Te Israel Tobolu Bidi Dabe 10

Jepta Dali te Gasa Bidi Dabede Po

(Dąį 10–12)

1 Abimelek isai madi tama Tola, te Puago ogwa, te Dodogo wąįgo wai, te Israel ma dobola sabo bidi pedelali. Aga Isakar hanigo bidi. Tama aga te Efraimgo hani bidali bulu du te Samirde bidali. 2 Aga te Israel dabe tobolu bidi nigilama bidibadi, te kibu be te 23 kibu be bidai. Tama aga isibaso, tama augwaligo aga te Samirde pubulali.

3 Te Tola bidali tudi badu nosali, te Jair te Gileat bulu bidi te tobolu bidi pedelai. Aga te Israel dabego tobolu bidi bididubadi, te kibu te 22 kibu be bidai. 4 Te agai ogwa dabe te 30 ogwa dabe elaluali, tama augwali te kibu donki te 30 donkide dualama bilali. Te augwaligo hanu 30 te Gileat tǫde elaluali. Tama te hanu dabe augwaligo nogi eyu, te Jairgo Ugwa Be Hanu da wali, te nogi elalua asali te megi e sogoba usu nagasali elalubao. 5 Nosali Jair isibaso, tama augwaligo aga te Kamonde pubulali.

Te Amon dabego te Israel dabebolo sęgę mawai

6 Tama te Israel dabe augwaligo Genuai Bidigo gedude dwai sę ma yai. Augwaligo lotu po te Bal dabe me, te Astarte dabe me, lotu weyu yai. Te augwali te Siria dabego god, te Saidon me Moap, me Amon dabe me Filistia te tama bulu bagego god dao. Augwaligo te Genuai Bidi tagalama, tama te agaba lotu po me wabeo. 7 Tama tibaso, Genuai Bidigo te Israel dabe dali haliga sębę elama, tama agai te Filistia dabe me te Amon dabe aselama, te augwali dali boi hwįagaselama, te augwali aiyaba elalumainu ilali. 8 Te sogo kibu bede te augwali Israel dabe aiyaba elaluama, tama augwali mu dolali. Te Filistia dabego me te Amon dabego te Israel dabe aiyaba elaluama, tama augwaliba dwai sę mu ilidubadi, te 18 kibu be bidai. Te wę Jordan pedai me badu te Gileat te badu bidali te Israel dabede te tama sę yali. Te giliga pedalubo badu te Amon dabe bidali badu te sę yalio. 9 Tama te Amon dabego te ąį Jordan nogelama, tama te Judago hani me, te Benjamingo hani me, te Efraimgo hani, te hani augwali dali te Amon dabego boi hwįgi pai. Tama tialima, te Israel dabe augwali dwai dene mu sabo sogo pedelai dao. 10 Tialima, te Israel dabego Genuai Bidiba i weyu, tama augwaligo te po wali, “Dago dwai sę nagebolo yali, magi baso meni, dago nage tagalali, te dago God nage dago tagalama, tama dago te Balba lotu wali.” Augwaligo te po wali.

11 Tama Genuai Bidigo te Israel dabebolo te tama po wali, “Polobadu te Isip dabe me, te Amor dabe, me te Amon dabe, me te Filistia dabe me, 12 te Saidon dabe me, te Amalek me, te Maon dabe, te hani augwaligo dage elaluama, tama dageba dwai sę mu ilai. Tama dagego enaba i obaso, tama eno dage te augwaligo nogode ma dobola sai dao. 13 Tiali goli, dagego ena tagalama, tama gasa tibo godiba lotu wali. Tama tibaso, te eno dage tau ma sogobeo. 14 Dage pelama, te duga digi sa muyu nigilali god i wagi pao. Augwaligo te dage sęgę sabo sogo tau somainu emainao.” Genuai Bidigo te Israel bagebolo te po wai.

15 Tiali goli, te Israel dabego Genuai Bidi dali te po wali, “Dago dwai sę yalio. Te nago dabolo yainogo ebo sę te nago yao. Tiali goli, megi dago nagebolo hanalubo, te magi baso meni, te nago megi e sogo ma dobola somainogo hanalu wali.” Te Israel dabego te po wai. 16 Tialima, augwaligo augwa te tibo godiba lotu wali te tiali te sę dabe sela sąnama, tama augwaligo Genuai Bidiba lotu po wali. Tama agai te Israel dabe homu dene elama, tama agai homugo augwali te sęgę ma tolidali homu yai.

17 Nosali te Amon dabego ami bidi dabe sisinagaselama, tama augwa bidabo pesage te Gileatde nigali. Tama te Israel bidi dabe me sisinagaselama, tama augwa bidabo pesage te Mispa bulude nigalio. 18 Te bidi dabe me te Israel dabe polalubo bidi dabe te Gileatde bidalubo bidi dabe augwa hasi tomode digi hanalua pali, “Te niwai bidi da dali polasa peyu, tama te Amon dabe dali boi hwįaibawe? Te tama tebo bidi aga te Gileatde te tigidali bidigo tobolu bidi bidaibao,” po wali.

<- Te Israel Tobolu Bidi Dabe 9 Te Israel Tobolu Bidi Dabe 11 ->