo Elalubo Genuai Bidi, aga te Israelgo God, agai te tama po wai, “Ena Genuai Bidi dao, te eno ena sę bidi, te Babilon king Nebukatnesar i waibao, tama aga te buluba asaibao. Tama aga duabo sia king te pubulali masigi dabe daide mueibao. Te agai ugwa be pasugulama, te masigi munalubo tǫ pedai badu mesegelaibao. 11 Agai te Isip tǫ kantri dolagasaibao. Eno te dwai gasi selama, isabo bidi meba dąį ilaibao. Tama te sogo augwali dwai gasi saibao. Te gasa tǫ kantriba kalabus igi pabo bidi meba eno dąį ilaibao. Te sogo augwali kalabus yaibao. Te boi hwįgi pelama isabo bidi meba eno dąį ilaibao. Tama te dąį yali side hwįgi pobaso, te augwali isaibao. 12 Te eno Isip dabego lotu be siago ulaibao. Te lotu be dabede te Isipgo tibo god piksa dabe elalubao. Te Nebukatnesargo te piksa meba siaba ulama, te meba aga tǫ kantriba sela paibao. Te agai Isip kantride nai tigidali sela sąwaibao, te sipsip tonalubo bidigo aga gudali ugwade te kibu tugunu sela sąbo tiwai yaibao. Te agai Isip dabe mu elalueibao. Tama aga te tǫ kantri tagalama, paibao. 13 Aga te Isipde bidibo sogo, agai te we bidi dabego bede te giliga augwa god dao olama, lotu udali bobage masigi pos aluaibao. Tama agai te Isip dabe tibo godigo lotu be dabe tigidali siago ulaibao,” Israelgo God Genuai Bidigo te po wali,’ te po te Juda dabeba pusao,” Genuai Bidigo te po wai.

<- Profet Jeremaiago Po Elalubo Buku 42Profet Jeremaiago Po Elalubo Buku 44 ->